କନକ ବ୍ୟୁରୋ : ଶ୍ରୀଲଙ୍କା ପରେ ଏବେ ବାଂଲାଦେଶରେ ଦେଖିବାକୁ ମିଳିଛି ଆର୍ଥିକ ସଂକଟ । ଏଠାରେ ସରକାରୀ ରାଜକୋଷ ଦିନକୁ ଦିନ ସରି ଆସୁଥିବା ବେଳେ ବୈଦେଶିକ ଋଣଭାର ବଢିବାରେ ଲାଗିଛି । ଏହାକୁ ନଜରରେ ରଖି ବାଂଲାଦେଶ ସରକାର ଏକ କଠୋର ନିଷ୍ପତ୍ତି ନେଇଛନ୍ତି । ଏହି କ୍ରମରେ ଗତକାଲି ବାଂଲାଦେଶ ସରକାର ଦେଶରେ ପେଟ୍ରୋଲ ଦାମକୁ ଗୋଟିଏ ଥରରେ ୫୧.୭ ପ୍ରତିଶତ ବୃଦ୍ଧି କରିଛନ୍ତି । କେବଳ ପେଟ୍ରୋଲ ନୁହେଁ ଡିଜେଲର ଦାମ ବି ୪୨ ପ୍ରତିଶତ ବୃଦ୍ଧି କରିଛନ୍ତି । ଏହାପରେ ଦେଶରେ ପତ୍ୟେକ ସାମଗ୍ରୀର ମୂଲ୍ୟବୃଦ୍ଧି ଆରମ୍ଭ ହୋଇଯାଇଛି । କୁହାଯାଉଛି କି ଇନ୍ଧନର ମୂଲ୍ୟ ବୃଦ୍ଧି ଫଳରେ ବାଂଲାଦେଶର ସରକାରଙ୍କ ଉପରେ ରିହାତି ବୋଝ କମିବ ବୋଲି ଆଶଂକା କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ମହଙ୍ଗାମାଡରୁ ମୁକ୍ତି ପାଇବାକୁ ବାଂଲାଦେଶ ସରକାର ଆଇଏମଏଫ ସମେତ ଅନେକ ଅର୍ନ୍ତରାଷ୍ଟ୍ରୀୟ ସଂସ୍ଥାଙ୍କ ଠାରୁ ଋଣ ନେଇଛି । ସେପଟେ ସାରା ବିଶ୍ୱରେ ଦରବୃଦ୍ଧି ଫଳରେ ବାଂଲାଦେଶର ଆମଦାନୀ ଦେୟ ମଧ୍ୟ ବଢିଛି । ଏହି କାରଣରୁ ଏବେ ଦେଶର ଅର୍ଥବ୍ୟବସ୍ଥା ଚାପରେ ରହିଛି । ସେପଟେ ଏଭଳି ମୂଲ୍ୟବୃଦ୍ଧି ପରେ ବାଂଲାଦେଶରେ ପେଟ୍ରୋଲ ଲିଟର ପିଛା ୧୩୦ ଟାକା (ଭାରତୀୟ ମୁଦ୍ରାରେ ୧୦୮.୪୪) ଓ ଡିଜେଲର ଦାମ ୧୧୪ ଟାକା (ଭାରତୀୟ ମୁଦ୍ରାରେ ୯୫.୧୧) କୁ ବୃଦ୍ଧି ପାଇଛି । ୧୯୭୧ ମସିହାରେ ବାଂଲାଦେଶ ସ୍ୱାଧୀନ ହେବା ପରେ ପ୍ରଥମଥର ପାଇଁ ଦେଶରେ ଇନ୍ଧନର ମୂଲ୍ୟ ଏଭଳି ଭାବେ ବୃଦ୍ଧି କରିବାକୁ ସରକାର ବାଧ୍ୟ ହୋଇଛନ୍ତି ।
ଅନ୍ୟପଟେ ବାଂଲାଦେଶ ସରକାର ଦେଶର ନିମ୍ନଗାମୀ ଆର୍ଥିକ ସ୍ଥିତିକୁ ଗ୍ରହଣ କରିବାକୁ ରାଜି ହୋଇ ନାହାଁନ୍ତି । ସରକାରୀ ବୟାନ ମୁତାବକ ଅନ୍ତର୍ଜାତୀୟ ବଜାରରେ ଅଶୌଦ୍ଧିତ ତୈଳମୂଲ୍ୟ ବୃଦ୍ଧି କାରଣରୁ ଦେଶରେ ଇନ୍ଧନର ମୂଲ୍ୟ ବୃଦ୍ଧି କରାଯାଇଛି । ଏହାସହ ସରକାର କହିଛନ୍ତି କି, ଗତ ୬ ମାସ ମଧ୍ୟରେ ଦେଶର ସରକାରୀ ପେଟ୍ରୋଲିୟମ କମ୍ପାନୀ ବାଂଲାଦେଶ ପେଟ୍ରୋଲିୟମ କର୍ପୋରେଶନ ୮ ଆରବ ଟାକା କ୍ଷତି କରିଛି । ବାଂଲାଦେଶ ଶକ୍ତି ଓ ଖଣିଜସଂମ୍ପଦ ମନ୍ତ୍ରୀ ନସରୂଲ ଅହମ୍ମଦ କହିଛନ୍ତି ଯେ ଏଭଳି ଦରବୃଦ୍ଧି ସାଧାରଣ ଲୋକଙ୍କ ପାଇଁ କଷ୍ଟକର ହୋଇପାରେ କିନ୍ତୁ ଏହା ବ୍ୟତୀତ ସରକାରଙ୍କ ପାଖରେ କିଛି ଉପାୟ ନଥିଲା ।