ଏପ୍ରିଲ ୧୯ ପ୍ରଥମ ପର୍ଯ୍ୟାୟ ଲୋକସଭା ନିର୍ବାଚନ ପାଇଁ ଆରମ୍ଭ ହେଲା ନାମାଙ୍କନ ପ୍ରକ୍ରିୟା । ମାର୍ଚ୍ଚ ୨୭ ତାରିଖ ସୁଦ୍ଧା ନାମାଙ୍କନ ୩୦ ସୁଦ୍ଧା ପ୍ରାର୍ଥୀପତ୍ର ପ୍ରତ୍ୟାହାରର ଶେଷ ସମୟ
କନକ ବ୍ୟୁରୋ : ଏପ୍ରିଲ ୧୯ ତାରିଖରେ ହେବାକୁ ଥିବା ପ୍ରଥମ ପର୍ଯ୍ୟାୟ ଲୋକସଭା ନିର୍ବାଚନ ପାଇଁ ବୁଧବାର ନାମାଙ୍କନ ପ୍ରକ୍ରିୟା ଆରମ୍ଭ ହୋଇଛି । ୧୭ ରାଜ୍ୟ ଓ ୪ କେନ୍ଦ୍ର ଶାସିତ ଅଂଚଳର ୧୦୨ ଆସନ ପାଇଁ ନାମାଙ୍କନ ଦାଖଲ, ପ୍ରତ୍ୟାହାର, ପ୍ରାର୍ଥୀପତ୍ର ଯାଂଚ ନେଇ ସମ୍ପୂର୍ଣ୍ଣ ବିଜ୍ଞପ୍ତି ଜାରି କରିଛନ୍ତି ନିର୍ବାଚନ କମିଶନ । ମାର୍ଚ୍ଚ ୨୭ ତାରିଖ ସୁଦ୍ଧା ନାମାଙ୍କନ ଦାଖଲ ଏବଂ ମାର୍ଚ୍ଚ ୩୦ ସୁଦ୍ଧା ପ୍ରାର୍ଥୀପତ୍ର ପ୍ରତ୍ୟାହାର ପାଇଁ ଶେଷ ସମୟ ଧାର୍ଯ୍ୟ କରାଯାଇଛି । ରାଜ୍ୟରେ ଉତ୍ସବ ଯୋଗୁ ବିହାରରେ ନାମାଙ୍କନ ଦାଖଲ ଓ ପ୍ରତ୍ୟାହାର ସମୟ ଅନ୍ୟ ରାଜ୍ୟଠୁ ଦୁଇ ଦିନ ଅଧିକ ରହିଛି । ପ୍ରଥମ ପର୍ଯ୍ୟାୟରେ ତାମିଲନାଡୁରେ ସର୍ବାଧିକ ୩୯ ଆସନ, ରାଜସ୍ଥାନର ୧୨, ଉତ୍ତରପ୍ରଦେଶର ୮, ମଧ୍ୟପ୍ରଦେଶର ୬, ଉତ୍ତରାଖଣ୍ଡ, ଆସାମ, ମହାରାଷ୍ଟ୍ରରେ ୫ ଟି ଲେଖାଏଁ ଆସନ, ବିହାରର ୪, ପଶ୍ଚିମବଙ୍ଗରେ ୩ ଟି ଆସନ ପାଇଁ ଭୋଟିଂ ହେବ ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ପର୍ଯ୍ୟାୟରେ ହେବାକୁ ଥିବା ଲୋକସଭା ନିର୍ବାଚନରେ ମୋଟ ଆସନ ମଧ୍ୟରୁ କେବଳ ତାମିଲନାଡୁ ଏବଂ ରାଜସ୍ଥାନରେ ୫୧ ଟି ଆସନରେ ଭୋଟିଂ ହେବ । ୨୦୧୯ ଲୋକସଭା ନିର୍ବାଚନରେ ତାମିଲନାଡୁରେ ଖାତା ଖୋଲିପାରିନଥିବା ବିଜେପି ଏଥର ଆଂଚଳିକ ଦଳ ପିଏମକେ ସହ ମେଂଟ କରି କିଛି ଆସନ ଜିତିବ ବୋଲି ଆଶା ରଖିଛି । କିନ୍ତୁ ରାଜସ୍ଥାନରେ ଉଭୟ ବିଜେପି ଏବଂ କଂଗ୍ରେସ ମଧ୍ୟରେ କଡା ଟକ୍କର ଦେଖିବାକୁ ମିଳିବ ବୋଲି କୁହାଯାଉଛି । ଗତ ବର୍ଷ ବିଧାନସଭା ନିର୍ବାଚନରେ କଂଗ୍ରେସକୁ ହଟାଇ ରାଜସ୍ଥାନରେ ସରକାର ଗଢିଥିଲା ବିଜେପି । କିନ୍ତୁ ଲୋକସଭା ନିର୍ବାଚନରେ ଦୁଇ ଦଳ ଭଲ ପ୍ରଦର୍ଶନ କରିବାକୁ ଆଶା ରଖିଛନ୍ତି ।
ଏପ୍ରିଲ ୧୯ରୁ ଜୁନ୍ ୧ ମଧ୍ୟରେ ୭ ଟି ପର୍ଯ୍ୟାୟରେ ଦେଶରେ ଲୋକସଭା ନିର୍ବାଚନ ହେବାକୁ ଥବା ବେଳେ ଜୁନ ୪ ତାରିଖରେ ଫଳାଫଳ ପ୍ରକାଶ ପାଇବ ।