କଲେଜ କୁଇନରୁ ଦେଶର ପ୍ରଥମ ମହିଳା ରାଷ୍ଟ୍ରପତି ହେବା ପର୍ଯ୍ୟନ୍ତ ଜୀବନ ଯାତ୍ରା, ଜାଣନ୍ତୁ ପ୍ରତିଭା ପାଟିଲଙ୍କ ସଂପର୍କରେ କିଛି ରୋଚକ କଥା
କନକ ବ୍ୟୁରୋ : ପ୍ରତିଭା ଦେବୀସିଂ ପାଟିଲଙ୍କ ନାମ ଭାରତ ଇତିହାସରେ ଲିପିବଦ୍ଧ ହୋଇ ରହିବ । ତାଙ୍କର ଅଧିକ କିଛି ପରିଚୟ ଦେବାର ଆବଶ୍ୟକତା ନାହିଁ । ପ୍ରତିଭା ପାଟିଲ ସ୍ୱାଧୀନ ଭାରତର ପ୍ରଥମ ମହିଳା ରାଷ୍ଟ୍ରପତି ଥିଲେ । ଆଜି ତାଙ୍କର ଜନ୍ମଦିନରେ ଆସନ୍ତୁ ଜାଣିବା ତାଙ୍କ ବାବଦରେ କିଛି ରୋଚକ କଥା ।
Kanak News is now on WhatsApp
Join and get latest news updates delivered to you via WhatsApp
ଟେବୁଲ ଟେନିସର ଜଣେ ସୁଦକ୍ଷ ଖେଳଳୀ ଥିବା ପ୍ରତିଭା ପାଟିଲ ଦେଶର ସର୍ବୋଚ୍ଚ ପଦବୀ ରାଷ୍ଟ୍ରପତି ପର୍ଯ୍ୟନ୍ତ ପହଂଚିପାରିଥିଲେ । ଭାରତୀୟ ମହିଳା ମାନଙ୍କ ପାଇଁ ସେ ନିଶ୍ଚିତ ଭାବେ ଏକ ପ୍ରେରଣା । ମହିଳାଙ୍କ ସଶକ୍ତିକରଣ କରିବା ଦିଗରେ ନିଜ ଜୀବନକୁ ଉତ୍ସଗ କରିଦେଇଥିବା ପ୍ରତିଭା ପାଟିଲ ମେକସିକୋରେ ସର୍ବୋଚ୍ଚ ନାଗରିକ ସମ୍ମାନରେ ସମ୍ମାନିତ ହୋଇସାରିଛନ୍ତି ।
ପ୍ରତିଭା ପାଟିଲଙ୍କ ଜନ୍ମ ମହାରାଷ୍ଟ୍ରର ଜଲଗାଓଁ ଜିଲ୍ଲାରେ ୧୯୩୪ ମସିହା ଡିସେମ୍ବର ୧୯ ତାରିଖରେ ହୋଇଥିଲା । ତାଙ୍କ ବାପାଙ୍କ ନାମ ନାରାୟଣ ରାଓ ଓ ସେ ଜଣେ ରାଜନେତା ଥିଲେ । ପ୍ରତିଭାଙ୍କ ପ୍ରାରମ୍ଭିକ ଶିକ୍ଷା ଜଲଗାଓଁରେ ହୋଇଥିଲା । ସେଠାରେ ଥିବା ମୁଲଜୀ ଜେଠା କଲେଜରୁ ସେ ଗ୍ରାଜୁଏଟ ପାସ କରିଥିଲେ । ଏହାପରେ ସେ ମୁମ୍ବାଇର ସରକାରୀ ଆଇନ କଲେଜରେ ନାମ ଲେଖାଇଥିଲେ । ସେଠାରେ ସେ ପାଠ ପଢିବା ସହ ଜଣେ ସୁଦକ୍ଷ ଟେବୁଲ ଟେନିସ ଖେଳାଳୀ ଭାବେ ବେସ୍ ସୁନାମ ଅର୍ଜନ କରିଥିଲେ ।
ପ୍ରତିଭା ପାଟିଲ କଲେଜ ଜୀବନରୁ ସମାଜ ସେବାରେ ଲାଗିପଡିଥିଲେ । ରାଜନୀତିକୁ ଆସିବା ପୂର୍ବରୁ ଜଣେ ସମାଜ ସେବିକା ଭାବେ କାର୍ଯ୍ୟ କରୁଥିଲେ । ତାଙ୍କର ନିର୍ମଳ ସ୍ୱଭାବ ପାଇଁ ସେ ନିଜ କ୍ଷେତ୍ରରେ ବେସ୍ ପରିଚିତ ଥିଲେ । ଭାରତୀୟ ମହିଳାଙ୍କ ସ୍ଥିତିର ସୁଧାର ପାଇଁ ନିଜ ଜୀବନକୁ ଉତ୍ସଗ କରିଥିଲେ । ୨୭ ବର୍ଷ ବୟସରେ ସେ ରାଜନୀତିରେ ପାଦ ରଖିଥିଲେ । ମହାରାଷ୍ଟ୍ରର ଜଲଗାଓଁ ବିଧାନସଭା ଆସନରୁ ନିର୍ବାଚନ ଲଢି ବିଜୟୀ ହୋଇଥିଲେ । ଏହାପରେ ସେ ଲଗାତର ୪ ଥର ମୁକ୍ତି ବିଧାନସଭା ଆସନରୁ କଂଗ୍ରେସ ଟିକଟରେ ନିର୍ବାଚନ ଲଢି ବିଜୟୀ ହୋଇଥିଲେ । ଏହାପରେ ୧୯୬୭-୭୨ ମଧ୍ୟରେ ସେ ମହାରାଷ୍ଟ୍ର ସରକାରରେ ଉପମୁଖ୍ୟମନ୍ତ୍ରୀ ଓ ୧୯୭୨-୭୪ ମଧ୍ୟରେ ସମାଜ କଲ୍ୟାଣ ମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ ।
କେବଳ ସେତିକି ନୁହେଁ ୧୯୮୬ ରୁ ୧୯୮୮ ମଧ୍ୟରେ ସେ ରାଜ୍ୟସଭାର ଉପସଭାପତି ବି ଥିଲେ । ୧୯୯୧ ଲୋକସଭା ନିର୍ବାଚନରେ ସେ ଅମରାବତୀ ଲୋକସଭା ଆସନରୁ ବିଜୟୀ ହୋଇଥିଲେ । ଏହାପରେ ୨୦୦୪ ରୁ ୨୦୦୭ ପର୍ଯ୍ୟନ୍ତ ସେ ରାଜସ୍ଥାନର ରାଜ୍ୟପାଳ ଭାବେ ଦାୟିତ୍ୱ ତୁଲାଇଥିଲେ । ୨୦୦୭ ରେ ୟୁପିଏ ସରକାର ପ୍ରତିଭା ଦେବୀ ସିଂ ପାଟିଲଙ୍କୁ ରାଷ୍ଟ୍ରପତି ପ୍ରାର୍ଥୀ ଭାବେ ଉପସ୍ଥାପନ କରିଥିଲେ । ତାଙ୍କ ବିରୋଧରେ ପ୍ରାର୍ଥୀ ହୋଇଥିଲେ ଭୈରବ ସିଂ ଶେଖାୱତ । ପ୍ରତିଭା ପାଟିଲ ପାଖା ପାଖି ୩ ଲକ୍ଷ ଭୋଟରେ ତାଙ୍କୁ ପରାଜିତ କରିଥିଲେ । ୨୦୦୭ ଜୁଲାଇ ୨୫ ତାରିଖରେ ପ୍ରତିଭା ଦେବୀସିଂ ପାଟିଲ ଦେଶର ପ୍ରଥମ ମହିଳା ରାଷ୍ଟ୍ରପତି ଭାବେ ପଦଭାର ସମ୍ଭାଳିଥିଲେ ।