ପୁଣି ଫେରିବ କି ଲକଡାଉନ୍ ? ଆଶଙ୍କା ବଢୁଥିବା ବେଳେ ବିଶିଷ୍ଟ ଡାକ୍ତର ଦେବୀ ସେଟ୍ଟୀଙ୍କ ବଡ଼ ବୟାନ । କହିଲେ, ଦେଶରେ ଆବଶ୍ୟକ ନାହିଁ ଲକଡାଉନ୍ ।
କନକ ବ୍ୟୁରୋ: ଦେଶରେ ବଢ଼ୁଥିବା କରୋନା ସଂକ୍ରମଣ ପୁଣି ଥରେ ଲୋକଙ୍କୁ ଭୟ ଭିତରକୁ ଠେଲି ଦେଇଛି । ଦେଶର ବିଭିନ୍ନ ରାଜ୍ୟ ସରକାର କେତେକ ପ୍ରମୁଖ ସହରରେ ପୁଣି ଥରେ ତାଲାବନ୍ଦ ଲାଗୁ କରିଛନ୍ତି । ଜରୁରୀକାଳୀନ ସେବାକୁ ଛାଡ଼ି ଦେଲେ ସେଠାରେ ସବୁକିଛି ବନ୍ଦ ରହିଛି । ସେହିପରି ଆଉ କେତେକ ସ୍ଥାନରେ ନାଇଟ୍ କର୍ଫ୍ୟୁ କଟକଣାକୁ ଆହୁରି କଡାକଡି କରାଯାଇଛି । ଲଗାତାର ଭାବେ କରୋନା ସଂକ୍ରମଣ ବଢ଼ୁଥିବାରୁ ଏଭଳି ପଦକ୍ଷେପ ନେଇଛନ୍ତି ସେଠାକାର ସରକାର ।
Kanak News is now on WhatsApp
Join and get latest news updates delivered to you via WhatsApp
ହେଲେ, ଏବେ ପ୍ରଶ୍ନ ଉଠୁଛି କରୋନାକୁ ରୋକିବା ପାଇଁ ଲକଡାଉନ କଣ ଏକମାତ୍ର ଉପାୟ? ନାଁ ଆଉ କିଛି ବିକଳ୍ପ ରହିଛି? ଏଭଳି ସମୟରେ ବରିଷ୍ଠ ଚିକିତ୍ସକ ଡାକ୍ତର ଦେବୀ ସେଟ୍ଟୀଙ୍କର ଏକ ଲେଖା ଜାତୀୟ ଗଣମାଧ୍ୟମରେ ପ୍ରକାଶ ପାଇଛି । ଏଥିରେ କରୋନା ସଂକ୍ରମଣ ରୋକିବାକୁ ଗୋଟିଏ ବର୍ଷର ଅଭିଜ୍ଞତାରୁ ପରାମର୍ଶ ଦେଇଛନ୍ତି । ଏଥିରେ ଲେଖିଛନ୍ତି, ଆମେ ଯଦି ସମୂହ ଟିକାକରଣ କରିବା ଓ ୨୦ ରୁ ୪୫ ବର୍ଷ ବୟସ୍କଙ୍କୁ ଏଥିରେ ସାମିଲ କରିବା, ଯେଉଁମାନେ କି ସୁପର ସ୍ପ୍ରେଡର, ତେବେ ମହାମାରୀ କରୋନାକୁ ୬ ମାସ ମଧ୍ୟରେ ରୋକିପାରିବା ।
ଦେବୀ ସେଟ୍ଟୀ ହେଉଛନ୍ତି ଦେଶର ଜଣେ ଜଣାଶୁଣା ହୃଦରୋଗ ବିଶେଷଜ୍ଞ । ଗତବର୍ଷ ଦେଶରେ ଯେତେବେଳେ କରୋନା ଦେଶକୁ ପ୍ରବେଶ କରିଥିଲେ ଯେଉଁ କେତେଜଣ ଡାକ୍ତର ଲକଡାଉନ କରିବାକୁ ସରକାରଙ୍କୁ ପରାମର୍ଶ ଦେଇଥିଲେ ସେମାନଙ୍କ ମଧ୍ୟରେ ସେ ଥିଲେ । ହେଲେ ଏବେ ଯେତେବେଳେ କରୋନାର ଦ୍ୱିତୀୟ ଲହର ଆରମ୍ଭ ହୋଇଛି , ସେ ଲକଡାଉନ ଅପେକ୍ଷା ଟିକାକରଣ ଉପରେ ଅଧିକ ଗୁରୁତ୍ୱ ଦେବାକୁ ସରକାରଙ୍କୁ ଏହି ଲେଖା ମାଧ୍ୟମରେ ପରାମର୍ଶ ଦେଇଛନ୍ତି ।
ସେ ଲେଖିଛନ୍ତିି, ଗତବର୍ଷ ଯେତେବେଳେ ଏହି ମହମାରୀ ଭୂତାଣୁ ଦେଶକୁ ଆସିଥିଲା ଏହା ସମ୍ପୂର୍ଣ୍ଣ ନୂଆ ଥିଲା । ଏହି ଭୂତାଣୁର କିଭଳି ଚିକିତ୍ସା କରାଯିବ ସେନେଇ କୌଣସି ଅଭିଜ୍ଞତା ନଥିଲା । ସେହିପରି ଚିକିତ୍ସା ପାଇଁ ଭିତିଭୂମିର ଅଭାବ ରହିଥିଲା । ତେଣୁ କରୋନା ସହ ଲଢ଼େଇ ପାଇଁ ଭିତିଭୂମିର ବିକାଶ କରିବା ଦୃଷ୍ଟିରୁ ସେହି ସମୟରେ ଲକଡାଉନ କରିବା ଜରୁରୀ ଥିଲା । ହେଲେ ଏବେ ସ୍ଥିତି ବଦଳିଛି, କରୋନା ଆକ୍ରାନ୍ତଙ୍କର କେମିତି ଚିକିତ୍ସା କରାଯିବ ସେ ନେଇ ଡାକ୍ତରମାନଙ୍କର ଅଭିଜ୍ଞତା ବି ହୋଇଛି । ସେହିପରି ହସ୍ପିଟାଲ ଉପରେ ରୋଗୀଙ୍କ ଚାପ କମାଇବା ପାଇଁ ଅଳ୍ପ ସଂକ୍ରମିତ ହୋଇଥିବା ରୋଗୀଙ୍କୁ ଘରେ ସଂଗରୋଧରେ ରଖି ଚିକିତ୍ସା କରାଯାଇପାରୁଛି । ତେଣୁ ପୁଣି ଥରେ ଲକଡାଉନ ଲାଗୁ କଲେ ଏହା ଆମକୁ ଆଉ ବିଶେଷ କିଛି ସହଯୋଗ କରିବ ନାହିଁ ।
ଦେଶରେ ଯେତିକି କରୋନା ସଂକ୍ରମିତ ହୋଇଛନ୍ତି ସେମାନଙ୍କ ମଧ୍ୟରୁ ବହୁ ସଂଖ୍ୟାରେ ୨୦ ରୁ ୪୫ବର୍ଷ ବୟସ୍କ ରହିଛନ୍ତି । ଏମାନଙ୍କ ମଧ୍ୟରୁ ଅଧିକାଂଶ କର୍ମଜୀବୀ ହୋଇଥିବାରୁ ଏ ସ୍ଥାନରୁ ସେ ସ୍ଥାନକୁ ଯାଆସ କରୁଥିଲେ ଓ ସୁପର ସ୍ପ୍ରେଡର ବନିଥିଲେ । କରୋନାକୁ ରୋକିବା ପାଇଁ ହେଲେ ଏହି ବର୍ଗକୁ ଟିକାକରଣରେ ସାମିଲ କରିବାକୁ ପଡିବ । ଏମାନଙ୍କ ଦେହରେ ରୋଗ ପ୍ରତିରୋଧକ ଶକ୍ତି ସୃଷ୍ଟି ହେଲେ, ଏହା ସଂକ୍ରମଣକୁ ରୋକିବାରେ ବେଶ୍ ସହାୟକ ହେବ । ଏଭଳି ପରାମର୍ଶ ଦେଇଛନ୍ତି ବରିଷ୍ଠ ଚିକିିତ୍ସକ ଡାକ୍ତର ଦେବୀ ସେଟ୍ଟୀ । କେବଳ ଦେବୀ ସେଟ୍ଟୀ ନୁହଁନ୍ତି କରୋନାକୁ ରୋକିବା ପାଇଁ ଅଧିକରୁ ଅଧିକ ଟିକାକରଣ ପାଇଁ ଅନ୍ୟ ବିଶେଷଜ୍ଞମାନେ ମଧ୍ୟ ପରାମର୍ଶ ଦେଇ ଆସୁଛନ୍ତି ।
କରୋନା ସଂକ୍ରମଣ ବଢ଼ୁଥିବା ବେଳେ ଭୂତାଣୁ ସହ ଲଢ଼ିବାର ଏକମାତ୍ର ବାଟ ହେଉଛି ଟିକା ଓ ସତର୍କତା । ଶେଷ ଖବର ସୁଦ୍ଧା ଆମ ଦେଶରେ ପ୍ରାୟ ୫କୋଟି ଟିକା ଦିଆ ଯାଇଛିି । ଆଉ ଓଡ଼ିଶାରେ ୧୮ ଲକ୍ଷ ଲୋକଙ୍କୁ ଟିକା ଦିଆ ଯାଇଛି ଏବଂ ପ୍ରତ୍ୟକ ଦିନ ରାଜ୍ୟରେ ୧ଲକ୍ଷରୁ ଅଧିକ ଲୋକଙ୍କ ଟିକା ଦେବାକୁ ଟାର୍ଗେଟ ରଖିଛନ୍ତି ସରକାର । ଭାରତରେ ହର୍ଡ ଇମ୍ୟୁନିଟି ବା ସମୂହ ରୋଗ ପ୍ରତିରୋଧ ଶକ୍ତି ସୃଷ୍ଟି ପାଇଁ ୮୦ କୋଟି ଲୋକଙ୍କୁ ଟିକା ଦେବା ଜରୁରୀ । ହେଲେ ଯେମିତି ଟିକାକରଣ ଚାଲିଛି, ଲକ୍ଷ୍ୟରେ ପହଁଚିବା ପାଇଁ ବର୍ଷ ଟପିଯିବ ।