‘ଆମନେଷ୍ଟି’ ରିପୋର୍ଟ : ୨୦୨୨ ରେ ୫୩ ପ୍ରତିଶତ ବୃଦ୍ଧି ପାଇଛି ମୃତ୍ୟୁଦଣ୍ଡ ମାମଲା । ଜାଣନ୍ତୁ ଭାରତ ଓ ପାକିସ୍ତାନର ସ୍ଥିତି
କନକ ବ୍ୟୁରୋ : ସାରା ବିଶ୍ୱରେ ବଢିଚାଲିଛି ମୃତ୍ୟୁଦଣ୍ଡ ମାମଲା । ଗୋଟିଏ ବର୍ଷ ପୂର୍ବ ତୁଳନାରେ ୨୦୨୨ ରେ ମୃତ୍ୟୁଦଣ୍ଡ ମାମଲା ୫୩ ପ୍ରତିଶତ ବୃଦ୍ଧି ପାଇଛି । ‘ଆମନେଷ୍ଟି’ ଇଣ୍ଟରନ୍ୟାସନାଲ ମଙ୍ଗଳବାର ଦିନ ତାର ରିପୋର୍ଟରେ ଏହା ଦାବି କରିଛି । ରିପୋର୍ଟ ମୁତାବକ ଇରାନ ଓ ସାଉଦୀ ଆରବରେ ସବୁଠାରୁ ଅଧିକ ମୃତ୍ୟୁଦଣ୍ଡ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ବାର୍ଷିକ ରିପୋର୍ଟ ମୁତାବକ ସାରା ଦେଶ ତୁଳନାରେ ସବୁଠାରୁ ଅଧିକ ମୃତ୍ୟୁଦଣ୍ଡ ଦିଆଯାଇଥିବା ରାଷ୍ଟ୍ର ତାଲିକାରେ ଇଣ୍ଡୋନେସିଆ ସବୁଠାରୁ ଆଗରେ ରହିଛି । ରିପୋର୍ଟରେ ଦାବି କରାଯାଇଛି କି, ୨୦୨୨ରେ ମଧ୍ୟ-ପୂର୍ବ ଓ ଉତ୍ତର ଅଫ୍ରିକାର ୭୦ ପ୍ରତିଶତ ମୃତ୍ୟୁଦଣ୍ଡ କେବଳ ଇରାନରେ ଦିଆଯାଇଛି । ଇରାନରେ ୨୦୨୧ ରେ ୩୧୪ ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଥିବା ବେଳେ ୨୦୨୨ ରେ ଏହା ୮୩ ପ୍ରତିଶତ ବଢଦ୍ଧି ପାଇ ୫୭୬ ଜଣଙ୍କ ମୃତ୍ୟୁଦଣ୍ଡ ଦିଆଯାଇଛି ।
ସେହିଭଳି ସାଉଦୀ ଆରବରେ ୨୦୨୧ ମସିହାରେ ୬୫ ଜଣଙ୍କୁ ମୃତ୍ୟୁଦଣ୍ଡ ମିଳିଥିବା ବେଳେ ୨୦୨୨ରେ ଏହି ସଂଖ୍ୟା ୧୯୬କୁ ବୃଦ୍ଧି ପାଇଥିଲା । ଅର୍ଥାତ ୨୦୨୧ ତୁଳନାରେ ୨୦୨୨ ରେ ମୃତ୍ୟୁଦଣ୍ଡ ମାମଲା ୩ଗୁଣ ବୃଦ୍ଧି ପାଇଛି । ୨୦୨୧ରେ ୧୮ଟି ଦେଶ ୫୭୯ ଜଣଙ୍କୁ ମୃତ୍ୟୁଦଣ୍ଡ ଦେଇଥିବା ବେଳେ ୨୦୨୨ ରେ ୮୮୩ ଜଣଙ୍କୁ ମୃତ୍ୟୁଦଣ୍ଡ ମିଳିଛି । ଅନ୍ୟପଟେ ଚୀନ, ଉତ୍ତରକୋରିଆ ଓ ଭିଏତନାମ ସହିତ ଅନେକ ଦେଶରେ ମୃତ୍ୟୁଦଣ୍ଡ ଉପରେ ସଠିକ୍ ରିପୋର୍ଟ ମିଳିପାରି ନାହିଁ । ଏହି ଦେଶଗୁଡିକ ଏଭଳି ମାମଲାକୁ ଗୁପ୍ତ ରଖିଥାନ୍ତି ।
ରିପୋର୍ଟ ମୁତାବକ ୨୦୨୨ ରେ ଇଣ୍ଡୋନେସିଆରେ ୧୧୨ ଜଣଙ୍କୁ ମୃତ୍ୟୁଦଣ୍ଡ ମିଳିଥିଲା । ସେମାନଙ୍କ ମଧ୍ୟରୁ ଅଧିକାଂଶ ଲୋକ ନିଶା କାରବାରରେ ସଂପୃକ୍ତ ଥିଲେ । ସେହିଭଳି ବାଂଲାଦେଶରେ ୨୦୨୨ ରେ ୧୬୯ ଜଣଙ୍କୁ ମୃତ୍ୟୁଦଣ୍ଡ ଦିଆଯାଇଛି । ଏହି କ୍ରମରେ ୨୦୨୨ରେ ଭାରତରେ ୧୬୫ ଜଣଙ୍କୁ, ପାକିସ୍ତାନରେ ୧୨୭ ଜଣଙ୍କୁ ମୃତ୍ୟୁଦଣ୍ଡରେ ଦଣ୍ଡିତ କରାଯାଇଥିଲା ।