ପୁଟିନଙ୍କ ପରମାଣୁ ଆକ୍ରମଣ ଧମକକୁ ଆମେରିକା ରାଷ୍ଟ୍ରପତିଙ୍କ କଡା ସମାଲୋଚନା : କହିଲେ, ୟୁଏନ ଚାର୍ଟରକୁ ଉଲ୍ଲଙ୍ଘନ କରୁଛି ରୁଷ
କନକ ବ୍ୟୁରୋ : ରୁଷ ରାଷ୍ଟ୍ରପତି ପୁଟିନଙ୍କ ପରମାଣୁ ଆକ୍ରମଣ ଧମକ ପୁଣିଥରେ ସାରା ବିଶ୍ୱରେ ହଲଚଲ ସୃଷ୍ଟି କରିଥିବା ବେଳେ ଆମେରିକା ରାଷ୍ଟ୍ରପତି ଡୋ ବାଇଡେନ୍ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଶଂସା କରିଛନ୍ତି । ସାଂଘାଇ କୋପରେସନ୍ ଅର୍ଗାନାଇଜେସନ୍ ବୈଠକରେ ପୁଟିନଙ୍କୁ ମୋଦୀ କହିଥିଲେ, ଏବେ ଯୁଦ୍ଧାର ଯୁଗ ନୁହେଁ । କୁଟନୀତି, ଆଲୋଚନା ମାଧ୍ୟମରେ ସମସ୍ୟାର ସମାଧାନ ପାଇଁ ମୋଦୀ ଗୁରୁତ୍ୱ ଦେଇଥିଲେ । ମୋଦୀଙ୍କ ଏହି ମନ୍ତବ୍ୟକୁ ଉଲ୍ଲେଖ କରି ବାଇଡେନ୍ କହିଛନ୍ତି, ଶକ୍ତି ପ୍ରୟୋଗ କରି ପଡ଼ୋଶୀ ଉପରେ ଜୟଲାଭ କରିହେବନି ।
Kanak News is now on WhatsApp
Join and get latest news updates delivered to you via WhatsApp
ପୁଟିନଙ୍କୁ ମୋଦୀ ଯେଉଁ ପରାମର୍ଶ ଦେଇଛନ୍ତି, ତାକୁ ଆଗକୁ ବଢ଼ାନ୍ତୁ, ଏବଂ ଯୁଦ୍ଧ ବନ୍ଦ ପାଇଁ ପ୍ରୟାସ କରନ୍ତୁ ବୋଲି କହିଛନ୍ତି ବାଇଡେନ୍ । ସେପଟେ ରୁଷ-ୟୁକ୍ରେନ୍ ଯୁଦ୍ଧର ୭ ମାସ ପରେ ଆମେରିକା ସମେତ ପାଶ୍ଚାତ୍ୟ ଦେଶକୁ ପରମାଣୁ ଆକ୍ରମଣ ନେଇ ସତର୍କ କରିଛନ୍ତି ପୁଟିନ୍ । ଏହା ମିଛ ଧମକ ନୁହେଁ, ତେଣୁ ଏହାକୁ ହାଲୁକା ଭାବେ ନିଅନ୍ତୁ ନାହିଁ ବୋଲି ସେ ଚେତାବନୀ ଦେଇଛନ୍ତି । ପୁଟିନଙ୍କ ଏଭଳି ଧମକ ପରେ ଆମେରିକାର ନ୍ୟୁୟର୍କରେ ବିଶ୍ୱର ନେତାମାନଙ୍କ ଜରୁରୀ ବୈଠକ ବସିଛି ।
ରୁଷ ସହ ଲଢିବା ପାଇଁ ୟୁକ୍ରେନକୁ ସେନା ବ୍ୟତୀତ ଅନ୍ୟ ସମସ୍ତ ସହଯୋଗ କରିବାକୁ ବୈଠକରେ ନିଷ୍ପତ୍ତି ହୋଇଥିବା ସୂଚନା ମିଳିଛି । ପରମାଣୁ ଆକ୍ରମଣ ଧମକକୁ କଡ଼ା ସମାଲୋଚନା କରି ଆମେରିକାର ରାଷ୍ଟ୍ରପତି ଜୋ ବାଇଡେନ୍ କହିଛନ୍ତି, ୟୁଏନ୍ ଚାର୍ଟରକୁ ଉଲଂଘନ କରିଛି ରୁଷିଆ । ସେ କହିଛନ୍ତି, ଅତି ଦାୟତ୍ୱହୀନ ମନ୍ତବ୍ୟ ଦେଉଛନ୍ତି ପୁଟିନ୍ । ଏହା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମନ୍ତବ୍ୟକୁ ପ୍ରଶଂସା କରି ବାଇଡେନ କହିଛନ୍ତି, ଯୁଦ୍ଧ ବନ୍ଦ କରିବା ପାଇଁ ଆଲୋଚନାକୁ ମୋଦୀ ଆଗକୁ ନିଅନ୍ତୁ ।