ଏମ୍ସର ସୁପାରିଶକୁ ସ୍ୱାସ୍ଥ୍ୟ ମନ୍ତ୍ରଣାଳୟର ମଞ୍ଜୁରୀ, ଏମ୍ସରେ ସମସ୍ତ ପରୀକ୍ଷା ଏବେ ମାଗଣା
କନକ ବ୍ୟୁରୋ : ଅଖିଳ ଭାରତୀୟ ଆର୍ୟୁବିଜ୍ଞାନ ସଂସ୍ଥାନ (ଏମ୍ସ) ରୋଗୀଙ୍କ ଚିକିତ୍ସା ନେଇ ଏକ ବଡ ନିଷ୍ପତ୍ତି ନେଇଛି । ଏବେ ୫୦୦ ଟଙ୍କାରୁ କମ ସମସ୍ତ ମେଡିକାଲ ଟେଷ୍ଟ ପାଇଁ ରୋଗୀଙ୍କ କୌଣସି ଟଙ୍କା ଦେବାକୁ ପଡିବ ନାହିଁ । ଏନେଇ କରାଯାଇଥିବା ସୁପାରିଶକୁ କେନ୍ଦ୍ର ସ୍ୱାସ୍ଥ୍ୟମନ୍ତ୍ରଣାଳୟ ମଞ୍ଜୁରୀ ପ୍ରଦାନ କରିଛନ୍ତି । ଏନେଇ ୪ ବର୍ଷ ପୂର୍ବରୁ ସୁପାରିଶ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଏହି ନିଷ୍ପତ୍ତି ପରେ ଏବେ ଏମ୍ସରେ ରକ୍ତ ପରୀକ୍ଷା ଠାରୁ ଏକ୍ସ ରେ, ସିଟି ସ୍କାନ ଭଳି ସମସ୍ତ ପରୀକ୍ଷା ମାଗଣାରେ ହୋଇପାରିବ । ପୂର୍ବରୁ ଏସବୁ ପରୀକ୍ଷା ପାଇଁ ଏମ୍ସରେ ଥିବା କାଉଣ୍ଟରେ ରୋଗୀମାନଙ୍କୁ ଟଙ୍କା ଜମା କରିବାକୁ ପଡୁଥିଲା । ସୂତ୍ର ସୂଚନା ମୁତାବକ ଏମ୍ସରେ ଦୈନିକ ୫୦୦ ଟଙ୍କାରୁ କମ ଟେଷ୍ଟ ପାଇଁ ୫୦ ହଜାର ରୁ ୮୦ ହଜାର ନମୂନା ସଂଗ୍ରହ କରାଯାଇଥାଏ । ଏବେ ଏହି ଦେୟ ମାଗଣା ହୋଇଯିବା ଦ୍ୱାରା ରୋଗୀମାନଙ୍କୁ ଅନେକ ଲାଭ ମିଳିବ । ଅନ୍ୟପଟେ ରୋଗୀଙ୍କ ଟେଷ୍ଟ ରିପୋର୍ଟ ଗୋଟିଏ ଦିନରେ ସେମାନଙ୍କୁ ଅନଲାଇନ ମାଧ୍ୟମରେ ପଠାଇ ଦିଆଯିବ ।
କହିରଖୁ କି ଏମ୍ସର ନିର୍ଦ୍ଦେଶକ ରଣଦୀପ ଗୁଲେରିଆ ୨୦୧୭ ନଭେମ୍ବର ମାସରେ ଏନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟକୁ ସୁପାରିଶ କରିଥିଲେ । ଏହି ସୁପାରିଶରେ ନିର୍ଦ୍ଦେଶକ କହିଥିଲେ କି ଏହି ପ୍ରକାର ଟେଷ୍ଟ ପାଇଁ ରୋଗୀମାନଙ୍କୁ ଅନେକ ଖର୍ଚ୍ଚାନ୍ତ ହେବାକୁ ପଡୁଛି । ତେଣୁ ରୋଗୀମାନଙ୍କୁ ଆର୍ଥିକ ସହାୟତା ପାଇଁ ଏଭଳି ଦେୟକୁ ମାଗଣା କରାଯାଉ ।
ଏହି ସୁପାରିଶ ଦୀର୍ଘଦିନ ଧରି ସ୍ୱାସ୍ଥ୍ୟ ମନ୍ତ୍ରଣାଳୟ ସମୀକ୍ଷା କରିବା ପରେ ଏଭଳି ନିଷ୍ପତ୍ତି ନେଇଛନ୍ତି । ଅନ୍ୟପଟେ କିଛିଦିନ ତଳେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମଣ୍ଡାଭିଆ ଏମ୍ସ ହସ୍ପିଟାଲ ଗସ୍ତ କରିଥିଲେ । ଏନେଇ ଏମ୍ସର ବରିଷ୍ଠ ଡାକ୍ତର ଶିବ ଚୌଧୁରୀଙ୍କୁ ନେଇ ଏକ କମିଟି ଗଠନ କରାଯାଇଥିଲା । ଏହି କମିିଟି ଏମ୍ସର ସ୍ୱାସ୍ଥ୍ୟସେବା ଓ ଏହାକୁ ଆହୁରି ସରଳ କରିବା ନେଇ ଏକ ରିପୋର୍ଟ ଦେବେ । କମିଟି ତରଫରୁ ୫୦୦ ଟଙ୍କାରୁ କମ ସମସ୍ତ ଟେଷ୍ଟ ମାଗଣାରେ ଯୋଗାଇଦେବାକୁ ସ୍ୱାସ୍ଥ୍ୟ ମନ୍ତ୍ରଣାଳୟ ନିକଟରେ ସୁପାରିଶ କରିଥିଲେ । ଏହାକୁ ଏବେ ସ୍ୱାସ୍ଥ୍ୟ ମନ୍ତ୍ରଣାଳୟ ମଞ୍ଜୁରୀ ପ୍ରଦାନ କରିଛନ୍ତି ।