କନକ ବ୍ୟୁରୋ : କିଏ ଜିତିବ ୨୦୧୯ କ୍ରିକେଟ୍ ବିଶ୍ୱକପ ? ବିଶ୍ୱକପ ଟାଇଟଲର ଦାବିଦାର ନେଇ ଭବିଷ୍ୟବାଣୀ କରୁଛନ୍ତି ଅନେକ ପୂର୍ବତନ ଖେଳାଳୀ । ଇଂଲଣ୍ଡରେ ଚାଲିଥିବା କ୍ରିକେଟ୍ ବିଶ୍ୱକପର ଅଧା ଯାତ୍ରା ଶେଷ ହେଲାଣି । କେଉଁ ୪ଟି ଟିମ୍ ସେମି-ଫାଇନାଲ ଟିକେଟ୍ ହାତେଇବେ ଏବେ ତା ଉପରେ ରହିଛି ସମସ୍ତଙ୍କ ନଜର । ଆଉ ଏହା ପୂର୍ବରୁ ବିଶ୍ୱକପ୍ ବିଜେତା ନେଇ ଭବିଷ୍ୟବାଣୀ କରିଛନ୍ତି ପାକିସ୍ତାନ ଟିମର ପୂର୍ବତନ ଅଧିନାୟକ ତଥା ଷ୍ଟାର ଅଲରାଉଣ୍ଡର ସାହିଦ ଆଫ୍ରିଦି ।
Kanak News is now on WhatsApp
Join and get latest news updates delivered to you via WhatsApp
ପାକିସ୍ତାନର ପୂର୍ବତନ ଖେଳାଳୀ ସୋଏବ ଅଖତାର ନିଜ ୟୁଟ୍ୟୁବ ଚ୍ୟାନେଲରେ ସାହିଦ ଆଫ୍ରିଦିଙ୍କୁ ବିଶ୍ୱକପରେ ଏକ ଦଳ ଉପରେ ବାଜି ଲଗାଇବାକୁ କହିଥିଲେ । ଆଉ ସାହିଦ ଆଫ୍ରିଦି ଯେଉଁ ଦଳ ଉପରେ ବାଜି ଲଗାଇଛନ୍ତି, ତାହା ଜାଣିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି । ସୋଏବ ଅଖତାର ଆଫ୍ରିଦିଙ୍କୁ ପଚାରିଥିଲେ କେଉଁ ଦଳ ୨୦୧୯ କ୍ରିକେଟ୍ ବିଶ୍ୱକପ ଜିତିବ ? ଆଉ ଏହି ପ୍ରଶ୍ନର ଉତ୍ତର ଦେଇ ସାହିଦି ଆଫ୍ରିଦି କହିଛନ୍ତି, ଚଳିତ ବିଶ୍ୱକପରେ ଏପର୍ଯ୍ୟନ୍ତ ଖେଳାଯାଇଥିବା ସମସ୍ତ ମ୍ୟାଚରେ ଦଳ ଗୁଡିକର ପ୍ରଦର୍ଶନରୁ ଜଣାପଡୁଛି, ଭାରତୀୟ ଦଳ ହିଁ ବିଶ୍ୱକପ ଜିତିବାର ପ୍ରବଳ ଦାବିଦାର ଅଟେ ।
ସାହିଦ ଆଫ୍ରିଦି କହିଛନ୍ତି, ଭାରତର ବ୍ୟାଟିଂ ବାହିନୀ ସବୁବେଳେ ସୁଦୃଢ ରହିଥାଏ । କିନ୍ତୁ ଚଳିତ ବିଶ୍ୱକପରେ ଭାରତର ବୋଲିଂ ବାହିନୀ ମଧ୍ୟ ଶକ୍ତିଶାଳୀ ରହିଥିବା ଦେଖିବାକୁ ମିଳିଛି । ତେବେ ବିଶ୍ୱକପରେ ଭାରତ ଏବଂ ଇଂଲଣ୍ଡ ମଧ୍ୟରେ ଫାଇନାଲ ମୁକାବିଲା ଖେଳାଯାଇପାରେ ବୋଲି ଭବିଷ୍ୟବାଣୀ କରିଛନ୍ତି ଆଫ୍ରିଦି । ତେବେ ସେମିଫାଇନାଲରେ ଭାରତ, ଇଂଲଣ୍ଡ, ଅଷ୍ଟ୍ରେଲିଆ ଏବଂ ନ୍ୟୁଜିଲାଣ୍ଡ ସ୍ଥାନ ପାଇପାରନ୍ତି ବୋଲି ସେ କହିଛନ୍ତି ।