ମଣିପୁର ପରେ ପଶ୍ଚିମବଙ୍ଗରେ ଲଜ୍ଜା । ଚୋରି ଅଭିଯୋଗରେ ଦୁଇ ମହିଳାଙ୍କୁ ଉଲଗ୍ନ କରାଇ ଟଣାଓଟରା କରୁଥିବାର ଭିଡିଓ ହେଲା ଭାଇରାଲ
କନକ ବ୍ୟୁରୋ : ମଣିପୁର ପରେ ପଶ୍ଚିମବଙ୍ଗରୁ ଆସିଛି ଲଜ୍ଜାଜନକ ଘଟଣା । ଦୁଇ ମହିଳାଙ୍କୁ ଉଲଗ୍ନ କରି ଟଣାଓଟରା କରିଛନ୍ତି ମହିଳା ଗୋଷ୍ଠୀ । ଚୋରି ପାଇଁ ମାଲଦାରେ ଦୁଇ ମହିଳାଙ୍କୁ ଉଲଗ୍ନ କରି ମାଡ଼ ମରାଯାଇଥିବା ଅଭିଯୋଗ ହୋଇଛି । ଘଟଣାକୁ ନେଇ ମମତା ସରକାରଙ୍କୁ ଘେରିଛି ବିଜେପି । ଶୁକ୍ରବାର ବିଜେପି ସାଂସଦ ଲକେଟ୍ ଚାଟାର୍ଜୀ ନିଜ ଟ୍ୱିଟର ଆକାଉଣ୍ଟରେ ଏହାର ଭିଡିଓ ପୋଷ୍ଟ କରିଥିଲେ । ଆଉ ଘଟଣାକୁ ନେଇ ରାଜ୍ୟର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଟାର୍ଗେଟ୍ ମଧ୍ୟ କରିଛନ୍ତି । କହିଛନ୍ତି, ମଣିପୁର ଭଳି ସ୍ଥିତି ପଶ୍ଚିମବଙ୍ଗରେ ଉପୁଜିଛି । ପଶ୍ଚିମବଙ୍ଗ ପଞ୍ଚାୟତ ନିର୍ବାଚନ ହିଂସା ପାଇଁ ସେ ମମତା ବାନାର୍ଜୀ ଏବଂ ରାଜ୍ୟର ଶାସକ ଟିଏମସି ବିରୋଧରେ ବର୍ଷିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ବିଜେପି ଆଇଟି ସେଲ୍ ମୁଖ୍ୟ ଅମିତ ମାଲବୀୟ ମଧ୍ୟ ଘଟଣାକୁ ନେଇ ମମତା ବାନାର୍ଜୀଙ୍କୁ ଟାର୍ଗେଟ୍ କରିଛନ୍ତି । ଆଉ ଏହି ମାମଲାରେ କୌଣସି କାର୍ଯ୍ୟାନୁଷ୍ଠାନ ନଉଠାଇବା ନେଇ ମୁଖ୍ୟମନ୍ତ୍ରୀଙ୍କୁ ସମାଲୋଚନା କରିଛନ୍ତି । ସେ ଆହୁରି ମଧ୍ୟ ଦାବି କରିଛନ୍ତି ଯେ, ଘଟଣାଟି ହେଉଛି ଜୁଲାଇ ୧୯ ତାରିଖ ସକାଳର । ଯେଉଁ ମହିଳାଙ୍କୁ ଭିଡ଼ ଭିତରେ ମାଡ଼ ମରାଯାଇଛି, ସେ ହେଉଛନ୍ତି ଜଣେ ଦଳିତ । ଘଟଣାକୁ ନେଇ ମଧ୍ୟ ପ୍ରତିକ୍ରିୟା ରଖିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେପଟେ ଘଟଣାକୁ ରାଜନୀତିକରଣ ନକରିବାକୁ କହିଛନ୍ତି ଟିଏମସି ନେତ୍ରୀ ଶଶି ପାଂଜା । କହିଛନ୍ତି, ଘଟଣାରେ ପୋଲିସ ତଦନ୍ତ କରୁଛି ।
ସେପଟେ ମଣିପୁର ଘଟଣାକୁ ନେଇ ରାଜନୀତି ଥମିବାର ନାଁ ନେଉନାହିଁ । ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ମଣିପୁର ହିଂସା ପାଇଁ ସିଧାସଳଖ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ୍ କରିଛନ୍ତି । କହିଛନ୍ତି, ପ୍ରଧାନମନ୍ତ୍ରୀ ବିଦେଶ ଗସ୍ତ କରୁଛନ୍ତି, କିନ୍ତୁ ମଣିପୁର ଯାଇପାରୁନାହାନ୍ତି । ଯଦି ପ୍ରଧାନମନ୍ତ୍ରୀ ମଣିପୁର ଯାଇପାରୁନାହାନ୍ତି, ତାହେଲେ ଏକ ବୈଠକ ଡାକି ମାମଲା ଉପରେ ସମୀକ୍ଷା କରିବା ଦରକାର । ସେହିପରି ଉଦ୍ଧବ ଗୋଷ୍ଠୀ ନେତ୍ରୀ ପ୍ରିୟଙ୍କା ଚତୁର୍ବେଦୀ ମଣିପୁର ସରକାର ଉପରେ ବର୍ଷିଛନ୍ତି । ବିଜେପି ମଧ୍ୟ ଏହାର ଜବାବ ରଖିଛି ।
ମଣିପୁର ଘଟଣାରେ ଆଉ ଜଣେ ଅଭିଯୁକ୍ତ ଗିରଫ ହୋଇଛନ୍ତି । ଗିରଫ ଅଭିଯୁକ୍ତ ଜଣକ ହେଉଛନ୍ତି ୧୯ ବର୍ଷୀୟ ୟୁମଲେମବାମ ନୁଙ୍ଗସିଥୋଇ ମେତେଇ । ଏହାକୁ ମିଶାଇ ଗିରଫଦାରୀ ସଂଖ୍ୟା ୫ରେ ପହଂଚିଛି ।