କେମିତି ନବ ଦାସଙ୍କୁ ହତ୍ୟା କରିଥିଲା ଅଭିଯୁକ୍ତ ଗୋପାଳ? ସାମନାକୁ ଆସିଲା ହତ୍ୟାକାଣ୍ଡ ଠିକ୍ ପୂର୍ବର ଭିଡିଓ ଓ ଫଟୋ…
କନକ ବ୍ୟୁରୋ: ନବ ଦାସଙ୍କୁ କେମିତି ହତ୍ୟା କଲା ଗୋପାଳ? ତାହାର ଏକାଧିକ ଭିଡିଓ ଆପଣ ଦେଖିଥିବେ । ଭିଡ ଭିତରେ ଗୋପାଳ ନବଙ୍କ ଗାଡି ପାଖକୁ ଆସି ଅତି ନିକଟରୁ ଗୁଳି କରି ଚାଲିଯାଇଥିଲା । ହେଲେ ଗୋପାଳ ଗୁଳି କରୁଥିବାର ଏକ ଫଟୋ ଏବେ ସାମ୍ନାକୁ ଆସିଛି । ନବଙ୍କ ଠିକ୍ ସାମ୍ନାରେ ଛିଡା ହୋଇ ଦୁଇ ହାତରେ ବନ୍ଧୁକକୁ ଧରି ସିଧା ଛାତିକୁ ଗୁଳି କରୁଥିବା ସେହିି ଫଟୋରୁ ଜଣାପଡୁଛି । ସେହିପରି ସର୍ଭିସ ରିଭଲବର ବାହାର କରୁଥିବାର ଏକ ଭିଡିଓ ମଧ୍ୟ କନକ ନ୍ୟୁଜ ହାତରେ ଲାଗିଛି । ଫଟୋ ଓ ଭିଡିଓରୁ ଜଣାପଡିଛି ଗୋପାଳ ହିଁ ନବଙ୍କୁ ଗୁଳି କରିଛି । ତେବେ ହତ୍ୟାର ଉଦ୍ଦେଶ୍ୟ ଏବେ ବି ରହସ୍ୟ ହୋଇ ରହିଛି ।
Kanak News is now on WhatsApp
Join and get latest news updates delivered to you via WhatsApp
କୁହାଯାଏ ଶହ ଶହ, ହଜାର ହଜାର ଶବ୍ଦରେ ଯାହା କହି ହୁଏନି, ଗୋଟିଏ ଫଟୋ ତାକୁ ବୟାନ କରିଦିଏ । ମନ୍ତ୍ରୀ ନବ ଦାସଙ୍କୁ ଗୋପାଳ ଗୁଳି କରୁଥିବା ସମୟର ସେହି ଫଟୋକୁ ଦେଖିଲେ, ତା ମନରେ ଥିବା କଠୋର ଭାବ ବେଶ ବାରି ହୋଇପଡୁଛି । ଆଖିରେ ରହିଛି ଘୃଣା ଓ ନୃଶଂସତା । ମନ୍ତ୍ରୀ ନବ ଦାସଙ୍କ ସାମ୍ନାରେ ଆସି ଛିଡା ହୋଇଯାଇଛି ଗୋପାଳ । ଦୁଇ ହାତରେ ବନ୍ଧୁକକୁ ଏତେ ଜୋରରେ ଜାବୁଡି ଧରିଛି ଯେ, ହାତର ଶିରା ଟାଣ ହୋଇଯାଇଛି । ଲାଗୁଛି ଯେମିତି ଗୋଟିଏ ଗୁଳିରେ ମନ୍ତ୍ରୀଙ୍କୁ ମାରିଦେବାକୁ ନିଶ୍ଚିତ କରି ଆସିଛି ଗୋପାଳକୃଷ୍ଣ ଦାସ । ନବ ଦାସ ହତ୍ୟାକାଣ୍ଡର ଅନେକ ଭିଡିଓ ଆପଣ ଦେଖିଥିବେ । ଯେଉଁଠି ଭିଡ ଭିତରେ ଗୋପାଳ କେତେବେଳେ ଆସି ନବଙ୍କୁ ଗୁଳି କରି ଚାଲିଯାଉଛି ତାହା ସ୍ପଷ୍ଟ ଜଣା ପଡୁନାହିଁ । ହେଲେ ବର୍ତ୍ତମାନ ଆସିଥିବା ଫଟୋରୁ ସ୍ପଷ୍ଟ ହେଉଛି ଯେ, ଗୋପାଳର ଗୁଳିରେ ହିଁ ଟଳି ପଡିଛନ୍ତି ମନ୍ତ୍ରୀ ନବ ଦାସ । ସମର୍ଥକମାନେ ଫୁଲମାଳ ଦେଉଥିବାବେଳେ ସାମ୍ନାରେ ଓ ଅତି ପାଖରେ ଛିଡା ହୋଇ ଗୁଳି କରିଛି ଗୋପାଳ ।
ଯଦିଓ ନବ ଦାସଙ୍କୁ ଗୋପାଳ ହିଁ ଗୁଳି କରି ମାରିଥିବା କଥା ଏକାଧିକ ଭିଡିଓ ଏବଂ ଏହି ଫଟୋରୁ ସ୍ପଷ୍ଟ ହୋଇଛି । କିନ୍ତୁ ଗୋପାଳ କାହିଁକି ନବଙ୍କୁ ହତ୍ୟାକଲା ତାର କାରଣ ଖୋଜୁଛି କ୍ରାଇମବ୍ରାଞ୍ଚ । ହତ୍ୟାର ଉଦ୍ଦେଶ୍ୟ ନେଇ ଯେଉଁସବୁ ସୂଚନା ସାମ୍ନାକୁ ଆସିଛି ତାହା ଗ୍ରହଣୀୟ ହୋଇପାରୁ ନାହିଁ ।
ଗୋପାଳର ଫଟୋ ସୋସିଆଲ ମିଡିଆରେ ଭାଇରାଲ ହେଉଥିବାବେଳେ ଏକ ଭିଡିଓ କନକ ନ୍ୟୁଜ ହାତରେ ଲାଗିଛି । ଏହି ଭିଡିଓରେ ମନ୍ତ୍ରୀ ନବ ଦାସ ପହଞ୍ଚିବା କ୍ଷଣି ତାଙ୍କ କାର ଡୋର ସାମ୍ନାରେ ଆସି ଛିଡା ହୋଇଯାଉଛି ଗୋପାଳ । ଆଉ ବନ୍ଧୁକ ବାହାର କରିବାକୁ ପ୍ରସ୍ତୁତ ହେଉଛି । ତେବେ ବର୍ଦ୍ଦିରେ ଥିବା ଗୋପାଳ ନିଜ ସର୍ଭିସ ରିଭଲଭରରୁ ଗୋଟିଏ ଗୁଳି ସିଧା ନବଙ୍କ ଛାତିକୁ ଲକ୍ଷ୍ୟ କରି ମାରିଥିଲା । ଫଳରେ ଘଟଣାସ୍ଥଳରେ ହିଁ ଟଳି ପଡିଥିଲେ ମନ୍ତ୍ରୀ ନବଦାସ । ପଛକୁ ଝୁଙ୍କିପଡି ପୁଣି ଉଠିବାକୁ ଚେଷ୍ଟା କଲେ ବି ଉଠି ପାରିନଥିଲେ । ତାପରେ ସମର୍ଥକ ତାଙ୍କୁ ଉଠାଇ ନେଇଥିଲେ । ନବଙ୍କୁ ଗୁଳି କରି ଗୋପାଳ ଖସିଯିବା ବେଳେ ତାକୁ କାବୁ କରିନେଇଥିଲେ ସମର୍ଥକ ଓ ପୋଲିସ ଜିମା ଦେଇଥିଲେ । ଆଉ ସେ ଗୁଳି କରିଥିବା ବନ୍ଧୁକ ମଧ୍ୟ ଛଡାଇ ନେଇଥିଲା ପୋଲିସ ।
ଏବେ ପ୍ରଶ୍ନ ଉଠୁଛି….
- ନବ ଦାସ ହତ୍ୟାକାଣ୍ଡକୁ ୩ ସପ୍ତାହରୁ ଅଧିକ ହେଲାଣି, ଏତେ ଦିନ ପରେ ଏହି ଫଟୋ କାହିଁକି ସାମ୍ନାକୁ ଆସିଲା?
- ଭାଇରାଲ ହେଉଥିବା ଏହି ଫଟୋଟି କିଏ ଓ କେଉଁ ଉଦ୍ଦେଶ୍ୟରେ ଏବେ ସାମ୍ନାକୁ ଆଣିଲେ?
- ଗୋପାଳ ହିଁ ଏକା ହତ୍ୟା କରିଥିବା ଦର୍ଶାଇ ଏହା ପଛର ଷଡ ଯନ୍ତ୍ରକାରୀଙ୍କୁ ସୁର କ୍ଷା ଦେବାକୁ ଉଦ୍ୟମ ହେଉନାହିଁ ତ?