ବୈପାରୀଗୁଡାରେ ବଡ଼ ଧରଣର ବ୍ୟାଙ୍କ ଠକେଇ: ଆଦିବାସୀ ଜମାକାରୀଙ୍କ ଟଙ୍କା ହଡପ କରି ଅନଲାଇନ୍ ଗେମ୍ ଖେଳୁଥିଲେ ବ୍ୟାଙ୍କ କର୍ମଚାରୀ
କନକ ବ୍ୟୁରୋ: ବଡ଼ ଧରଣର ବ୍ୟାଙ୍କ ଠକେଇ । ଆଉ ଠକେଇ ପଛର ମାଷ୍ଟରମାଇଣ୍ଡ ହେଉଛନ୍ତି ଖୋଦ୍ ବ୍ୟାଙ୍କ କର୍ମଚାରୀ । ନିରିହ ଆଦିବାସୀଙ୍କ ଜମା ଟଙ୍କାକୁ ନେଇ ଅନଲାଇନରେ ଗେମ୍ ଖେଳୁଥିଲେ । କେତେବେଳେ କ୍ରିକେଟରେ ସଟାବାଜି ତ ଆଉ କେତେବେଳେ କସିନୋ ଖେଳ, ଅନେକ ଭିଡ଼ିଓ ଗେମରେ ଲଗାଉଥିଲେ ଟଙ୍କା । ଖେଳରେ ହାରିଗଲା ପରେ ପଦାରେ ପଡ଼ିଲା ବ୍ୟାଙ୍କ ଠକେଇ କାରନାମା । ୮୦ ଲକ୍ଷ ଟଙ୍କା ଠକେଇ ଘଟଣାରେ ବ୍ୟାଙ୍କ ଆକାଉଁଟାଂଟକୁ ପୁଲିସ ଗିରଫ କରିବା ପରେ ପୁରା ଘଟଣା ଉପରୁ ପର୍ଦ୍ଦା ହଟିଛି । ଏମିତି ଠକେଇ ହୋଇଛି କୋରାପୁଟ ଜିଲ୍ଳା ବୈପାରିଗୁଡ଼ା ବ୍ଳକର ଇଣ୍ଡିଆନ ଓଭରସିସ ବ୍ୟାଙ୍କରେ ।
Kanak News is now on WhatsApp
Join and get latest news updates delivered to you via WhatsApp
ବ୍ୟାଙ୍କରୁ ୮୦ ଲକ୍ଷ ଟଙ୍କା ହଡପ ହୋଇଥିବା ନେଇ ବ୍ୟାଙ୍କ ଶାଖା ପରିଚଳାକ ପ୍ରବୀର କୁମାର ପ୍ରଧାନ ବୈପାରୀଗୁଡା ଥାନାରେ ଲିଖିତ ଅଭିଯୋଗ କରିଛନ୍ତି । ଏନେଇ ଆଇଓବି ବ୍ୟାଙ୍କ ଶାଖାର ଆକାଉଂଟଟେଣ୍ଡ ସନ୍ତୋଷ କୁମାର ଦୋରା ୮୦ ଲକ୍ଷ ଟଙ୍କା ହଡପ କରିଥିବା ସ୍ୱିକାର ମଧ୍ୟ କରିଛନ୍ତି । ବ୍ୟାଙ୍କ ଶାଖା ପରିଚାଳକ ମାସେ ପାଇଁ ଛୁଟିରେ ଥିବାବେଳେ ହିତାଧିକାରୀଙ୍କ ଜମାଖାତାରୁ ଟଙ୍କା ହେରଫେର କରିଥିଲେ ଆକାଉଂଟାଂଟ ସନ୍ତୋଷ କୁମାର ଦୋରା । ବ୍ରାଂଚ ମ୍ୟାନେଜର ଛୁଟିରୁ ଫେରିବା ପରେ ଟଙ୍କା ହେରଫେର ବାବଦରେ ଜାଣିବାକୁ ପାଇଥିଲେ । ଅଭିଯୋଗକୁ ଆଧାର କରି ବାଲିଗୁଡା ପୋଲିସ ଆକାଉଂଟାଂଟ ସନ୍ତୋଷ ଦୋରାଙ୍କୁ ଗିରଫ କରିଛି । ତେବେ ବ୍ୟାଙ୍କରେ ଠକେଇ ଖବର ଜଣାପଡିବା ପରେ ଜମାକାରୀମାନେ ନିଜ ଜମାଟଙ୍କା ଉଠାଇ ନେଉଛନ୍ତି ।