କନକ ବ୍ୟୁରୋ: ପାଟଣାଗଡ ନିର୍ବାଚନ ମଣ୍ଡଳୀରେ ବିଜେପିର ପଞ୍ଚାୟତ ନିର୍ବାଚନ ପ୍ରଚାର ମଙ୍ଗ ଧରିଛନ୍ତି ପୂର୍ବତନ ମନ୍ତ୍ରୀ କେ.ଭି. ସିଂଦେଓ । ଦଳୀୟ ପ୍ରାର୍ଥୀଙ୍କ ସମର୍ଥନରେ ଭୋଟ ମାଗିବା ବେଳେ ଖେଳିଛନ୍ତି ଦିଲ୍ଲୀ କାର୍ଡ । ମୋଦୀ ସରକାରଙ୍କ ଲୋକାଭିମୁଖୀ ଯୋଜନାକୁ ନେଇ ଆଦିବାସୀ ଭୋଟରଙ୍କ ମନ ଜିଣିବାକୁ ଚେଷ୍ଟା କରୁଛନ୍ତି କେଭି । ସବୁଠାରୁ ବଡ କଥା ହେଉଛି ଗରୀବଙ୍କ ପାଇଁ ମୋଦି ପଠାଉଥିବା ଟଙ୍କାକୁ ବ୍ୟବହାର କରି ରାଜ୍ୟ ସରକାର ବାହାବାଃ ନେଉଥିବା ଅଭିଯୋଗ କରି ଶାସକ ବିଜେଡିକୁ ଟାର୍ଗେଟ କରିଛନ୍ତି । ଏହାସହ ରାଜ୍ୟ ସରକାରଙ୍କ ଯୋଜନା କେବଳ ପ୍ରଚାର ସର୍ବସ୍ୱ ବୋଲି କହିଛନ୍ତି ପାଟଣାଗଡ ମହାରାଜ କନକ ବର୍ଦ୍ଧନ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ପାଟଣାଗଡରେ ପାଞ୍ଚ ପାଞ୍ଚ ଥର ବିଧାୟକ ରହିଥିବା କେଭିଙ୍କୁ ୨୦୧୯ ସାଧାରଣ ନିର୍ବାଚନରେ ପରାଜୟର ସ୍ୱାଦ ଚଖାଇଥିବା ବିଜେଡିର ଯୁବ ବିଧାୟକ ସରୋଜ ମେହେର ମଧ୍ୟ ଦଳ ପାଇଁ କରିଛନ୍ତି ଜୋରଦାର ପ୍ରଚାର । ତେବେ କେଭିଙ୍କ ଅଭିଯୋଗ ଉପରେ ସିଧାସଳଖ ମୁହଁ ଖୋଲି ନାହାନ୍ତି ସରୋଜ । ହେଲେ କେଭିଙ୍କ ଅମଳରେ ଅଞ୍ଚଳର ଉନ୍ନତି ହୋଇନଥିବାରୁ ଲୋକେ ତାଙ୍କ ଉପରେ ଆସ୍ଥା ପ୍ରକଟ କରିଥିବା କହି ତେରେଛା ବାଣ ମାରିଛନ୍ତି ।
ଗତ ୨୦୧୯ ସାଧାରଣ ନିର୍ବାଚନକୁ ଦେଖିଲେ, ବଲାଙ୍ଗୀର ଜିଲ୍ଲାରେ ତିନି ପ୍ରମୁଖ ରାଜନୈତିକ ଦଳର ସମାନ ପତିଆରା ରହିଛି । ତେଣୁ ସବୁ ଦଳର ନେତା ଆସନ୍ତା ପଞ୍ଚାୟତ ନିର୍ବାଚନରେ ବିଜୟ ମୁକୁଟ ପିନ୍ଧିବା ନେଇ ଦମ୍ଭୋକ୍ତି ରଖୁଛନ୍ତି । ଏବେ ବଲାଙ୍ଗୀର ବାସୀ କାହା ମୁଣ୍ଡରେ ସୁନା କଳସ ଢାଳୁଛନ୍ତି ଫଳାଫଳ ପରେ ଜଣାପଡିବ ।