ନିର୍ବାଚନ ମଇଦାନରେ ପୁଅ । ସାରଥୀ ସାଜିଛନ୍ତି ବାପା
କନକ ବ୍ୟୁରୋ : ପୁଅଙ୍କ ପାଇଁ ବାପା ସାଜିଛନ୍ତି ସାରଥୀ । ୨୪ ନିର୍ବାଚନରେ ଲଢ଼େଇ କରୁଛନ୍ତି ପୁଅ, କିନ୍ତୁ ଗୋଟି ଚଳାଉଛନ୍ତି ବାପା । ନିର୍ବାଚନୀ ମଇଦାନର ଏଭଳି କିଛି ରୋଚକ ଚିତ୍ର କଏଦ କ୍ୟାମେରାରେ ହୋଇଛି । ଓଡ଼ିଶା ରାଜନୀତିର ବଡ଼ ବଡ଼ ଚେହେରା ଏବେ ପ୍ରାର୍ଥୀ ହୋଇଥିବା ପୁଅଙ୍କ ପାଇଁ ରାଲି କରୁଛନ୍ତି, ସଭା କରୁଛନ୍ତି ।
ମାହାଙ୍ଗା
ମାହାଙ୍ଗା ନିର୍ବାଚନୀ ମଣ୍ଡଳୀ ପାଇଁ ବିଜେଡି ପ୍ରାର୍ଥୀ ହୋଇଥିବା, ପୁଅ ଅଙ୍କିତ ଜେନାଙ୍କ ପାଇଁ ପ୍ରଚାର କରୁଛନ୍ତି ବାପା ପ୍ରତାପ ଜେନା । ଆଗେ ଆଗେ ବାପା, ଆଉ ପଛେ ପଛେ ପୁଅ । ଏଥର ପ୍ରତାପ ଜେନାଙ୍କ ବଦଳରେ ପୁଅ, ଅଙ୍କିତଙ୍କୁ ପ୍ରାର୍ଥୀ କରିଛି ଦଳ । ଆଉ ପୁଅକୁ ନିର୍ବାଚନୀ ବୈତରଣୀ ପାର କରିବା ପାଇଁ ନିଜେ କାତ ଧରି ଆହୁଲା ମାରୁଛନ୍ତି ବାପା ।
Kanak News is now on WhatsApp
Join and get latest news updates delivered to you via WhatsApp
ପାଟକୁରା
ରାଜନୀତିରେ ବେଳେବେଳେ ଏଭଳି ଦୃଶ୍ୟ ଦେଖିବାକୁ ମିଳେ, ଯାହା ହୁଏତ କେବେ ଦେଖିବାକୁ ମିଳିବ, ତାହା କଳ୍ପନା ବାହାରେ ଥାଏ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଇଥିବା ପ୍ରାର୍ଥୀଙ୍କ ପାଇଁ ପ୍ରଚାର କରୁଛନ୍ତି ବିଜୟ ମହାପାତ୍ର । ଅବଶ୍ୟ ପ୍ରାର୍ଥୀ ଅଛନ୍ତି ତାଙ୍କ ପୁଅ ଅରବିନ୍ଦ ମହାପାତ୍ର । ପାଟକୁରାରେ ବିଜୟ ମହାପାତ୍ର, ପୁଅ ଅରବିନ୍ଦ ମହାପାତ୍ରଙ୍କ ପାଇଁ ପ୍ରଚାର କରିଛନ୍ତି ।
ନୂଆପଡ଼ା
ନୂଆପଡ଼ାରେ ବି ପୁଅଙ୍କ ପାଇଁ ପ୍ରଚାର କରୁଛନ୍ତି ବାପା । କଳାହାଣ୍ଡି ସାଂସଦ ବସନ୍ତ ପଣ୍ଡାଙ୍କ ପୁଅ, ଅଭିନନ୍ଦନ ପଣ୍ଡାଙ୍କ ପାଇଁ କେଉଁଠି ରାଲି କରୁଛନ୍ତି ତ କେଉଁଠି ସଭା କରୁଛନ୍ତି । ବସନ୍ତ ପଣ୍ଡାଙ୍କୁ ଏଥର ବିଜେପି ଟିକେଟ୍ ଦେଇନି । ତାଙ୍କ ବଦଳରେ ପୁଅଙ୍କୁ ବିଧାନସଭା ପ୍ରାର୍ଥୀ କରିଛି ଦଳ । ଆଉ ପୁଅକୁ ଜିତାଇବା ପାଇଁ ଭରପୁର ପ୍ରୟାସ କରୁଛନ୍ତି ବସନ୍ତ ।
ବଲାଙ୍ଗୀର
ବଲାଙ୍ଗୀରରେ ବି ବାପା-ପୁଅଙ୍କୁ ଏକାଠି ପ୍ରଚାର ମୈଦାନରେ ଦେଖିବାକୁ ମିଳିଛି । ବଲାଙ୍ଗୀର ବିଧାୟକ ନରସିଂହ ମିଶ୍ର, ପୁଅ ସମରେନ୍ଦ୍ର ମିଶ୍ରଙ୍କ ପାଇଁ ପ୍ରଚାର କରିଛନ୍ତି । ଗତଥର ଲୋକସଭା ଆସନ ପାଇଁ ଲଢ଼ିଥିବା ସମରେନ୍ଦ୍ର, ଏଥର ବିଧାନସଭା ଲଢ଼େଇକୁ ଓହ୍ଲାଇଛନ୍ତି । ଆଉ ପୁଅଙ୍କ ପାଖେ ପାଖେ ରହି ରଣନୀତି କରୁଛନ୍ତି ବାପା ନରସିଂହ ।
ଏହି ୪ ରାଜନେତା ଓଡ଼ିଶା ରାଜନୀତିର ପୋଖତ୍ ଖେଳୁଆଡ଼ । ରାଜନୀତିରେ ବଡ଼ ବଡ଼ ଇନିଂସ ଖେଳିଥିବା ଏହି ୪ ନେତା ଏବେ ପୁଅଙ୍କ ପାଇଁ ଅଗ୍ନି ପରୀକ୍ଷା ଦେଉଛନ୍ତି । ପୁଅଙ୍କ କ୍ୟାରିୟର ସଜାଡ଼ିବାରେ ଏହି ନେତାମାନେ କେତେ ସଫଳ ହେଉଛନ୍ତି, ତାହା ନିର୍ବାଚନ ଫଳାଫଳ ହିଁ ସ୍ପଷ୍ଟ କରିବ ।