କନକ ବ୍ୟୁରୋ : ତାମିଲନାଡୁ ପରେ ଏବେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପୋଷ୍ଟର ଏବେ ବାମଦଳ ଶାସିତ କେରଳରେ ଦେଖିବାକୁ ମିଳିଛି । ସବୁଠାରୁ ବଡକଥା ଏହି ପୋଷ୍ଟରେ ଲେଖାଯାଇଥିବା ଶ୍ଲୋଗାନ । ପୋଷ୍ଟରରେ ଲେଖା ଯାଇଛି କି ‘ଦିଦିଙ୍କୁ ଜିତାଅ ଓ ଦେଶକୁ ବଞ୍ଚାଅ’ । କହିରଖୁ କି ୭୦ ବର୍ଷ ତଳେ ପୂର୍ବତନ ପ୍ରଧାନମନ୍ତ୍ରୀ ସ୍ୱଗତଃ ଇନ୍ଦୀରା ଗାନ୍ଧୀଙ୍କ ନାମରେ ଏଭଳି ପୋଷ୍ଟର ଲଗାଯାଇଥିଲା । ଏପଟେ ବାମଦଳ ଶାସିତ ରାଜ୍ୟରେ ଦିଦିଙ୍କ ପୋଷ୍ଟର ଲାଗିବା ପରେ କ୍ଷମତା ଯୁଦ୍ଧର ନୂଆ ଅଧ୍ୟାୟ ଆରମ୍ଭ ହେଉଥିବା ଅନୁମାନ କରାଯାଉଛି । କାରଣ ମମତା ହେଉଛନ୍ତି ବାମପନ୍ଥୀ ବିଚାରଧାରର ବଡ ବିରୋଧୀ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଯଦି ରାଜନୈତିକ ସଂଗଠନକୁ ନଜର କରାଯାଏ ତେବେ ଦକ୍ଷିଣ ଭାରତରେ ଟିଏମସିର କୌଣସି ସଂଗଠନ ନାହିଁ କି ଦଳ କେବେ କୌଣସି ନିର୍ବାଚନରେ ପ୍ରାର୍ଥୀ ଦେଇ ନାହିଁ । ହେଲେ ଦକ୍ଷିଣ ଭାରତର ଏବେ ମମତାଙ୍କ ଏଭଳି ପୋଷ୍ଟର ଲାଗିବା ମମତାଙ୍କ ବଢୁଥିବା ଲୋକପ୍ରିୟତାକୁ ପ୍ରମାଣ କରୁଛି ।
ଅନ୍ୟପଟେ ଏଭଳି ପୋଷ୍ଟର ଲାଗିବାକୁ ନେଇ ଦଳ ପକ୍ଷରୁ କୁହାଯାଇଛି କି ବିଜେପିକୁ ସାମ୍ନା କରିବା ପାଇଁ ପଶ୍ଚିମବଙ୍ଗର ନେତା ମମତା ବାନାର୍ଜୀଙ୍କୁ ରାଷ୍ଟ୍ରୀୟ ସ୍ତରରେ ଏକ ବିକଳ୍ପ ଭାବେ ଲୋକ ଭାବିବା ଆରମ୍ଭ କରିଛନ୍ତି । ଦଳର ରାଜ୍ୟସଭା ସାଂସଦ ଶୁଖେନ୍ଦୁ ଶେଖର ରାୟ କହିଛନ୍ତି କି, ବାସ୍ତବରେ ଦଳ ଏବେ ଜାତୀୟ ସ୍ତରରେ ନିଜର ସଂଗଠନ ବୃଦ୍ଧି କରିବାକୁ ଚାହୁଁଛି । ଏହାସହ ଏବେ ଦେଶରେ ମମତା ବାନାର୍ଜୀଙ୍କୁ ସାଧାରଣ ଲୋକ ଓ ଲୋକତାନ୍ତ୍ରିକ ସଂସ୍ଥାମାନଙ୍କର ରକ୍ଷକ ବୋଲି ଲୋକେ ବିଚାର କରିବା ଆରମ୍ଭ କରିଛନ୍ତି ।
ସେପଟେ ଏଭଳି ଖବରକୁ ନେଇ ବିଜେପି କହିଛି କି, ମମତାଙ୍କ ଏହି ସ୍ୱପ୍ନ କେବେ ପୂରଣ ହେବ ନାହିଁ । କାରଣ ଦେଶର ଲୋକେ ମମତାଙ୍କୁ ପ୍ରଧାନମନ୍ତ୍ରୀ ଭାବେ ଗ୍ରହଣ କରିପାରିବେ ନାହିଁ । ଅନ୍ୟପଟେ ପଶ୍ଚିମବଙ୍ଗ ରାଜନୀତିରେ ୨୦୨୧ ବିଧାନସଭା ନିର୍ବାଚନ ପର୍ଯ୍ୟନ୍ତ ମମତାଙ୍କ ମୁଖ୍ୟ ବିରୋଧୀ ଥିବା ବାମଦଳ ଏବେ ତା’ର ରଣନୀତି ବଦଳାଇବାକୁ ଚେଷ୍ଟା କରିଛି । ସିପିଆଇ(ଏମ) ନେତାମାନେ ତାଙ୍କ ଭାଷଣରେ କହିବା ଆରମ୍ଭ କରିଛନ୍ତି କି ରାଷ୍ଟ୍ରୀୟ ସ୍ତରରେ କ୍ଷମତାକୁ ହଟାଇବାକୁ ସେମାନେ ମମତା ବାନାର୍ଜୀଙ୍କୁ ସମର୍ଥନ କରିପାରନ୍ତି । ଏବେ ଦେଖିବାକୁ ବାକି ରହିଲା କି ମମତା ବାନାର୍ଜୀ ଓ ତାଙ୍କ ଦଳ କିଭଳି ଏହାର ଲାଭ ଉଠାଉଛନ୍ତି ।