କାୟା ମେଲାଉଛି କରୋନା । ଦିନକରେ ଦେଶରେ ୨୬ ହଜାର ୨୯୧ ନୂଆ ଆକ୍ରାନ୍ତ ଚିହ୍ନଟ । ଗତ ୮୫ ଦିନ ଭିତରେ ସର୍ବାଧିକ ଦୈନିକ ସଂକ୍ରମଣ ।
କନକ ବ୍ୟୁରୋ: ଦିନକ ମଧ୍ୟରେ ଦେଶରେ ୨୬ ହଜାର ୨୯୧ ନୂଆ ପଜିଟିଭ୍ ଚିହ୍ନଟ ହୋଇଛନ୍ତି । ଏହା ସହ ୧୧୮ ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି । ଦେଶରେ ବିଶେଷ କରି ମହାରାଷ୍ଟ୍ର, କେରଳ, ପଂଜାବ, ଗୁଜରାଟ, ତାମିଲନାଡୁ ଓ ମଧ୍ୟପ୍ରଦେଶରେ ସ୍ଥିତି ଧିରେ ଧିରେ ଜଟିଳ ହେବାରେ ଲାଗଛି । ନୂଆ ସଂକ୍ରମିତ ମାମଲାର ୮୭. ୭୩ ପ୍ରତିଶତ କେବଳ ଏହି ୭ଟି ରାଜ୍ୟରେ ରହିଥିବା ସ୍ୱାସ୍ଥ୍ୟ ମନ୍ତ୍ରାଳୟ ସୂଚନା ଦେଇଛି । ଗତ ୨୪ ଘଂଟା ଭିତରେ ଯେତିକି ମାମଲା ଆସିଛି, ତାହା ୮୫ ଦିନ ମଧ୍ୟରେ ସର୍ବାଧିକ । ଗତବର୍ଷ ଡିସେମ୍ବର ୨୦ ତାରିଖ ପରେ ଏହା ହେଉଛି ସବୁଠୁ ଅଧିକ ଦୈନିକ ସଂକ୍ରମଣ । ଚିନ୍ତାର ବିଷୟ ହେଉଛି ଗତ ସପ୍ତାହରେ କରୋନା ସଂକ୍ରମଣ ମାମଲା ପୂର୍ବ ସପ୍ତାହ ତୁଳନାରେ ୩୩ ପ୍ରତିଶତ ବଢିଛି ।
Kanak News is now on WhatsApp
Join and get latest news updates delivered to you via WhatsApp
ସାପ୍ତାହିକ କରୋନା ସଂକ୍ରମଣକୁ ବିଚାର କଲେ, ଫେବ୍ରୁଆରୀ ମଧ୍ୟ ଭାଗରୁ ଦେଶରେ କରୋନାର ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଉଥିବା ଦେଖିବାକୁ ମିଳିଛି । ଫେବୃଆରୀ ୮ରୁ ୧୪ ଗୋଟିଏ ସପ୍ତାହରେ ଦେଶରେ ୭୭ ହଜାର ୨୮୪ କରୋନା ସଂକ୍ରମଣ ଚିହ୍ନଟ ହୋଇଥିଲା । ଏହା ଗତବର୍ଷ ସେପ୍ଟେମ୍ବର ପରେ ଥିଲା ସର୍ବନିମ୍ନ । ହେଲେ ଏହାପରଠାରୁ କ୍ରମାଗତ ଭାବେ ବଢିଚାଲିଛି କରୋନା ସଂକ୍ରମଣ ।
ବିଶେଷ କରି ମାର୍ଚ୍ଚ ଆରମ୍ଭରୁ ଦ୍ରୁତ ବେଗରେ ବଢୁଛି ସଂକ୍ରମଣ ମାମଲା । ମାର୍ଚ୍ଚ ପ୍ରଥମ ସପ୍ତାହ ଅର୍ଥାତ ୧ରୁ ୭ ତାରିଖ ମଧ୍ୟରେ ଦେଶରେ ୧ ଲକ୍ଷ ୧୭ ହଜାର ୧୯୮ଟି ନୂଆ ସଂକ୍ରମଣ ମାମଲା ଚିହ୍ନଟ ହୋଇଥିଲା । ଯାହା ଗତ ୬ ସପ୍ତାହରେ ଥିଲା ସର୍ବାଧିକ । ସେହିପରି ମାର୍ଚ୍ଚ ୮ରୁ ୧୪ ତାରିଖ ଗୋଟିଏ ସପ୍ତାହରେ ଦେଶରେ ୧ ଲକ୍ଷ ୫୫ ହଜାର ୯୦୯ଟି ନୂଆ କରୋନା ସଂକ୍ରମଣ ଚିହ୍ନଟ ହୋଇଛି । ଏହା ମଧ୍ୟ ଗତ ୧୨ ସପ୍ତାହରେ ସର୍ବାଧିକ ।
ଚଳିତବର୍ଷ ଆରମ୍ଭରୁ ଅର୍ଥାତ ଜାନୁଆରୀ ପ୍ରଥମ ସପ୍ତାହରେ କରୋନା ଜନିତ ମୃତ୍ୟୁ ୧ ହଜାରରୁ ଅଧିକ ରହିଥିଲା । ହେଲେ ଫେବୃଆରୀ ବେଳକୁ ଏହା ଅଧା ହୋଇଯାଇଥିଲା । ଫେବୃଆରୀ ପ୍ରଥମ ସପ୍ତାହ ଅର୍ଥାତ ୧ରୁ ୭ ଫେବୃଆରୀ ଗୋଟିଏ ସପ୍ତାହରେ ୬୮୦ ଜଣଙ୍କର କରୋନାରେ ମୃତ୍ୟୁ ରେକର୍ଡ କରାଯାଇଥିଲା । ସେହିପରି ପରବର୍ତୀ ସପ୍ତାହରେ ଏହା ଥିଲା ୬୫୦ । ଫେବୃଆରୀ ତୃତୀୟ ସପ୍ତାହରେ ମଧ୍ୟ ୬୬୦ ଜଣଙ୍କ କରୋନାରେ ମୃତ୍ୟୁ ହୋଇଥିଲା । ଫେବୃଆରୀ ୨୨ରୁ ୨୮ ମଧ୍ୟରେ ଏହି ସଂଖ୍ୟା ସାମାନ୍ୟ ବଢିବା ଆରମ୍ଭ କଲା । ଏହି ସସ୍ତାହରେ ସାରା ଦେଶରେ ମୋଟ୍ ୭୭୬ ଜଣଙ୍କ କରୋନାରେ ମୃତ୍ୟୁ ହୋଇଥିଲା । ମାର୍ଚ୍ଚ ଆରମ୍ଭରୁ କରୋନା ମୃତ୍ୟୁ ସାମାନ୍ୟ କମି ପୁଣି ଦ୍ୱିତୀୟ ସପ୍ତାହ ବେଳକୁ ଏଥିରେ ଉନ୍ନତି ହୋଇଛି । ଅର୍ଥାତ ମାର୍ଚ୍ଚ ୮ରୁ ୧୪ ଗୋଟିଏ ସପ୍ତାହରେ ସାରାଦେଶରେ ୮୮୭ ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି ।
କରୋନା ସଂକ୍ରମଣକୁ ଦୃଷ୍ଟିରେ ରଖି ମହାରାଷ୍ଟ୍ରର ନାଗପୁରରେ ସୋମବାରଠାରୁ ଆରମ୍ଭ ହୋଇଛି ତାଲାବନ୍ଦ । କଡା କଟକଣା ଭିତରେ ମାର୍ଚ୍ଚ ୨୧ ତାରିଖ ପର୍ଯ୍ୟନ୍ତ ଏହି ତାଲାବନ୍ଦ ଜାରି ରହିବ । ସେପଟେ ମଧ୍ୟ ପ୍ରଦେଶରେ ମଧ୍ୟ ସଂକ୍ରମଣ ଲଗାତାର ବଢୁଥିବାରୁ ନାଇଟ୍ କର୍ଫ୍ୟୁ ଲାଗୁ କରିବା ନେଇ ଚିନ୍ତା କରୁଛନ୍ତି ସରକାର ।