ଓଡିଶା ଫେରିବ ବିଜୁବାବୁଙ୍କ ଡାକୋଟା ବିମାନ ! କଟକ ଆନନ୍ଦ ଭବନରେ ଡାକୋଟା ରଖାଯିବା ନେଇ ପ୍ରସ୍ତୁତି ଆରମ୍ଭ
କନକ ବ୍ୟୁରୋ : ଓଡିଶା ଫେରିବ ବିଜୁ ବାବୁଙ୍କ ଡାକୋଟା ବିମାନ । କଟକ ଜିଲ୍ଲାପାଳ ଓ ବିଧାୟକ ଏନେଇ ସ୍ଥିତି ଅନୁଧ୍ୟାନ କରିଛନ୍ତି । କଟକକୁ ଡାକୋଟା ଆସିଲେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିବ । ବିଜୁ ବାବୁଙ୍କ ଜନ୍ମସ୍ଥାନ ଆନନ୍ଦଭବନରେ ଡାକୋଟାକୁ ରଖାଯିବ । ଏନେଇ ଆନନ୍ଦ ଭବନ ସମ୍ମୁଖରେ ଥିବା ପଡିଆରେ ପ୍ରସ୍ତୁତି ଆରମ୍ଭ ହୋଇଛି । ସ୍ଥାୟୀ ଭାବେ ଡାକୋଟାକୁ ଏଠାରେ ପ୍ରଦର୍ଶିତ କରାଯିବ । ବିଜୁବାବୁଙ୍କ ଦୁଃସାହାସିକ କୌଶଳ ସ୍ମୃତିରେ ଯୁବପୀଢି ଉତ୍ସାହିତ ହେବେ ବୋଲି ଜିଲ୍ଲାପାଳ କହିଛନ୍ତି । ଗତ ଡିସେମ୍ବର ୧୧ ତାରିଖରେ ଏୟାର ପୋର୍ଟ ଅଥରିଟି ଅଫ ଇଣ୍ଡିଆ ଏହି ବିମାନ ସ୍ଥାନାନ୍ତରଣ ନେଇ ଚିଠି ଲେଖିଛନ୍ତି । ଏହି ଚିଠି ପାଇବା ପରେ ରାଜ୍ୟ ସରକାର ତତ୍ପରତା ପ୍ରକାଶ କରିବା ସହ ସ୍ଥିତି ଅନୁଧ୍ୟାନ କରିଛନ୍ତି । ଏହି ବିମାନ ଉଡାଇ ବିଜୁ ପଟ୍ଟନାୟକ ଇଣ୍ଡୋନେସିଆର ପ୍ରଧାନମନ୍ତ୍ରୀ ସୁତାନ ଜାହାରିରଙ୍କୁ ଉଦ୍ଧାର କରିଥିଲେ ଏବଂ ଜମ୍ମୁ କାଶ୍ମୀରରେ ଟ୍ରୁପ ନିଆଅଣା କରିଥିଲେ । କୋଲକାତାରେ ଦୀର୍ଘ ଦିନ ଧରି ପଡି ନଷ୍ଟ ହେଉଥିବା ଏହି ବିମାନ ଏବେ ଓଡିଶା ଆସିବାର ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ୭୦ ବର୍ଷ ପରେ ଓଡିଶା ଆସିବ ସ୍ୱର୍ଗତ ବିଜୁ ପଟ୍ଟନାୟକଙ୍କ ‘ଡାକୋଟା’। ଏହି ଡାକୋଟା ସହ ବିଜୁ ବାବୁଙ୍କର ସ୍ମୃତି ଜଡିତ ଥିବାବେଳେ ଏବେ ଏହାକୁ ଓଡିଶା ଆଣିବାକୁ ଯୋଜନା ପ୍ରସ୍ତୁତ ହୋଇଛି । ପୂର୍ବତନ ମୁଖ୍ୟମନ୍ତ୍ରୀ ତଥା ସେତେବେଳର ପାଇଲଟ ବିଜୁ ପଟ୍ଟନାୟକ ୧୯୪୭ରେ ପ୍ରତିଷ୍ଠା କରିଥିଲେ କଳିଙ୍ଗ ଏୟାର ଲାଇନସ । କୋଲକାତାରେ ଏହାର ମୁଖ୍ୟ କାର୍ୟ୍ୟାଳୟ ଥିବାବେଳେ ଏଥିରେ ୧୫ଟି ଡାକୋଟା ବିମାନ ରଖାଯାଇଥିଲା । ଏହି ବିମାନ କାଶ୍ମୀରରେ ସେନା ବାହିନୀର ଯବାନଙ୍କୁ ପରିବହନ କାର୍ୟ୍ୟରେ ନିୟୋଜିତ ଥିବାବେଳେ ଉତ୍ତରପୂର୍ବ ଭାରତରେ ସେନା ଶରଣାର୍ଥୀଙ୍କୁ ସେବା ଯୋଗାଇ ଆସୁଥିଲା । ୧୯୪୭ ଜୁଲାଇ ୨୧ରେ ବିଜୁ ଏହି ‘ଡାକୋଟା ଡିସି-୩’ ବିମାନକୁ ନିଜେ ଚଳାଇ ଇଣ୍ଡୋନେସିଆର ତତ୍କାଳୀନ ଉପରାଷ୍ଟ୍ରପତି ଏବଂ ପ୍ରଧାନମନ୍ତ୍ରୀଙ୍କୁ ଶତ୍ରୁ କବଳରୁ ଉଦ୍ଧାର କରି ରାତାରାତି ହିରୋ ପାଲଟି ଯାଇଥିଲେ ।
ପ୍ରଧାନମନ୍ତ୍ରୀ ଜବାରହାରଲାଲ ନେହେରୁଙ୍କୁ ନିର୍ଦ୍ଦେଶମତେ ୩୨ ବର୍ଷିୟ ଯୁବ ପାଇଲଟ ବିଜୁ ପଟ୍ଟନାୟକ ଯୁଦ୍ଧର
ଭୟାବହତାକୁ ଖାତିର ନ କରି ନିଜେ ଏହି ‘ଡାକୋଟା ଡିସି-୩’ ବିମାନରେ ଜାକର୍ତ୍ତା ଯାଇ ଉଭୟ ଉପରାଷ୍ଟ୍ରପତି ମହମ୍ମଦ ହାଟା ଏବଂ ପ୍ରଧାନମନ୍ତ୍ରୀ ସାହାରିୟରଙ୍କୁ ଉଦ୍ଧାର କରିଥିବାର ବର୍ଣ୍ଣନା ରହିଛି । ତାଙ୍କର ଏହି ଉଲ୍ଲେଖନୀୟ ଅବଦାନ ପାଇଁ ତାଙ୍କୁ ଇଣ୍ଡୋନେସିଆ ସରକାର ଭୂମିପୂତ୍ର ଉପାଧିରେ ଭୂଷିତ କରିଥିଲେ । ତେବେ ଏହି ଡାକୋଟା ବିମାନ ସେହି ସମୟରୁ କୋଲକାତାରେ ରହିଆସିଛି । ଏବେ ଏହି ବିମାନର ଖଣ୍ଡବିଖଣ୍ଡିତ କିଛି ଅଂଶ ବି କୋଲକାତାର ନେତାଜୀ ସୁଭାଷ ବୋଷ ଅର୍ନ୍ତଜାତୀୟ ବିମାନ ବନ୍ଦର ସଂଗ୍ରହାଳୟରେ ସ୍ଥାନ ପାଇଛି । ଏହାକୁ ଓଡିଶା ଆଣିବା ପାଇଁ ୨ ବର୍ଷ ତଳେ ଜଣେ ବ୍ୟକ୍ତି ରାଜ୍ୟ ସରକାରଙ୍କୁ ଅନୁରୋଧ କରିଥିଲେ । ଆଉ ଏହାପରେ ଡାକୋଟା ଆଣିବାକୁ ରାଜ୍ୟ ସରକାର ଆରମ୍ଭ କରିଛନ୍ତି ପ୍ରୟାସ ।