ଗୋବିନ୍ଦଙ୍କ ମୃତ୍ୟୁକୁ ନେଇ ତେଜିଲା ରାଜନୀତି । ସିବିଆଇ ତଦନ୍ତ ଦାବି କଲେ ଧର୍ମେନ୍ଦ୍ର । ଜବାବ ରଖିଲା ଶାସକ ବିଜେଡି…
କନକ ବ୍ୟୁରୋ: ସାରା ରାଜ୍ୟରେ ଚହଳ ପକାଇଥିବା ଗୋବିନ୍ଦ ସାହୁ ଆତ୍ମହତ୍ୟା ଘଟଣାର ତଦନ୍ତକୁ ନେଇ ରାଜ୍ୟ ବିଜେପି ନେତାଙ୍କ ସ୍ୱର ସହ ସ୍ୱର ମିଳାଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଗୋବିନ୍ଦ ସାହୁ ଆତ୍ମହତ୍ୟା ମାମଲାରେ ସିବିଆଇ ତଦନ୍ତ ଦାବି କରିଛନ୍ତି । କହିଛନ୍ତି, ଯେଉଁମାନଙ୍କ ପାଖରେ ଆଇନଶୃଙ୍ଖଳା ବିଭାଗ ଅଛି, ସେମାନଙ୍କୁ ଉତ୍ତର ଦେବାକୁ ପଡିବ । ଗୋବିନ୍ଦ ସାହୁ ମୃତ୍ୟୁର ଅନୁସନ୍ଧାନ ନ୍ୟାୟ ସଙ୍ଗତ ହେବା ଉଚିତ୍ । ରାଜ୍ୟ ସରକାର ନିଜର ନିରପେକ୍ଷତା ଏବଂ ସ୍ୱଛତା ପ୍ରମାଣ ପାଇଁ ନିରପେକ୍ଷ ତଦନ୍ତ କରନ୍ତୁ ।
Kanak News is now on WhatsApp
Join and get latest news updates delivered to you via WhatsApp
ବିଜେପି ଭଳି କଂଗ୍ରେସ ବି ଗୋବିନ୍ଦ ସାହୁ ଆତ୍ମହତ୍ୟା ଏକ ଯୋଜନା ବଦ୍ଧ ହତ୍ୟାକାଣ୍ଡ ବୋଲି ଦାବି କରିଛି । ଏହା ଏକ ସମ୍ବେଦନଶୀଳ ମାମଲା ହୋଇଥିବାରୁ ହାଇକୋର୍ଟ ମନିଟର୍ସ ଏସଆଇଟି ଦ୍ୱାରା ତଦନ୍ତ କରିବାକୁ ଦାବି କରିଛି କଂଗ୍ରେସ । ଏନେଇ କଂଗ୍ରେସର ୫ଜଣିଆ ପ୍ରତିନିଧି ଦଳ ରାଜ୍ୟପାଳଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି । କହିଛନ୍ତି, ଗୋବିନ୍ଦ ସାହୁ ଆତ୍ମହତ୍ୟା କରି ନାହାଁନ୍ତି ବରଂ ତାଙ୍କୁ ମାରି ଦିଆଯାଇଛି । ସେଥିପାଇଁ ତାଙ୍କ ମୃତ୍ୟୁର ଉଚ୍ଚସ୍ତରୀୟ ତଦନ୍ତ ହେବା ଉଚିତ୍ । କୋର୍ଟଙ୍କ ନୀରିକ୍ଷଣରେ ଏସଆଇଟି ଟିମ୍ ଗୋବିନ୍ଦ ସାହୁ ମୃତ୍ୟୁର ତଦନ୍ତ କରନ୍ତୁ ।
ଗୋବିନ୍ଦ ସାହୁଙ୍କ ମୃତ୍ୟୁକୁ ନେଇ ବିରୋଧୀ ସନ୍ଦେହ ପ୍ରକାଶ କରୁଥିବାବେଳେ, ଆତ୍ମହତ୍ୟା ନୁହେଁ ହତ୍ୟା ବୋଲି ଅଭିଯୋଗ କରୁଥିବାବେଳେ, ଜବାବ ରଖିଛି ବିଜେଡି । ବରିଷ୍ଠ ବିଜେଡି ନେତା ଅମର ଶତପଥୀ କହିଛନ୍ତି, ଅସ୍ତିତ୍ୱ ବଞ୍ଚାଇବାକୁ ପ୍ରହେଳିକା କରୁଛନ୍ତି ବିରୋଧୀ । ସିବିଆଇ ଓ କ୍ରାଇମବ୍ରାଞ୍ଚ ତଦନ୍ତକାରୀ ସଂସ୍ଥା । ତାଙ୍କ କାର୍ଯ୍ୟ ପରିସର ଅନୁସାରେ ତଦନ୍ତ କରାଯିବ । ତାକୁ ନେଇ ବିବାଦ କରାଯିବା ଠିକ୍ ନୁହେଁ ।
ଗୋବିନ୍ଦଙ୍କ ମୃତ୍ୟୁକୁ ନେଇ ରାଜନୈତିକ ବୟାନବାଜି ଭିତରେ, କ୍ରାଇମବ୍ରାଞ୍ଚର ସାଇଣ୍ଟିଫିକ୍ ଟିମ୍ କଣ୍ଟାବାଞ୍ଝି ଥାନାରେ ପହଁଚି ତାଙ୍କ ହାତ ଲେଖା ଚିଠି, ସେ ଖାଉଥିବା ମେଡିସିନ୍ ଓ ଅନ୍ୟାନ୍ୟ ପ୍ରମାଣପତ୍ର ଜବତ କରିଛି । ଏଥିସହ ଜେଲରେ ଲାଗିଥିବା ୧୬ନମ୍ବର ସିସିଟିଭି ଫୁଟେଜ୍ ଦେବାକୁ କର୍ତ୍ତୁପକ୍ଷଙ୍କୁ କ୍ରାଇମବ୍ରାଞ୍ଚ କହିଛି । ତେବେ ଏସବୁ ଡକ୍ୟୁମେଣ୍ଟର ଯାଞ୍ଚ ପରେ କଣ ବାହାରୁଛି ତାହା ପରେ ସ୍ପଷ୍ଟ ହେବ ।