ରନ୍ଧନ ଗ୍ୟାସ ଦରବୃଦ୍ଧିକୁ ନେଇ ତେଜିଲା ପ୍ରତିବାଦ : ଲୋକଙ୍କ ଅସନ୍ତୋଷକୁ ନେଇ କେନ୍ଦ୍ର ବିରୋଧରେ ଆଜି ରାଜରାସ୍ତାକୁ ଓହ୍ଲାଇବ ବିଜେଡି
କନକ ବ୍ୟୁରୋ : ରନ୍ଧନ ଗ୍ୟାସ ଦରବୃଦ୍ଧିକୁ ନେଇ ଆଜି ରାଜରାସ୍ତାକୁ ଓହ୍ଲାଇବ ବିଜେଡି । ବାରମ୍ବାର ରୋଷେଇ ଗ୍ୟାସ ଦର ବୃଦ୍ଧି କରି କେନ୍ଦ୍ର ସରକାର ରୋଷେଇ ଶାଳ ଉପରେ ମାଡ କରିଛନ୍ତି । ଜନ ଅସନ୍ତୋଷକୁ ନେଇ ଆଜି ରାଜଭବନ ଆଗରେ ବିଜୁ ମହିଳା ଜନତା ଦଳ ବିକ୍ଷୋଭ କରିବ । ରାଜଭବନ ଆଗରେ ବିରୋଧ ପ୍ରଦର୍ଶନ କରିବା ସହ ପ୍ରତିବାଦ ସଭା କରି ବର୍ଦ୍ଧିତ ଗ୍ୟାସ ଦର ପ୍ରତ୍ୟାହାର କରିବାକୁ ଦଳ ଦାବି କରିବ ।
Kanak News is now on WhatsApp
Join and get latest news updates delivered to you via WhatsApp
ଗ୍ୟାସ ବୃଦ୍ଧିକୁ ବିରୋଧ କରି ଗତକାଲି ସାମ୍ବାଦିକ ସମ୍ମିଳନୀରେ ଦଳର ଉପସଭାପତି ତଥା ଖଣ୍ଡପଡ଼ା ବିଧାୟକ ସୌମ୍ୟରଂଜନ ପଟ୍ଟନାୟକ କେନ୍ଦ୍ର ସରକାରଙ୍କ ବିରୋଧରେ ଅସନ୍ତୋଷ ଝାଡ଼ିଛନ୍ତି । ହଠାତ୍ ଗ୍ୟାସ୍ ଦର ୫୦ଟଙ୍କା ବଢ଼ିବା ନିଷ୍ପତ୍ତିକୁ କେହି ଗ୍ରହଣ କରିପାରୁନାହାନ୍ତି। ସବୁ ବର୍ଗର ଲୋକଙ୍କୁ ଏହା ବାଧୁଛି । ଦରବୃଦ୍ଧି ସମସ୍ତଙ୍କୁ କନ୍ଦାଇଲାଣି । ଏମିତି ଲାଗୁଛି, ଯେମିତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚାହୁଁନାହାନ୍ତି ଦେଶରେ ଗରିବ ଲୋକଙ୍କର କଲ୍ୟାଣ ହେଉ। ଗ୍ୟାସ୍ ଦର ହଠାତ୍ କାହିଁକି ବଢ଼ିଲା ସେନେଇ ବିଜେପି କାହିଁକି ଚୁପ୍ ରହିଛି ବୋଲି ପ୍ରଶ୍ନ କରିଛନ୍ତି ।
୨୦୧୪ରେ ମୋଦୀଙ୍କ ନେତୃତ୍ବରେ କେନ୍ଦ୍ରରେ ସରକାର ଆସିବା ପରେ କେନ୍ଦ୍ରର ଉଜ୍ଜ୍ବଳା ଯୋଜନା ସାଧାରଣ ଲୋକଙ୍କୁ ଛୁଇଁଥିଲା । କେନ୍ଦ୍ର ସରକାର ପ୍ରଚାର କଲେ ଯେ ଦେଶର ତଥା ଓଡ଼ିଶାର ମା’ ଭଉଣୀ ଚୁଲି ଫୁଙ୍କି ଆଖିରୁ ଆଉ ଲୁହ ବାହାରିବନି ବୋଲି ଉଜ୍ୱଳା ଯୋଜନାରେ ରିହାତି ଦରରେ ରନ୍ଧନ ଗ୍ୟାସ ସିଲିଣ୍ଡର ଯୋଗାଇ ଦିଆଯାଉଛି । ହେଲେ ଏଲ୍ପିଜି ରନ୍ଧନ ଗ୍ୟାସର ଦର ହୁ ହୁ ହୋଇ ବଢ଼ିବା ଦ୍ବାରା ଓଡ଼ିଶାର ମା’ ଭଉଣୀଙ୍କ ଆଖିରେ କେବଳ ଲୁହ ଆସିନି ବରଂ ସମସ୍ତଙ୍କୁ କଷ୍ଟ ଦେଇଛି ।
୨୦୧୪ରେ ଘରୋଇ ଗ୍ୟାସ୍ ସିଲିଣ୍ଡର ଦର ୪୧୦ଟଙ୍କା ଥିଲା । ଏବେ ୧୧୦୦ ଟଙ୍କାକୁ ବୃଦ୍ଧି ପାଇଛି । ଗତ ୯ବର୍ଷରେ ଗ୍ୟାସ୍ ଦର ପ୍ରାୟ ୩ଗୁଣା ବଢ଼ିବା ସମସ୍ତଙ୍କୁ ବାଧୁଛି । ୨୦୧୪ ବେଳେ ରାଜ୍ୟରେ ୨୧ଲକ୍ଷ ଗ୍ୟାସ୍ ଉପଭୋକ୍ତା ଥିଲେ, କିନ୍ତୁ ଏବେ ୮୮ଲକ୍ଷରୁ ଅଧିକ ଉପଭୋକ୍ତା । ଓଡ଼ିଶାର ୮୦% ଘରେ ଗ୍ୟାସ୍ ଚୁଲା ଜଳୁଛି । ଏତିକି ପରିବାର ଗ୍ୟାସ ବୃଦ୍ଧିକୁ ଗ୍ରହଣ କରିପାରୁ ନାହାନ୍ତି ।