କନକ ବ୍ୟୁରୋ : ବୈଜୟନ୍ତ ପଣ୍ଡା । କେନ୍ଦ୍ରାପଡା ସାଂସଦ । ବିଜେଡି ରାଜନୀତିରେ ଏବେ ଅବୁଝା ପୁଅ । ଏକଦା ନବୀନଙ୍କ ଏକାନ୍ତ ଅନୁଗତ ତଥା ଅତି ନିକଟତର ଥିବା ବୈଜୟନ୍ତ ଆଜି ବିଜେଡି ପାଇଁ ବୋଝ ପାଲଟିଛନ୍ତି । ଦଳ ଭିତରେ ରହି ଦଳ ପାଇଁ ଅଡୁଆ ତିଆରି କରୁଥିବା ଏହି ନେତା ଏବେ ଚର୍ଚ୍ଚାରେ । ପେଟ୍ରୋଲ ଦର ବୃଦ୍ଧି ବିରୋଧରେ ବିଜୁ ଜନତା ଦଳ ୫ ଘଂଟିଆ ହରତାଳ କରିଥିବା ବେଳେ ଏହାକୁ ଖୋଲାଖୋଲି ସମାଲୋଚନା କରିଛନ୍ତି ସାଂସଦ । ଏପରିକି ଦଳର କ୍ଷମତା କେନ୍ଦ୍ରକୁ ମଧ୍ୟ ପରୋକ୍ଷରେ ଟାର୍ଗେଟ୍ କରିଛନ୍ତି କେନ୍ଦ୍ରାପଡାର ଏହି ସାଂସଦ ।
Kanak News is now on WhatsApp
Join and get latest news updates delivered to you via WhatsApp
ବୈଜୟନ୍ତ ଟ୍ୱିଟ୍ କରି ବିଜେଡିର ଦୁଇଟି ଚେହେରାକୁ ସାମ୍ନାକୁ ଆଣିଛନ୍ତି । ୨୦୧୦ର ଗୋଟିଏ ଫଟୋ ପୋଷ୍ଟ କରି ବୈଜୟନ୍ତ ଲେଖିଛନ୍ତି, କିଛି ଏଭଳି ଢଙ୍ଗରେ ଆମେ ଆନ୍ଦୋଳନ କରୁଥିଲୁ, ଯାହା ଥିଲା ପ୍ରକୃତ ବିଜେଡି । ଆଉ ଆଜିର ଅନ୍ୟ ଗୋଟିଏ ଫଟୋ ପୋଷ୍ଟ କରି ବୈଜୟନ୍ତ ଲେଖିଛନ୍ତି, ଲୋକ ବିରୋଧୀ ଗୁଣ୍ଡାଗର୍ଦ୍ଦି । ବୈଜୟନ୍ତଙ୍କ ଏହି ଟ୍ୱିଟ୍ ଅନେକ ବିବାଦ ଆଉ ପ୍ରଶ୍ନ ତିଆରି କରିଛି । ପ୍ରଶ୍ନ ଉଠୁଛି, ପ୍ରକୃତ ବିଜେଡି ଆଉ ଆଜିର ବିଜେଡି ଭିତରେ ସେ ଦେଖୁଥିବା ଫରକ୍ ପାଇଁ କିଏ ଉତ୍ତରଦାୟୀ? ଏଥିପାଇଁ ମୁଖ୍ୟମନ୍ତ୍ରୀଙ୍କୁ ସେ ପରୋକ୍ଷରେ ସମାଲୋଚନା କରୁନାହାନ୍ତି ତ?
ସେହିଭଳି ବୈଜୟନ୍ତ ଆଉ ଏକ ଟ୍ୱିଟ୍ କରି କହିଛନ୍ତି, ଏହା ସେହି ଦଳ ନୁହେଁ, ଯାହାକୁ ଗଠନ କରିବାକୁ ୨୦ ବର୍ଷ ପୁର୍ବେ ମୁଁ ନବୀନ ପଟ୍ଟନାୟକଙ୍କୁ ସହଯୋଗ କରିଥିଲି । ଆଜି ଏଭଳି କାର୍ଯ୍ୟକୁ ଦେଖି ମୁଁ ଲଜ୍ଜିତ ଅନୁଭବ କରୁଛି, କ୍ରୋଧ ବି ଆସୁଛି । ବିଜୁ ବାବୁଙ୍କର ମଧ୍ୟ ଏଭଳି ଅନୁଭବ କରିଥାନ୍ତେ । ଏସି ରୁମରେ ଆରାମରେ ବସି ଷ୍ଟ୍ରାଟେଜୀ ତିଆରି କରୁଥିବା ବ୍ୟକ୍ତି ହଟିବା ଦରକାର । ଏହାର ସମୀକ୍ଷା କଲେ ଗୋଟିଏ କଥା ସ୍ପଷ୍ଟ, କେନ୍ଦ୍ରାପଡା ସାଂସଦଙ୍କ ଟାର୍ଗେଟରେ ତୃତୀୟ ମହଲା । ବିଜେଡିର ପୁଂଜି ଅର୍ଥାତ୍ ବିଜୁ ବାବୁଙ୍କ ନାଁ ଆଣି, ବୈଜୟନ୍ତ ଗୋଟିଏ କଥା ପ୍ରମାଣିତ କରିବାକୁ ଚେଷ୍ଟା କରୁଛନ୍ତି, ଯେ ଧୀରେ ଧୀରେ ନୀତି ଆଦର୍ଶଠାରୁ ଦୁରେଇ ଯାଉଛି । ଯେଉଁ ନୀତି ଅଦାର୍ଶରେ ବିଜୁ ବାବୁ ବିଶ୍ୱାସ କରୁଥିଲେ, ଦଳ ସେଥିରୁ ଦୁରେଇ ଯାଉଛି ।
ଏଭଳି ସାଂଘାତିକ ପ୍ରତିକ୍ରିୟା ଦଳକୁ ଅଡୁଆରେ ପକାଇଛି । ହରତାଳକୁ ଲଜ୍ଜାଜନକ ଘଟଣା ଭାବେ ବର୍ଣ୍ଣନା କରିବା ସହ ନିଜକୁ ହରତାଳରୁ ଦୁରେଇ ରଖିଥିବା କଥା ସେ କହିଛନ୍ତି । ହରତାଳ ନାଁରେ ଆତଙ୍କ ସୃଷ୍ଟି କରିଥିବା ଗୁଣ୍ଡାମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବା ଦରକାର ବୋଲି ସେ କହିଛନ୍ତି । ଅର୍ଥାତ୍ ବିଜୁ ଜନତା ଦଳର ନେତା ଯେତେବେଳେ ଏହାକୁ ସଫଳ ହରତାଳ କହୁଛନ୍ତି, ସେତେବେଳେ ସାଂସଦ ଏହି କାର୍ଯ୍ୟକୁ ଗୁଣ୍ଡାମୀ ସହ ତୁଳନା କରିଛନ୍ତି ।
ପ୍ରଶ୍ନ ଉଠୁଛି, ଏଭଳି କଡା ଆଭିମୁଖ୍ୟ କାହିଁକି ପୋଷଣ କରୁଛନ୍ତି ସାଂସଦ । ଦଳ କଣ ପ୍ରକୃତରେ ସଠିକ ଭାବେ ଚାଲିନି? ଦଳ କଣ ନୀତି ଆଦର୍ଶରୁ ଦୁରେଇ ଯାଇଛି? ବିଜୁ ବାବୁଙ୍କ ଆଦର୍ଶରୁ କଣ ନବୀନ ବାବୁ ଦୁରେଇ ଗଲେଣି? ବୈଜୟନ୍ତଙ୍କ ଟ୍ୱିଟ୍ ପରେ ଏଭଳି ପ୍ରଶ୍ନ ଉଠିବା ସ୍ୱାଭାବିକ କଥା । କାରଣ ଗୋଟିଏ ସମୟ ଥିଲା ବୈଜୟନ୍ତ ପଣ୍ଡା ଓ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ସଂପର୍କ ବେଶ ନିବିଡ ଥିଲା । ହେଲେ ଏବେ କିନ୍ତୁ କେହି କାହାରିକୁ ଗ୍ରହଣ କରିବା ପାଇଁ ପ୍ରସ୍ତୁତ ନୁହଁନ୍ତି । ଲଗାତର ଭାବେ ଦଳୀୟ ନୀତି ଆଉ ନିଷ୍ପତ୍ତିକୁ ବୈଜୟନ୍ତ ବିରୋଧ କରୁଛନ୍ତି ।
ଗତ କିଛି ଦିନ ଧରି ରାଜନୈତିକ ଦୃଷ୍ଟିକୋଣରେ ବୈଜୟନ୍ତଙ୍କ ଆଚରଣ ଓ ଉଚ୍ଚାରଣ ଦେଖିଲେ ଜଣାପଡୁଛି, ଦଳୀୟ ସ୍ତରରେ ନିଜ ଓଜନ ଧୀରେ ଧୀରେ ହରାଉଛନ୍ତି କେନ୍ଦ୍ରାପଡାର ସାଂସଦ । ବିଜେଡିକୁ ସମାଲୋଚନା କରିବା ଓ ମୋଦି ନୀତିକୁ ପ୍ରଶଂସା କରିବା କାରଣରୁ ବିବାଦ ଭିତରକୁ ଆସିବା ସହ ନବୀନଙ୍କ ଠାରୁ ଦୂରତା ବଢିଥିଲା । ସବୁଠାରୁ ବଡ କଥା ଥିଲା, ଯେତେବେଳେ ନିଜ ନିର୍ବାଚନ ମଣ୍ଡଳୀରେ ଅଣ୍ଡାମାଡ ଖାଇ ଲଜ୍ଜିତ ହୋଇଥିଲେ ବୈଜୟନ୍ତ । ସାଂସଦ ପାଂଠିରୁ ଅର୍ଥ ଖର୍ଚ୍ଚ କରି ତିଆରି କରିଥିବା ପ୍ରକଳ୍ପ ଉଦଘାଟନ କରିବାକୁ ଯେତେବେଳେ ବୈଜୟନ୍ତ ମାହାଙ୍ଗା ଯାଇଥିଲେ ସେତେବେଳେ ବିଜେଡି କର୍ମୀ ତାଙ୍କୁ ଅଣ୍ଡାମାଡ କରିଥିଲେ । ଆଉ ଏହାପରେ ରାଗିପାଚି ଲାଲ୍ ହୋଇଯାଇଥିବା ସାଂସଦ ଛାଡିଥିଲେ ଟ୍ୱିଟ୍ ବାଣ । ଟାର୍ଗେଟ କରିଥିଲେ କିଛି ପ୍ରଶାସକଙ୍କୁ । କିଭଳି ବିଜୁ ଜନତା ଦଳ ଅଫିସରଙ୍କ ନିୟନ୍ତ୍ରଣକୁ ଚାଲିଯାଉଛି, ସେନେଇ କରିଥିଲେ ଟ୍ୱିଟ୍ । ଆଉ ଆଜି ମଧ୍ୟ ଠିକ ସମାନ ଢଙ୍ଗରେ ଦଳୀୟ କାର୍ଯ୍ୟଶୈଳୀକୁ ନେଇ ପ୍ରଶ୍ନ ଉଠାଇଛନ୍ତି ବୈଜୟନ୍ତ ।
ଦଳ ବିରୋଧରେ ମନ୍ତବ୍ୟ ଓ ଲେଖା ଲେଖିବା କାରଣରୁ ନବୀନ ବୈଜୟନ୍ତଙ୍କୁ ପୂର୍ବରୁ ଲୋକସଭାରେ ଦଳୀୟ ମୁଖପାତ୍ର ପଦରୁ ମଧ୍ୟ ହଟାଇଥିଲେ । ଯାହା ତାଙ୍କ ପାଇଁ ବେଶ ଅପମାନଜନକ ମଧ୍ୟ ଥିଲା । ମୁଖପାତ୍ର ପଦରୁ ହଟିବା ପରେ ନବୀନଙ୍କୁ ସିଧାସଳଖ ସମାଲୋଚନା ନକରି କହିଥିଲେ, ଅନ୍ୟ ସାଂସଦ ଖବରକାଗଜରେ ଲେଖା ଲେଖୁଥିଲେ ବି ସେମାନଙ୍କ ବିରୋଧରେ ନିଆଯାଉନି କାର୍ଯ୍ୟାନୁଷ୍ଠାନ । ଏଥିସହ କହିଥିଲେ, ଯଦି ବିଜେଡି ସୁପ୍ରିମୋ ଏହି ନିଷ୍ପତି ନେଇଥାନ୍ତି ତାହେଲେ ସ୍ୱାଗତ କରିବି । ଅର୍ଥାତ୍ ନିଷ୍ପତି ପଛରେ ଆଉ କାହା ହାତ ଥାଇପାରେ ବୋଲି ସେ ଇଙ୍ଗିତ କରିଥିଲେ ।
ଏବେ ନଜର ପକାନ୍ତୁ, ଗତ କିଛି ଦିନ ଧରି କିଭଳି ରହିଥିଲା ବୈଜୟନ୍ତଙ୍କ ବିବାଦୀୟ ମତ ଓ ମନ୍ତବ୍ୟ ।
– ଯାଜପୁର ନେତା ଅମର ନାୟକ ଓ କୋରାପୁଟ ବିଜେଡିରୁ ନିଲମ୍ବିତ ନେତା ଜୟରାମ ପାଙ୍ଗି ବିଜେପିରେ ଯୋଗଦେବା ପରେ ଟ୍ୱିଟ କରି ବୈଜୟନ୍ତ କହିଥିଲେ, ଏନେଇ ସେ ସପ୍ତାହେ ପୂର୍ବରୁ ଚେତାଇଥିଲେ କିନ୍ତୁ କିଛି ହେଲା ନାହିଁ । ମନ୍ତ୍ରିମଣ୍ଡଳରେ ଅନେକ ଜିଲ୍ଲାର ନେତା ସ୍ଥାନ ନପାଇବାରୁ ଅସନ୍ତୋଷ ବଢୁଛି ।
– କନ୍ଧମାଳ ବାଲିଗୁଡାରେ ବୈଜୟନ୍ତ କହିଥିଲେ ବିଜେଡିରୁ ଯେଉଁମାନଙ୍କୁ ବିଦା କରାଯାଇଛି ସେମାନଙ୍କ ବିରୋଧରେ କରାଯାଇଥିଲା ଷଡଯନ୍ତ୍ର ।
– ପଂଚାୟତ ନିର୍ବାଚନ ଫଳାଫଳ ପରିପ୍ରେକ୍ଷୀରେ ବୈଜୟନ୍ତଙ୍କ ଖବରକାଗଜ ଲେଖା ଥିଲା ଖୁବ କଡା । ଦଳରେ ଆତ୍ମସମୀକ୍ଷା କଥା କହି ସୁପ୍ରିମୋଙ୍କୁ ସଚେତନ କରାଇବାକୁ ଚାହିଁଥିଲେ । କିପରି ଦଳ ଗଢିଥିବା ନେତାଙ୍କୁ ଅଣଦେଖା କରାଯାଉଛି ତାହା ମଧ୍ୟ ଉଲ୍ଲେଖ କରିଥିଲେ କେନ୍ଦ୍ରାପଡ଼ା ସାଂସଦ ।
– ଏହାପରେ ଟ୍ୱିଟ ସିରିଜ ଜରିଆରେ ସଫେଇ ରଖିଥିଲେ, ଦଳରେ ଆତ୍ମସମୀକ୍ଷା କଥା କହି ସୁପ୍ରିମୋଙ୍କୁ ସଚେତନ କରାଇବାକୁ ଚାହିଁଥିଲି । ହେଲେ ଦଳରେ କିଛି ନ୍ୟସ୍ତସ୍ୱାର୍ଥ ବ୍ୟକ୍ତି ବିଭ୍ରାଟ ସୃଷ୍ଟି କରିବାକୁ ଉଦ୍ୟମ କରୁଛନ୍ତି । ନବୀନ ପଟ୍ଟନାୟକ ଏହାକୁ ଚିହ୍ନଟ କରିବା ସହ ଜରୁରୀ ପଦକ୍ଷେପ ନେଇ ଦଳର ପ୍ରକୃତ ଶକ୍ତିର ଅଭ୍ୟୁଦୟ କରିବେ ।
– ବିଜେଡିର ଆଉ ଜଣେ ସାଂସଦ ତଥାଗତ ଶତପଥୀଙ୍କ ସହ ଟ୍ୱିଟର ଲଢେଇକୁ ଓହ୍ଲାଇ ଆସିଥିଲେ ବୈଜୟନ୍ତ । ବିଜେଡି ବିଭାଜନ ନେଇ ଦିଲ୍ଲୀରେ କିଛି ନେତା ପ୍ରୟାସ କରୁଛନ୍ତି ବୋଲି ତଥାଗତଙ୍କ ଟ୍ୱିଟରରେ ଲେଖିଥିବା ବେଳେ, ବୈଜୟନ୍ତ ଏହାକୁ ନିଜ ଉପରକୁ ନେଇ ତଥାଗତଙ୍କୁ ପରୋକ୍ଷରେ ଲେଖିଥିଲେ, ତାଙ୍କୁ ଦଳରୁ ନିଲମ୍ବିତ କରାଯାଇଥିଲା ।
– ଅଫିସରଙ୍କ ସ୍ୱଛତା ଉପରେ ବୈଜୟନ୍ତ ଉଠାଇଥିଲେ ସବୁଠାରୁ ବଡ ପ୍ରଶ୍ନ । ଅନ୍ୟ ରାଜ୍ୟ ଭଳି ଓଡ଼ିଶାର ଆଇଏଏସ ଅଫିସର ନେତାଙ୍କ ସହ ମିଶି ଲୁଟ୍ କରୁଛନ୍ତି । ତାଙ୍କୁ ବାହାର କରାଯିବା ଦରକାର । ଜଣେ ବ୍ୟକ୍ତି ଟ୍ୱିଟ୍ କରିଥିଲେ, କର୍ଣାଟକର ମାଇନିଂ ସ୍କାମରେ ଆଇଏଏସ ଅଫିସର ଲାଂଚ ନେଇ ନିଜ ପୁଅର ବିଳାସ ବ୍ୟସନ ପାଇଁ ଖର୍ଚ୍ଚ କରିଥିଲେ । ଏହାରି ଉପରେ ଟ୍ୱିଟ୍ କରି କେନ୍ଦ୍ରାପଡ଼ା ସାଂସଦ ଲେଖିଥିଲେ, ର୍ଦୁଭାଗ୍ୟର କଥା ଏଭଳି ଆଇଏଏସ ଅଫିସର ଓଡ଼ିଶାରେ ମଧ୍ୟ ଅଛନ୍ତି । ସେମାନଙ୍କୁ ବାହାର କରିବା ଦରକାର । ନବୀନ ଯେପରି ମନ୍ତ୍ରୀ ମଣ୍ଡଳ ଅଦଳ ବଦଳ କଲେ ସେହିପରି ଆଇଏଏସଙ୍କ ଉପରେ କାର୍ଯ୍ୟାନୁଷ୍ଠାନ ଦରକାର । ଦଳ ଓ ସରକାର ଭଳି ଆଇଏଏସଙ୍କ ଉପରେ ମଧ୍ୟ ପଦକ୍ଷେପ ଜରୁରୀ ।
ଏଭଳି କିଛି ବିବାଦୀୟ ମତ ଆଉ ମନ୍ତବ୍ୟକୁ ନେଇ କୁହାଯାଉଥିଲା, ରାଜ୍ୟରେ ବିଜେପିର ବଢୁଥିବା ଶକ୍ତି ଆଉ ବୈଜୟନ୍ତଙ୍କ ଦଳ ଭିତରେ କମୁଥିବା ଲୋକପ୍ରିୟତା ତାଙ୍କୁ ପଦ୍ମ ପୋଖରୀ ଆଡେ ଢଳିବାକୁ ବାଧ୍ୟ କରୁଛି । ଆଉ ରିପବ୍ଲିକ୍ ଟିଭିର ଏହି ଖବର ରାଜନୀତିରେ ହଇଚଇ ଆଣିଛି ।
କିଛି ଦିନ ଆଗରୁ ଜାତୀୟ ଗଣମାଧ୍ୟମ ରିପବ୍ଲିକ ଟିଭିରେ ଖବର ପ୍ରକାଶ ପାଇଥିଲା, ଖୁବଶୀଘ୍ର ବିଜେଡି ଛାଡି ବିଜେପିରେ ଯୋଗଦେଇପାରନ୍ତି ବୈଜୟନ୍ତ ପଣ୍ଡା । ଯାହାକୁ ନେଇ ଢେର ଚର୍ଚ୍ଚା ବି ହେଲା । ହେଲେ ଏନେଇ ଅସମ୍ଭବ ନୀରବତା ଅବଲମ୍ବନ କରିଥିଲେ କନ୍ଦ୍ରୋପଡା ସାଂସଦ । ଆଗକୁ ବିଜେପିରେ ମିଶିବାକୁ ଯୋଜନା କରୁଛନ୍ତି କି ବୈଜୟନ୍ତ? ମୁଖପାତ୍ର ପଦରୁ ବିଦା ହେବା ପରେ ଗଣମାଧ୍ୟମ କେନ୍ଦ୍ରାପଡା ସାଂସଦଙ୍କ ସାମ୍ନାରେ ରଖିଥିଲା ଏହି ବଡ ପ୍ରଶ୍ନ । ସେତେବେଳେ ବୈଜୟନ୍ତ କହିଥିଲେ, ଦଳକୁ ସୁଦୃଢ କରିବା ହେଉଛି ତାଙ୍କର ଲକ୍ଷ୍ୟ । ଦଳର ପ୍ରତିଷ୍ଠା ଦିନଠାରୁ ସେ ଦଳରେ ଅଛନ୍ତି । ଦଳର ଉତଥାନ ଦେଖିଛନ୍ତି । ଏବେ ଦଳ ଯେତେବେବେଳେ ଅସୁବିଧାରେ ପଡିଛି ସେ ଦଳକୁ ପରାମର୍ଶ ଦେଉଥିଲେ ।
ତେବେ ବିଜେଡିର ହରତାଳ ଡାକରାକୁ ନେଇ ବୈଜୟନ୍ତ ଯେଉଁଭଳି ଟ୍ୱିଟ୍ କଲେ ତାପରେ ବିଜେଡିର ଟପ୍ ନେତୃତ୍ୱଙ୍କ ଉପରେ ଏବେ ସମସ୍ତଙ୍କ ନଜର । ବୈଜୟନ୍ତଙ୍କ ବିରୋଧରେ କିଛି କାର୍ଯ୍ୟାନୁଷ୍ଠାନ ନେବାକୁ ନବୀନ ପଦକ୍ଷେପ ଗ୍ରହଣ କରିବେ କି? ତେବେ ସୂଚନା କହୁଛି, ବର୍ତ୍ତମାନ ପରିସ୍ଥିତିରେ ବିଜେଡିର ଅନ୍ଦର ମହଲ ଏଭଳି କିଛି ଯୋଜନା କରୁନାହିଁ । ବିଜେଡିର ଗୋଟିଏ ଗୋଷ୍ଠୀର ଯୁକ୍ତି ହେଉଛି, ବୈଜୟନ୍ତ ପଣ୍ଡା ଏଭଳି ଆଚରଣ କରି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦଳୀୟ ସୁପ୍ରିମୋଙ୍କୁ ଉସକାଉଛନ୍ତି । ହେଲେ ଦଳୀୟ ନେତା ଏହା କେବେ ହେବାକୁ ଦେବେନାହିଁ । ଅର୍ଥାତ୍ ବୈଜୟନ୍ତ ପଣ୍ଡାଙ୍କୁ ଦଳ ସସପେଣ୍ଡ କରିବ ନାହିଁ କିମ୍ବା କୌଣସି କାର୍ଯ୍ୟାନୁଷ୍ଠାନ ହେବନାହିଁ ।
ସୂଚନା ଅନୁସାରେ, ବୈଜୟନ୍ତ ଏକ ବଡ ଧରଣର ଗୋଟିଚାଳନା କରିଛନ୍ତି । ବିଜେଡିର ନିଷ୍ପତ୍ତିକୁ ସମାଲୋଚନା କରି ଯଦି ସେ ଦଳରୁ ନିଲମ୍ବିତ ହୁଅନ୍ତି, ତେବେ ଲୋକଙ୍କ ଅନୁକମ୍ପା ହାସଲ କରି ଅନ୍ୟ ଦଳରେ ସାମିଲ ହେବେ । ଯାହା ତାଙ୍କ ପାଇଁ ରାଜନୈତିକ ବାତାବରଣକୁ ଅନୁକୁଳ ରଖିବ । ଦଳର ଭୁଲ କାମକୁ ସମାଲୋଚନା କରିବାକୁ କ୍ଷମତାଶାଳୀ ଗୋଷ୍ଠୀ ସହ୍ୟ କଲେନି ବୋଲି ବାର୍ତ୍ତା ଦେଇ ବୈଜୟନ୍ତ ଅନୁକମ୍ପା ହାସଲ କରିବେ ବୋଲି ଚିନ୍ତା କରୁଥିବା ଚର୍ଚ୍ଚା ହେଉଛି । ହେଲେ ବିଜେଡିର ଟପ୍ ନେତା ଏବାବଦରେ ଅବଗତ ଥିବାରୁ, ବୈଜୟନ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ତାଙ୍କ ପାଇଁ ଅନୁକୁଳ ବାତାବରଣ ତିଆରି କରିବା ସପକ୍ଷରେ ନାହିଁ ।
ତେବେ ବିଜେଡି ବନାମ ବୈଜୟନ୍ତ ଏପିସୋଡରେ ଗୋଟିଏ କଥା ସ୍ପଷ୍ଟ, ଯେ ଆଗାମୀ ୨୦୧୯ ସାଧାରଣ ନିର୍ବାଚନ ବେଳକୁ ଉଭୟଙ୍କ ଭିତରେ ଅନେକ କିଛି ଫରକ୍ ଆସିଥିବ । ବିଜୁ ଜନତା ଦଳ ଉପରକୁ ଲଗାତର କ୍ଷତି ପହଂଚାଇବାକୁ ଉଦ୍ୟମ କରୁଥିବା ବୈଜୟନ୍ତଙ୍କୁ ବିଜେଡି କିଭଳି ଜବାବ ଦେଉଛି ଆଉ ମୁକାବିଲା କରୁଛି, ତା’ଉପରେ ନଜର ।