କାହିଁକି ବାହା ହୋଇନାହାନ୍ତି ରତନ ଟାଟା? ଏହି ପ୍ରଶ୍ନ ପଛରେ ଲୁଚି ରହିଛି ପ୍ରେମ କାହାଣୀ ଆଉ ବାପା ମାଆଙ୍କ ପ୍ରତାରଣା
କନକ ବ୍ୟୁରୋ : କଥାରେ ଅଛି ପ୍ରତ୍ୟେକ ବ୍ୟକ୍ତିଙ୍କ ଜୀବନରେ କିଛି ନା କିଛି ଅକୁହା କଥା ରହିଥାଏ । ସେହିଭଳି ଜଣେ ବ୍ୟକ୍ତି ହେଉଛନ୍ତି ରତନ ଟାଟା । ଇଏ ଏମିତି ଜଣେ ବ୍ୟକ୍ତିତ୍ୱ ଯାହାଙ୍କୁ ସମସ୍ତେ ନିଶ୍ଚୟ ଜାଣିଥିବେ । ସଫଳତାର ଉଦାହରଣ ଦେବାକୁ ହେଲେ ପ୍ରଥମେ ରତନ ଟାଟାଙ୍କ ନାଁ ଆସେ । ଜୀବନରେ ଅନେକ ସଫଳତା ହାସଲ କରିଥିଲେ ବି ରତନ ଟାଟାଙ୍କ ଜୀବନରେ କିଛି ଅକୁହା କଥା ରହିଯାଇଛି । ଜାଣିଛନ୍ତି କି, ରତନ ଟାଟା ୮୪ ବର୍ଷରେ ପାଦ ଥାପିଥିବା ବେଳେ ସେ ଆଜି ଯାଏଁ କାହିଁ ବିବାହ କରିନାହାନ୍ତି ? ଏହି ପ୍ରଶ୍ନ ପଛରେ ଲୁଚି ରହିଛି ପ୍ରେମ କାହାଣୀ…
ବିଶିଷ୍ଟ ବିଜନେସମ୍ୟାନ୍ ରତନ ଟାଟାଙ୍କ ଜନ୍ମ ଡିସେମ୍ବର ମାସ ୨୮ ତାରିଖ ୧୯୩୭ରେ ହୋଇଥିଲା । ଟାଟା ଗ୍ରୁଫର ପୂର୍ବତ୍ତନ ଚେୟାରମ୍ୟାନ୍ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରପାରିଛନ୍ତି । ବିଜନେସରେ ରତନ ଟାଟା ସଫଳତାର ଶୀର୍ଷ ଛୁଇଁଛନ୍ତି ସତ କିନ୍ତୁ ପ୍ରେମ ମାମଲାରେ ରତନ ଟାଟା ସମ୍ପୁର୍ଣ୍ଣ ବିଫଳ ହୋଇଛନ୍ତି । ଏକ ଟିଭି ଇଣ୍ଟରବ୍ୟୁରେ ଉଦ୍ୟୋଗପତି ରତନ ଟାଟା ତାଙ୍କର ଲଭ୍ ଷ୍ଟୋରିକୁ ନେଇ ଅନେକ ଖୁଲାସା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସାକ୍ଷାତକାରରେ ରତନ ଟାଟା କହିଛନ୍ତି, ମୋର ଜଣଙ୍କ ସହ ପ୍ରେମ ହୋଇଥିଲା କିନ୍ତୁ ପ୍ରେମକୁ ମୁଁ ବିବାହ ପର୍ଯ୍ୟନ୍ତ ପହଞ୍ଚାଇପାରିଲିନି । ଯେତେବେଳେ ମୁଁ ଆମେରିକାରେ ଥିଲି ସେତେବେଳେ ପ୍ରେମ ସମ୍ପର୍କକୁ ନେଇ ଅତ୍ୟଧିକ ସିରିୟସ୍ ହୋଇଯାଇଥିଲି । କିନ୍ତୁ ପରେ ମୋତେ ଆମେରିକା ଛାଡି ଭାରତ ଆସିବାକୁ ପଡିଲା । କିନ୍ତୁ ମୋ ପ୍ରେମିକା ଭାରତ ଆସିବାକୁ ଚାହୁଁନଥିଲା । ଶେଷରେ ମୋ ପ୍ରେମିକା ଆମେରିକାରେ ଜଣେ ବ୍ୟକ୍ତିଙ୍କ ସହ ବିବାହ କରିନେଇଥିଲେ । ଏଥିପାଇଁ ମୁଁ ବିବାହ କରିପାରିନଥିଲି । ଏହାପରେ ମୁଁ ବିବାହକୁ ନେଇ ୪ଥର ସିରିୟସ୍ ହୋଇଛି କିନ୍ତୁ କୌଣସି ନା କୌଣସି କାରଣ ପାଇଁ ପଛକୁ ହଟିଆସିଛି । ଆଉ ଏବେ ଯେତେବେଳେ ମୁଁ ପୂର୍ବକଥା ଭାବେ ମତେ ଲାଗେ ମୁଁ ଯାହା ନିଷ୍ପତି ନେଇଛି ତାହା ଠିକ୍ ଥିଲା । ମୁଁ ବାହା ହୋଇଥିଲେ ଆଜି ସ୍ଥିତି କିଛି ଅଲଗା ଥାନ୍ତା । ରତନ ଟାଟା ତାଙ୍କ ଜୀବନର ଆଉ ଏକ ଅକୁହା କଥା ଟିଭି ସାକ୍ଷାତକାରରେ ସେୟାର କରିଥିଲେ, ଯେତେବେଳେ ସେ ୭ବର୍ଷର ଥିଲେ ସେତେବେଳେ ତାଙ୍କ ବାପା ମାଆ ଅଲଗା ହୋଇଯାଇଥିଲେ । ପିଲାଟି ଦିନରୁ ରତନ ଟାଟା ବାପା ମାଆଙ୍କ ସ୍ନେହ ବିନା ବଞ୍ଚି ଆସିଛନ୍ତି । ତାଙ୍କ ଜେଜେ ମାଆ ତାଙ୍କର ଲାଳନପାଳନ କରିଥିଲେ । ତାଙ୍କ ଜେଜେ ମାଆ ହିଁ ତାଙ୍କ ପାଇଁ ସବୁକିଛି ଥିଲେ ବୋଲି ସେ ସାକ୍ଷାତକାରରେ କହିଛନ୍ତି ।