କନକ ବ୍ୟୁରୋ : ଏନସିପି ମୁଖ୍ୟ ଶରଦ ପାୱାର ଦଳର ଅଧ୍ୟକ୍ଷ ପଦରୁ ଇସ୍ତଫା ଦେବା ନେଇ ଘୋଷଣା କରିବା ପରେ ଏବେ ମହାରାଷ୍ଟ୍ର ରାଜନୀତି ସରଗରମ ହେବାରେ ଲାଗିଛି । ଏନେଇ ବିଜେପି ତରଫରୁ ମଧ୍ୟ ଲଗାତର ଭାବେ ବୟାନ ଜାରି ରହିଛି । ବିଜେପି ତରଫରୁ ଶିବସେନା ନେତା ସଂଜୟ ରାଉତଙ୍କୁ ଶରଦ ପାୱାରଙ୍କ ପରିବାର ଭିତରେ ଲାଗିଥିବା କଳି ପାଇଁ ଦାୟୀ କରାଯାଉଛି । ଏହାସହ ବିଜେପି କହିଛି କି କେବଳ ଶରଦ ପାୱାରଙ୍କ ପରିବାର ନୁହେଁ ଏହାସହ ଠାକରେ ପରିବାର ବିଭାଜନ ପାଇଁ ମଧ୍ୟ ସଂଜୟ ରାଉତ ଦାୟୀ ।
Kanak News is now on WhatsApp
Join and get latest news updates delivered to you via WhatsApp
ବିଜେପି ନେତା ନିତେଶ ରାଣେ କହିଛନ୍ତି କି, ଶରଦ ପାୱାର ଇସ୍ତଫା ଦେବା ନେଇ ଘୋଷଣା କରିବା ପରେ ସଂଜୟ ରାଉତ ଯେଭଳି ଟ୍ୱିଟ କରିଛନ୍ତି ତାହା ସଂଜୟ ରାଉତଙ୍କ ଶକୁନି ଭୂମିକାର ବଡ ପ୍ରମାଣ । ଏହାସହ ନିତେଶ ରାଣେ କହିଛନ୍ତି କି, ଏତବଡ ଘଟଣା ପରେ ସଂଜୟ ରାଉତ ଶରଦ ପାୱାରଙ୍କୁ ଭେଟିବାକୁ ନଯାଇ କେବଳ ବଡ ବଡ କଥା କହୁଛନ୍ତି । ନିତେଶ ରାଣେ ଏହା ବି କହିବାକୁ ପଛାଇ ନାହାଁନ୍ତି କି ସଂଜୟ ରାଉତ ‘ଆଧୁନିକ ଶକୁନି’ ।
ନିତେଶ ରାଣା କହିଛନ୍ତି କି, ଯେତେବେଳେ ମହାବିକାଶ ଅଘାଡି ମଧ୍ୟରେ ସବୁକିଛି ଠିକ୍ ଠାକ୍ ଚାଲୁଥିଲା ସେତେବେଳେ ବି ସଂଜୟ ରାଉତ ଅଜିତ୍ ପାୱାରଙ୍କ ବିରୋଧରେ ବୟାନ ଦେଉଥିଲେ । ରାଉତଙ୍କ ବୟାନ କାରଣରୁ ଏବେ ଏତେସବୁ ଘଟଣା ଦେଖିବାକୁ ମିଳିଲା ବୋଲି ସେ କହିଛନ୍ତି ।