ବାତ୍ୟା ତିତଲି ପ୍ରଭାବରେ ତୀବ୍ର ହେବାରେ ଲାଗିଛି ପବନର ବେଗ : ରାଜ୍ୟର ଅନେକ ସ୍ଥାନରେ ଲାଗିରହିଛି ପ୍ରବଳ ବର୍ଷା
କନକ ବ୍ୟୁରୋ : ବାତ୍ୟା ତିତଲି ଉପକୂଳ ଛୁଇଁବା ପ୍ରକ୍ରିୟା ଆରମ୍ଭ ହୋଇଥିବା ଜଣାପଡିଛି । ଏହାସହ ଭୟଙ୍କର ବାତ୍ୟା ତିତଲି ଆଉ ମାତ୍ର କିଛି ସମୟ ମଧ୍ୟରେ ସ୍ଥଳଭାଗକୁ ସମ୍ପୂର୍ଣ୍ଣ ଭାବରେ ଛୁଇଁବ ବୋଲି ସୂଚନା ମିଳିଛି । ତେବେ ବର୍ତମାନ ସମୟରେ ବାତ୍ୟା ସ୍ଥଳଭାଗ ଛୁଇଁବା ପୂର୍ବରୁ ପବନର ବେଗ ବଢିଥିବା ଜଣାପଡିଛି । ଗୋପାଳପୁରଠାରେ ପବନର ବେଗ ବଢିବାରେ ଲାଗିଛି । ଏପରିକି ଅନେକ ସ୍ଥାନରେ ଗଛ ଭାଙ୍ଗିବା ସହ ଘର ମଧ୍ୟ ଭାଙ୍ଗିଥିବା ଜଣାପଡିଛି । ଏହି ସମୟରେ ବାତ୍ୟା ଘଣ୍ଟାପ୍ରତି ମାତ୍ର ୨୦ କିମି ବେଗରେ ଗତି କରୁଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
କେବଳ ଗୋପାଳପୁର ନୁହେଁ ବରଂ ଗଜପତି, ବ୍ରହ୍ମପୁର, ଖୋର୍ଦ୍ଧା, ଜଗତସିଂହପୁର, ଯାଜପୁର, ଭଦ୍ରକ ଆଦି ସ୍ଥାନରେ ପ୍ରବଳ ବର୍ଷା ଲାଗି ରହିଛି । ବର୍ଷା ସାଙ୍ଗକୁ ପବନର ବେଗ ମଧ୍ୟ ଧିରେ ଧିରେ ବଢୁଥିବା ଦେଖାଯାଇଛି । ଉପକୂଳବର୍ତୀ ଅଚଂଳର କେତେକ ଲୋକମାନଙ୍କୁ ସ୍ଥାନାନ୍ତରଣ କରାଯାଇଥିବା ସମୟରେ ମଧ୍ୟ ଏବେବି ଲୋକମାନେ ଭୟଭୀତ ଅବସ୍ଥାରେ ରହିଛନ୍ତି । ଏହାସହ ଏହା ସ୍ଥଳଭାଗକୁ ଛୁଇଁବା ସମୟରେ ପବନର ବେଗ ଘଣ୍ଟାପ୍ରତି ୧୬୫ କିମି ବେଗରେ ପବନ ବହିବ ବୋଲି ଜଣାପଡିଛି । ବାତ୍ୟା ସ୍ଥଳଭାଗକୁ ଛୁଇଁବା ସମୟରେ ପବନ ସାଙ୍ଗକୁ ପ୍ରବଳ ବର୍ଷା ହେବ । ବର୍ତମାନ ସମୟରେ ଗୋପାଳପୁରରେ ପବନର ବେଗ ୧୪୫ କିମି ବେଗରେ ବହୁଥିବା ଜଣାପଡିଛି । ପବନରେ ଅନେକ ବିଦ୍ୟୁତ ଖୁଣ୍ଟ ମଧ୍ୟ ଭାଙ୍ଗିଯାଇଛି । ବାତ୍ୟାକୁ ନେଇ ସରକାରୀ ସ୍ତରରେ ମଧ୍ୟ ଅନେକ ପ୍ରସ୍ତୁତି ସରିଛି । ମୁଖ୍ୟମନ୍ତ୍ରୀ ଗତକାଲି ସ୍ଥିତିର ସମୀକ୍ଷା କରିଥିବା ସହ ଯେପରି କୌଣସି ଲୋକଙ୍କର କ୍ଷତି ନହୁଏ ତାହା ଉପରେ ବିଶେଷ ଧ୍ୟାନ ଦେବା ପାଇଁ ନିର୍ଦ୍ଦେଶ ଦେଇଛନ୍ତି । ଲୋକମାନଙ୍କ ସୁରକ୍ଷାକୁ ଦେଖି ସ୍ଥାନୀୟ ପ୍ରଶାସନ ପକ୍ଷରୁ ମଧ୍ୟ ନିକଟସ୍ଥ ବାତ୍ୟା ଆଶ୍ରୟସ୍ଥଳୀକୁ ଜନସାଧାରଣଙ୍କୁ ନିଆଯିବ ସହ କେତେକ ସ୍ଥାନରେ ରନ୍ଧାଖାଦ୍ୟ ମଧ୍ୟ ଦିଆଯାଇଛି । ତେବେ ଆଉ ମାତ୍ର କିଛି ସମୟ ପରେ ବାତ୍ୟା ସ୍ଥଳଭାଗକୁ ପୂର୍ଣ୍ଣମାତ୍ରାରେ ଛୁଇଁବ ବୋଲି ସୂଚନା ମିଳିଛି ।