ପ୍ରିୟଙ୍କାଙ୍କ ଟିମରେ କିଏ ଏହି ବୀରଙ୍ଗନା ? ଯାହାଙ୍କୁ ନେଇ ୟୁପି ନିର୍ବାଚନ ଲଢିବାକୁ ଅଣ୍ଟା ଭିଡିଛି କଂଗ୍ରେସ
କନକ ବ୍ୟୁରୋ : ଉତ୍ତର ପ୍ରଦେଶ ନିର୍ବାଚନ ପାଇଁ ସମସ୍ତ ରାଜନୈତିକ ଦଳମାନେ ପ୍ରାର୍ଥୀଙ୍କ ନାମ ଉପରେ ମନ୍ଥନ ଚଳାଇଛନ୍ତି । କେଉଁଠି ମେଣ୍ଟରେ ଆସନ ବୁଝାମଣାକୁ ନେଇ ଆଲୋଚନା ହେଉଛି ତ କେଉଁଠି ନିଜ ଦଳର ଅସନ୍ତୁଷ୍ଟ ନେତାଙ୍କ ମନାଇବାକୁ ପ୍ରୟାସ କରୁଛନ୍ତି ଦଳର ନେତୃ୍ତ୍ୱମାନେ । ଏହାରି ମଧ୍ୟରେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଉତ୍ତର ପ୍ରଦେଶ ନିର୍ବାଚନ ପାଇଁ ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିଛନ୍ତି । ପ୍ରିୟଙ୍କା ଗାନ୍ଧୀ ଉତ୍ତର ପ୍ରଦେଶ ନିର୍ବାଚନ ରାଲିରେ ଘୋଷଣା କରିଥିଲେ କି କଂଗ୍ରେସ ୪୦ ପ୍ରତିଶତ ଟିକେଟ ମହିଳାଙ୍କୁ ଦେବ । ଆଜି ପ୍ରିୟଙ୍କା ଗାନ୍ଧୀ ଘୋଷଣା କରିଥିବା ୧୨୫ ଜଣ ପ୍ରାର୍ଥୀ ତାଲିକାରେ ୫୦ ଜଣ ମହିଳା ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି ତାଲିକାରେ ବଡ ନାମକୁ ଯଦି ଆଲୋଚନା କରାଯିବ ତେବେ ସେମାନଙ୍କ ମଧ୍ୟରେ ରହିଛନ୍ତି ସଲମାନ ଖୁର୍ସିଦଙ୍କ ପତ୍ନୀ ଲୁଇସ୍ ଖୁର୍ସିଦ, ଉନାଓ ଗଣଦୁଷ୍କର୍ମ ମାମଲାରେ ପୀଡିତାଙ୍କ ମା ଆଶା ସିଂ ଓ ଏନଆରସି-ସିଏଏ ବିରୋଧୀ ଆନ୍ଦୋଳନରେ ପ୍ରମୁଖ ଚେହେରା ସଦଫ ଜାଫର । ଏହା ବ୍ୟତୀତ ପୁନମ ପାଣ୍ଡେଙ୍କୁ ବି ଟିକେଟ ମିଳିଛି , ଯିଏ କି ଜଣେ ଆଶା କର୍ମୀ ।
ଆଶା ସିଂ : କଂଗ୍ରେସ ତରଫରୁ ଜାରି କରାଯାଇଥିବା ପ୍ରଥମ ଟିକେଟ ଲିଷ୍ଟରେ ଆଶା ସିଂଙ୍କ ନାମ ସାମିଲ ହୋଇଛି । ଉନାଓରେ ନିଜ ଝିଅ ସହ ଦୁଷ୍କର୍ମ ହେବା ପରେ ସେ କ୍ଷମତାରେ ଥିବା ବିଜେପି ବିଧାୟକଙ୍କ ବିରୋଧରେ ଲଢିଥିଲେ । ଏହି ମାମଲାରେ ବି ତାଙ୍କ ସ୍ୱାମୀଙ୍କୁ ହତ୍ୟା କରାଯାଇଥିବା କଥା କୁହାଯାଉଛି ।
ପୁନମ୍ ପାଣ୍ଡେ : କରୋନା ସମୟରେ ଉତ୍ତର ପ୍ରଦେଶରେ ଆଶାକର୍ମୀମାନେ ହିଁ ପ୍ରମୁଖ ଭୂମିକା ନିର୍ବାହ କରିଥିଷଲ । ସେମାନେ ନିଜ ଜୀବନକୁ ବାଜିରେ ଲଗାଇ ଲୋକଙ୍କ ସେବାରେ ଲାଗିଥିଲେ । ଏନେଇ ଆଶାକର୍ମୀମାନେ ଯେତେବେଳେ ସେମାନଙ୍କ ସହାୟତା ରାଶି ବୃଦ୍ଧି କରିବାକୁ ମୁଖ୍ୟମନ୍ତ୍ରୀଙ୍କ ବାସଭବନ ଆଗରେ ବିକ୍ଷୋଭ କରିଥିଲେ ସେତେବେଳେ ୟୁପି ପୋଲିସ ସେମାନଙ୍କୁ ନିର୍ମମ ଭାବେ ମାଡ ମାରିଥିଲା । ଏହି ଆନ୍ଦୋଳନ ପରେ ପୁନମ୍ ପାଣ୍ଡେ ଏକ ଚର୍ଚ୍ଚିତ ଚେହେରା ହୋଇଯାଇଥିଲେ ।
ସଦଫ ଜଫର : ନାଗରିକତା ସଂଶୋଧନ ଆଇନ ବିରୋଧରେ ଉତ୍ତର ପ୍ରଦେଶ ରାଜଧାନୀ ଲକ୍ଷ୍ନୌଠାରେ ବିରୋଧ ପ୍ରଦର୍ଶନ କରୁଥିବା ବେଳେ ଗିରଫ ହୋଇଥିବା ସଦଫ ଜଫର ପେଶାରେ ଜଣେ ଅଭିନେତ୍ରୀ । ସଦଫ ପ୍ରଥମେ ତାଙ୍କ ସ୍ୱାମୀଙ୍କ ଠାରୁ ନିର୍ଜ୍ୟାତିତ ହୋଇ ନିଜ ପିଲାସହ ଏକାଠି ରହୁଥିଲେ । ଏହାପରେ ନାଗରିକତା ସଂଶୋଧନ ଆଇନ ବିରୋଧରେ ପ୍ରଦର୍ଶନ କରି ଜେଲ ଗଲେ । ସେ ବିଶେଷ ଭାବେ ଜଣେ ସାମାଜିକ କର୍ମୀ ସହ ଜଣେ କଂଗ୍ରେସ ସମର୍ଥକ ଭାବେ ପରିଚିତ ।
ଅର୍ଚ୍ଚନା ଗୌତମ : ଅର୍ଚ୍ଚନା ଗୌତମ ଜଣେ ବଲିଉଡ ଅଭିନେତ୍ରୀ । ସେ ଗ୍ରେଟ ଗ୍ରାଣ୍ଡ ମସ୍ତି ଓ ହସୀନରା ପାର୍କର ଭଳି ବଲିଉଡ ସିନେମାରେ ଅଭିନୟ କରିସାରିଛନ୍ତି । ଏହାସହ ସେ ଅନେକ ସାଉଥ ସିନେମାରେ ବି ଅଭିନୟ କରିଛନ୍ତି । ତାଙ୍କୁ କଂଗ୍ରେସ ପକ୍ଷରୁ ବିଧାୟକ ଭାବେ ନିର୍ବାଚନ ଲଢିବାକୁ ସୁଯୋଗ ଦିଆଯାଇଛି ।