କନକ ବ୍ୟୁରୋ : କଳିଙ୍ଗ ଷ୍ଟାଡିୟମରେ ଚାଲିଥିବା ଏଫଆଇଏଚ୍ କନିଷ୍ଠ ପୁରୁଷ ହକି ବିଶ୍ୱକପ ଅବସରରେ ଶୁକ୍ରବାର ପ୍ରଥମ କରୋନା ପଜିଟିଭ୍ ଚିହ୍ନଟ ହୋଇଛି। ପଜିଟିଭ୍ ଚିହ୍ନଟ ହୋଇଥିବା ବ୍ୟକ୍ତିଜଣକ ଓଡ଼ିଶା ରାଜ୍ୟ କ୍ରୀଡ଼ା ଓ ଯୁବସେବା ବିଭାଗର ସାମାଜିକ ଗଣମାଧ୍ୟମରେ କାର୍ଯ୍ୟରତ ଜଣେ କର୍ମଚାରୀ ବୋଲି ବିଶେଷ ସୂତ୍ରରୁ ସୂଚନା ମିଳିଛି। ମିଡିଆ ସେଣ୍ଟରରୁ ବ୍ୟକ୍ତି ଜଣକ ରହି ବିଭାଗର ସାମାଜିକ ଗଣମାଧ୍ୟମରେ ମ୍ୟାଚ୍ ଖବର ଅପ୍ଡେଟ୍ କରୁଥିଲେ। ତେଣୁ ଶୁକ୍ରବାର ମିଡିଆ ସେଣ୍ଟରରେ ବସୁଥିବା ଏହି ବ୍ୟକ୍ତିଙ୍କ କରୋନା ପଜିଟିଭ୍ ଥିବା ଖବର ଜଣାପଡ଼ିବା ପରେ ଏଠାରେ କାର୍ଯ୍ୟ କରୁଥିବା ଅନ୍ୟ ସାମ୍ବାଦିକଙ୍କ ମନରେ ଭୟର ବତାବରଣ ସୃଷ୍ଟି ହୋଇଛି।
Kanak News is now on WhatsApp
Join and get latest news updates delivered to you via WhatsApp
ଜୈବବଳୟ ମଧ୍ୟରେ ଆୟୋଜିତ ଏହି ପ୍ରତିଯୋଗିତାର ଖବର ସଂଗ୍ରହ କରୁଥିବା ସାମ୍ବାଦିକମାନଙ୍କର ପ୍ରତି ୪୮ ଘଣ୍ଟା ବ୍ୟବଧାନରେ ଆର୍ଟି-ପିସିଆର୍ ପରୀକ୍ଷା କରାଯାଉଛି। ଏହି ପରୀକ୍ଷାରୁ ହିଁ ବ୍ୟକ୍ତି ଜଣଙ୍କର ପଜିଟିଭ୍ ଥିବା ସ୍ପଷ୍ଟ ହୋଇଥିଲା। କରୋନାକୁ ନେଇ ସରକାର ସବୁଆଡ଼େ କଟକଣା ଲଗାଉଥିଲା ବେଳେ ଏଠାରେ ସେମିତି କଟକଣା ଥିବା ଜଣାପଡ଼ୁନି। ବିନା ଦର୍ଶକରେ ପ୍ରତିଯୋଗିତା ଆୟୋଜିତ ହେବ ବୋଲି ଘୋଷଣା ହୋଇଥିଲା। କିନ୍ତୁ ଦର୍ଶକ ଗ୍ୟାଲେରିରେ ଭିଡ଼ ଦେଖାଯାଉଛି।
ଏଥିପାଇଁ କରୋନା ପଜିଟିଭ୍ ଆସିଥିବା ଆଲୋଚନା ହେଉଛି। ପଜିଟିଭ୍ ବାହାରିବା ପରେ ସାମ୍ବାଦିକମାନଙ୍କ ଆର୍ଟି-ପିସିଆର୍ ପରୀକ୍ଷା ବାଧ୍ୟତାମୂଳକ କରିଦିଆଯାଇଛି। ଯେଉଁମାନେ ପରୀକ୍ଷା କରିବେ ନାହିଁ ସେମାନଙ୍କୁ ମିଡିଆ ସେଣ୍ଟର ମଧ୍ୟକୁ ପ୍ରବେଶ ଅନୁମତି ମିଳିବନି ବୋଲି କ୍ରୀଡ଼ା ବିଭାଗ ପକ୍ଷରୁ କୁହାଯାଇଛି। ମିଡିଆ ସେଣ୍ଟରକୁ ସାନିଟାଇଜ୍ କରାଯାଉଛି। ସୂଚନାଯୋଗ୍ୟ ନଭେମ୍ବର ୨୫ ତାରିଖରୁ ଆରମ୍ଭ ହୋଇଥିବା ଏହି ପ୍ରତିଯୋଗିତା ରବିବାର ଶେଷ ହେବ।