କନକ ବ୍ୟୁରୋ: ଆନନ୍ଦ ଟପ୍ପୋ ମୃତ୍ୟୁ ମାମଲାରେ ହକି ଷ୍ଟାର ବିରେନ୍ଦ୍ର ଲାକ୍ରାଙ୍କୁ କ୍ଲିନଚିଟ୍ । କମିସନରେଟ ପୁଲିସ ପକ୍ଷରୁ ଆଜି କୋର୍ଟରେ ଦାଖଲ କରାଯାଇଥିବା ଫାଇନାଲ ରିପୋର୍ଟରେ ବିରେନ୍ଦ୍ର ଲାକ୍ରାଙ୍କୁ କ୍ଲିନଚିଟ ଦିଆଯାଇଛି । ଏଥିସହ ଆନନ୍ଦ ଟପ୍ପୋଙ୍କ ମୃତ୍ୟୁକୁ ଆତ୍ମହତ୍ୟା ଜନିତ ବୋଲି ରିପୋର୍ଟରେ ଦର୍ଶାଇଛି ଇନଫୋସିଟି ଥାନା ପୁଲିସ । ତଦନ୍ତ ବେଳେ ମିଳିଥିବା ସମସ୍ତ ପ୍ରମାଣ ସହିତ ବ୍ୟବଚ୍ଛେଦ ଓ ଭିସେରା ରିପୋର୍ଟ ଆଧାରରେ ଆନନ୍ଦ ଟପ୍ପୋ ଆତ୍ମହତ୍ୟା କରିଥିବା ପୁଲିସ କହିଛି ।
Kanak News is now on WhatsApp
Join and get latest news updates delivered to you via WhatsApp
ଆନନ୍ଦ ଟପ୍ପୋ ବେକରେ ଫାଶୀ ଦେଇ ଝୁଲିପଡିଥିଲେ, ତାଙ୍କ ମୃତ୍ୟୁକୁ ନେଇ କୌଣସି ସନ୍ଦେହ ନାହିଁ ବୋଲି ରିପୋର୍ଟରେ ଲେଖାଯାଇଛି । ଏହାଛଡା ମୃତ୍ୟୁ ପୂର୍ବରୁ ଆନନ୍ଦ ଟପ୍ପୋ ମଦ୍ୟପାନ କରିଥିବା ଜଣାପଡିଛି । ୨୦୨୨ ଫେବୃୟାରୀ ୨୮ରେ ଭୁବନେଶ୍ୱର ପଟିଆ ସ୍ଥିତ ଆୟୁଷ ଆପାର୍ଟମେଣ୍ଟରୁ ଆନନ୍ଦ ଟପ୍ପୋଙ୍କ ଝୁଲନ୍ତା ମୃତଦେହ ଜବତ କରିଥିଲା ଇନଫୋସିଟି ପୁଲିସ । ସେପଟେ ଆନନ୍ଦଙ୍କ ବାପା ଏହା ଏକ ସୁଚିନ୍ତିତ ହତ୍ୟାକାଣ୍ଡ ବୋଲି ଇନଫୋସିଟି ଥାନାରେ ଲିଖିତ ଏତଲା ଦେଇ ହକି ଷ୍ଟାର ବିରେନ୍ଦ୍ର ଲାକ୍ରାଙ୍କ ଉପରେ ଅଭିଯୋଗ ଆଣିଥିଲେ । ପୁଲିସ ଏକ ମାମଲା ରୁଜୁ କରି ତଦନ୍ତ ଚଲାଇଥିଲା । ତଦନ୍ତକାରୀ ଅଧିକାରୀ ଅର୍ପିତା ପ୍ରିୟଦର୍ଶୀ ଆଜି ମାମଲା ଚୂଡାନ୍ତ ରିପୋର୍ଟ କୋର୍ଟରେ ଦାଖଲ କରି ଆନନ୍ଦ ଟପ୍ପୋଙ୍କ ମୃତ୍ୟୁକୁ ଆତ୍ମହତ୍ୟା ଜନିତ ବୋଲି କହିଛନ୍ତି ।