ଧରାପଡିଲା ଭୁବନେଶ୍ୱର ଉପକଣ୍ଠ ବାଲିଅନ୍ତା ହତ୍ୟାକାଣ୍ଡର ଖଳନାୟକ । ମାମୁନ୍ ରାଉତରାୟକୁ ଗିରଫ କଲା ପୋଲିସ, ପାରିବାରିକ କଳହ ନେଇଥିଲା ହତ୍ୟାକାଣ୍ଡର ରୂପ ।
କନକ ବ୍ୟୁରୋ : ଭୁବନେଶ୍ୱର ଉପକଣ୍ଠ ବାଲିଅନ୍ତା ହତ୍ୟାକାଣ୍ଡର ପର୍ଦ୍ଦାଫାସ କରିଛି କମିଶନରେଟ୍ ପୋଲିସ । ସାନଭାଇକୁ ହତ୍ୟା କରିଛି ବଡ ଭାଇ । ଗତକାଲି ଭାଇରାଲ୍ ହୋଇଥିବା ମୋବାଇଲ୍ ଭିଡିଓରେ କଟୁରୀ ଧରି ରାସ୍ତା ଉପରେ ବୁଲୁଥିବା ଯୁବକ ହିଁ ହତ୍ୟାକାରୀ ବୋଲି ପୋଲିସ ସ୍ପଷ୍ଟ କରିଛି । ତେବେ ପୋଲିସ କହିଛି, ମୃତକ ସାନଭାଇ ପ୍ରୀତମ ରାଉତରାୟଙ୍କ ନାଁରେ ପୂର୍ବରୁ ମାମଲା ରହିଥିଲା । ଏବଂ କିଛି ଦିନ ତଳେ, ସେ ତାଙ୍କ ବାପା ଏବଂ ଅଭିଯୁକ୍ତ ବଡ ଭାଇଙ୍କୁ ହତ୍ୟା ଧମକ ଦେଇଥିଲା ।
Kanak News is now on WhatsApp
Join and get latest news updates delivered to you via WhatsApp
ବିଚ୍ ରାସ୍ତାରେ କଟୁରୀ ଧରି ବେଫିକର ଭାବେ ବୁଲୁଥିବା ଏହି ବ୍ୟକ୍ତି ହିଁ ବାଲିଅନ୍ତା ନୃଶଂସ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ । ଯିଏ, ଅତି ନିର୍ଦୟ ଭାବେ ରାସ୍ତା ଉପରେ ନିଜ ସାନଭାଇକୁ ଗୋଡାଇ ଗୋଡାଇ ହତ୍ୟା କରିଛି । ସ୍ରଷ୍ଟା ରାଉତରାୟ ଓରଫ୍ ମାମୁନ୍ । ବାଲିଅନ୍ତା ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ।
୭ ଜୁନ୍ ୨୦୧୯ । ଶୁକ୍ରବାର ଅପରାହ୍ନ । ଭୁବନେଶ୍ୱର ଉପକଣ୍ଠ ବାଲିଅନ୍ତାର ପଂଚମୁଖୀ ବିହାର ଆପାର୍ଟମେଂଟରେ ରହୁଥିବା ବାପାଙ୍କ ଘରକୁ ଆସିଥିଲା ମୃତକ ପ୍ରୀତମ । ନିଶାସକ୍ତ ଅବସ୍ଥାରେ ବାପାଙ୍କୁ ସବୁଥର ଭଳି ଟଙ୍କା ମାଗିଥିଲା । ତେବେ ବଡ ଭାଇ ମାମୁନ୍ ସଫା ସଫା ମନା କରିଦେଇଥିଲେ । ଦୁଇ ଭାଇଙ୍କ ମଧ୍ୟରେ ପ୍ରବଳ ପାଟିତୁଣ୍ଡ ପରେ ହାତାହାତି ବି ହୋଇଥିଲା । ଏହାପରେ ସାନ ଭାଇ ପ୍ରୀତମଙ୍କୁ ଖଣ୍ଡାରେ ହାଣି, ଆପାର୍ଟମେଂଟ ନିକଟରେ ଥିବା ଏକ ନିର୍ମାଣଧୀନ ପାଇଖାନା ଟାଙ୍କିରେ ରକ୍ତାକ୍ତ ଅବସ୍ଥାରେ ଫିଙ୍ଗି ଚାଲିଯାଇଥିଲେ ଅଭିଯୁକ୍ତ ବଡ ଭାଇ ମାମୁନ ରାଉତରାୟ ।
ହତ୍ୟା ପଛରେ ପାରିବାରିକ କଳହ । ବାପା ଓ ବଡ ଭାଇଙ୍କୁ ହତ୍ୟା ଧମକ ଦେଇଥିଲା ପ୍ରୀତମ । ପୋଲିସକୁ ପରିବାର ଓ ପଡୋଶୀ ମାନେ ଦେଇଥିବା ବୟାନ ଅନୁସାରେ, ମୃତ ସାନଭାଇ ପ୍ରୀତମଙ୍କ ଚରିତ୍ର ଠିକ୍ ନଥିଲା । ପରିବାର ଲୋକଙ୍କୁ ସେ ବାରମ୍ବାର ଟଙ୍କା ମାଗୁଥିଲା ଏବଂ ନଦେଲେ ମାଡ ମାରୁଥିଲା । ପ୍ରୀତମ ଅବିବାହିତ ଥିବା ବେଳେ ସବୁଦିନ ନିଶାସକ୍ତ ରହୁଥିିଲା । ଏପରିକି ଦୁଇ ଦିନ ତଳେ ଘରକୁ ଆସି ବାପା ଓ ବଡ ଭାଇଙ୍କୁ ହତ୍ୟା କରିବ ବୋଲି ଧମକ ଦେଇଥିଲା । ଦୀର୍ଘଦିନ ଧରି ପରିବାରରେ ଲାଗିରହିଥିବା କଳହ ଶେଷରେ ହତ୍ୟାକାଣ୍ଡର ରୂପ ନେଇଛି ।