କନକ ବ୍ୟୁରୋ : ମହାରାଷ୍ଟ୍ର ମହାବିକାଶ ଅଗାଡି ସରକାର ଏବେ ଅଡୁଆରେ ପଡିଛି । ଶିବସେନା ବିଧାୟକ ଦଳ ନେତା ତଥା କ୍ୟାବିନେଟ ମନ୍ତ୍ରୀ ଏକନାଥ ସିନ୍ଦେ ଏବେ ଦଳ ଭିତରେ ରହି ବିଦ୍ରୋହ କରିଛନ୍ତି । ସେ କିଛି ବିଧାୟକଙ୍କୁ ନେଇ ଏବେ ସୁରଟର ଏକ ହୋଟେଲରେ ଥିବା କଥା ଗଣମାଧ୍ୟମରେ ଚର୍ଚ୍ଚା ହେଉଛି । ଏହିକ୍ରମରେ ଶିବସେନା ବିଧାୟକ ମିଲିନ୍ଦ ନାବେକର ସୁରଟ ପହଂଚି ସିନ୍ଦେଙ୍କ ସହ ଉଦ୍ଧବ ଠାକରେଙ୍କୁ ଫୋନରେ କଥା କରାଇଛନ୍ତି । ଉଭୟଙ୍କ ମଧ୍ୟରେ ୨୦ ମିନିଟ ଧରି କଥାବାର୍ତ୍ତା ହୋଇଥିବା କଥା କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଫୋନ ଯୋଗେ କଥାବାର୍ତ୍ତା ବେଳେ ସିନ୍ଦେ ଦାବି କରିଛନ୍ତି କି ତାଙ୍କ ସମର୍ଥନରେ ଏବେ ୩୫ ଜଣ ବିଧାୟକ ରହିଛନ୍ତି । ଏହାସହ ସେ ମୁଖ୍ୟମନ୍ତ୍ରୀଙ୍କ ପାଖରେ ସର୍ତ୍ତ ରଖିଛନ୍ତି କି ଯଦି ଶିବସେନା ବିଜେପି ସହ ମେଣ୍ଟ କରି ସରକାର ଗଠନ କରିବ ତେବେ ଦଳ ଭାଙ୍ଗିବ ନାହିଁ । ଏହାସହ ସେ ନିଜେ ମୁଖ୍ୟମନ୍ତ୍ରୀ ପଦ ପାଇଁ ଆଶାୟୀ ଥିବା କଥାକୁ ଖଣ୍ଡନ କରିଛନ୍ତି ।
ସେପଟେ ଏକନାଥଙ୍କର ଏଭଳି ପ୍ରସ୍ତାବକୁ ଅଗ୍ରାହ୍ୟ କରିଦେଇଛନ୍ତି ମୁଖ୍ୟମନ୍ତ୍ରୀ ଉଦ୍ଧବ ଠାକରେ । ସେ କହିଛନ୍ତି କି, କୌଣସି ପରିସ୍ଥିତିରେ ବିଜେପି ସହ ମେଣ୍ଟରେ ସରକାର ଗଠନ କରିବା ସମ୍ଭବ ନୁହେଁ । ଅନ୍ୟପଟେ ମହାବିକାଶ ଅଗାଡି ମେଣ୍ଟରେ ଥିବା କଂଗ୍ରେସ ଶିବସେନାକୁ ବଳ ଯୋଗାଇଛି । କଂଗ୍ରେସ କହିଛି କି ମହାରାଷ୍ଟ୍ର ସରକାରଙ୍କ ଉପରେ କୌଣସି ବିପଦ ନାହିଁ । ମହାରାଷ୍ଟ୍ର କଂଗ୍ରେସ ପ୍ରଭାରୀ ଏଚକେ ପାଟିଲ କହିଛନ୍ତି କି ସାରା ଦେଶରେ ବିଜେପି ‘ଅପରେଶନ ଲୋଟସ’ ଜାରି ରଖିଛି । ହେଲେ ମହାରାଷ୍ଟ୍ର ସରକାରକୁ ସମର୍ଥନ ଦେଉଥିବା ଦଳ ଓ ବିଧାୟକମାନେ ବିଜେପି ଜାଲରେ ପଡିବେ ନାହିଁ ବୋଲି ସେ ଆଶାପ୍ରକଟ କରିଛନ୍ତି ।