ପୌର ପରିଷଦରେ ଅଧିକ କାଉନସିଲର ଜିତିଥିବା ଦଳକୁ ମିଳିଲାନି ଅଧ୍ୟକ୍ଷ ପଦ । ଦୁଇଟି ପଦ ପାଇଁ ଅଲଗା ଅଲଗା ଦଳର ପ୍ରାର୍ଥୀ ଚୟନ କଲେ ଭୋଟର ।
କନକ ବ୍ୟୁରୋ: ରାଜ୍ୟର ଅନେକ ପୌର ପରିଷଦରେ ରୋଚକ ଫଳାଫଳ ଆସିଛି । ଗୋଟିଏ ଦଳର କାଉନସିଲର ସଂଖ୍ୟାଗରିଷ୍ଠ ଥିବା ବେଳେ ଅଧ୍ୟକ୍ଷ ସ୍ୱାଧୀନ କିମ୍ବା ଅନ୍ୟ ଦଳର ହୋଇଛନ୍ତି । ତେଣୁ ଆଗକୁ ପରିଷଦ କାହା ହିସାବରେ ଚାଲିବ ତାକୁ ନେଇ ଦ୍ୱନ୍ଦ୍ୱ ଦେଖାଦେଇଛି । ତେବେ ବ୍ୟବସ୍ଥା ରହିଛି ୨ ବର୍ଷ ପରେ ଅଧ୍ୟକ୍ଷ ବିରୋଧରେ ଅନାସ୍ଥା ପ୍ରସ୍ତାବ ଆଗତ କରିପାରିବେ କାଉନସିଲର । ଆଉ ସେଠାରେ ଉପନିର୍ବାଚନ ହେବ କିମ୍ବା ଭାଇସ୍ ଚେୟାରମ୍ୟାନ ଅଧ୍ୟକ୍ଷ ଦାୟିତ୍ୱରେ ରହିବେ ।
Kanak News is now on WhatsApp
Join and get latest news updates delivered to you via WhatsApp
ସଂଖ୍ୟାଗରିଷ୍ଠ ନଥିବା ଦଳର ପ୍ରାର୍ଥୀ ପୌରାଧ୍ୟକ୍ଷ ଭାବେ ବିଜୟୀ ହୋଇଥିଲେ କଣ ହେବ? ଅଧ୍ୟକ୍ଷଙ୍କ ହିସାବରେ ପରିଷଦ ଚାଲିବ ନା ପରିଷଦରେ ଥିବା ସଂଖ୍ୟା ଗରିଷ୍ଠ ସଦସ୍ୟଙ୍କ ଅନୁସାରେ ଚାଲିବ । ପୌର ଫଳାଫଳ ଆସିବା ପରେ ଏହା ଏବେ ସବୁଠାରୁ ବଡ ପ୍ରଶ୍ନ ।
ପୌର ନିର୍ବାଚନର ଫଳାଫଳ କିଛି ସ୍ଥାନରେ ଚକିତ କଲା ଭଳି ଆସିଛି । ଢେଙ୍କାନାଳ, ଜଗତସିଂହପୁର, ପାରାଦୀପ, ଅନୁଗୁଳ, ରେଢାଖୋଲ ଭଳି ଅନେକ ସ୍ଥାନରେ ପରିଷଦରେ ସଂଖ୍ୟା ଗରିଷ୍ଠତା ଗୋଟିଏ ଦଳର ଅଛି, କିନ୍ତୁ ଅଧ୍ୟକ୍ଷ ନିର୍ବାଚିତ ହୋଇଛନ୍ତି ଭିନ୍ନ ଦଳର । ସିଧାସଳଖ ପୌରାଧ୍ୟକ୍ଷ ନିର୍ବାଚନ ହେବାରୁ ଏଥର ଏଭଳି ଫଳାଫଲ ଆସିଛି । ଉଦାହରଣ ସ୍ୂରୂପ – ଜଗତସିଂହପୁରରେ କଂଗ୍ରେସ ଅଧ୍ୟକ୍ଷ ପ୍ରାର୍ଥୀ ବିଜୟୀ ହୋଇଛନ୍ତି କିନ୍ତୁ ବିଜେଡି ୯ଟି ୱାର୍ଡ ଜିଣିଥିବା ବେଳେ କଂଗ୍ରେସ ୭ଟି ୱାର୍ଡରେ ବିଜୟୀ ହୋଇଛି ।
ସଂଖ୍ୟା ଗରିଷ୍ଠ ଦଳକୁ ଛାଡି ସ୍ୱାଧୀନ କିମ୍ବା ଅନ୍ୟ ଦଳରୁ ଅଧ୍ୟକ୍ଷ ହୋଇଥିଲେ, ଏସବୁ ପରିଷଦରେ ଅଧ୍ୟକ୍ଷଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିପାରିବେ କାଉନସିଲର । ନିର୍ବାଚନର ଦୁଇ ବର୍ଷ ପରେ କୌଣସି ଅଧ୍ୟକ୍ଷ ବିରୋଧରେ ଅନାସ୍ଥା ପ୍ରସ୍ତାବ ଆଗତ ପାଇଁ ବ୍ୟବସ୍ଥା ରହିଛି । ଯଦି ଅନାସ୍ଥା ପ୍ରସ୍ତାବରେ ତାଙ୍କୁ ବାହାର କରାଯାଏ, ତେବେ ପୁଣି ସେଠାରେ ଉପ ନିର୍ବାଚନ ହେବ । ପୂର୍ବରୁ ପୌରପରିଷଦ ନିର୍ବାଚନର ବିଜୟୀ କର୍ପୋରେଟର କିମ୍ବା କାଉନସିଲର ଅଧ୍ୟକ୍ଷ ନିର୍ବାଚନ କରୁଥିଲେ । କିନ୍ତୁ ଏଥର ପ୍ରତ୍ୟକ୍ଷ ନିର୍ବାଚନ ହେଉଥିବାରୁ ମେୟର ଓ ଏନଏସି ଅଧ୍ୟକ୍ଷ ପାଇଁ ସିଧାସଳଖ ମତଦାନ କରିଛନ୍ତି ସାଧାରଣ ଜନତା ।