ଲକ୍ଷ୍ମୀ ନାରାୟଣପୁରରେ ଅଖିମୁଠି ଅନୁକୂଳ କଲେ ମୁଖ୍ୟମନ୍ତ୍ରୀ
ପିପିଲି: ପୁରୀ ଜିଲ୍ଲା ପିପିଲି ଲକ୍ଷ୍ମୀନାରାୟଣପୁରରେ ଅଖିମୁଠି ଅନୁକୂଳ କରିଛନ୍ତି ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଆଜି ପବିତ୍ର ଅକ୍ଷୟ ତୃତୀୟାରେ ଚାଷୀ ଭାଇ ବର୍ଷର ପ୍ରଥମ ଚାଷ ଆରମ୍ଭ କରୁଥିବାରୁ ସାଂକେତିକ ଭାବେ ଚାଷକାର୍ଯ୍ୟ ଆରମ୍ଭ କରିଛନ୍ତି ମୁଖ୍ୟମନ୍ତ୍ରୀ । ଏଥିପାଇଁ ସରକାରଙ୍କ ପକ୍ଷରୁ ସ୍ୱତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଥିଲା । ବିହନ ଓ ହଳ, ଲଙ୍ଗଳ ପ୍ରସ୍ତୁତ କରି ରଖାଯାଇଥିବାବେଳେ ବିହନ ପେଡିକୁ ଛୁଇଁବା ସହ ହଳ, ଲଙ୍ଗଳରେ ହାତରଖି ମୁଖ୍ୟମନ୍ତ୍ରୀ ଚାଷକାମର ଶୁଭାରମ୍ଭ କରିଥିଲେ । ଏଥର ଭଲ ମୌସୁମୀ ବର୍ଷା ହେବାନେଇ ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଥିବାରୁ ଭଲ ଚାଷ ହେବାନେଇ ଆଶା ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ନିଜକୁ ଚଷାପୁଅ ବୋଲି ସବୁବେଳେ କହିଆସୁଥିବା କୃଷିମନ୍ତ୍ରୀ ପ୍ରଦୀପ ମହାରଥୀ ଆଜି ଅକ୍ଷୟ ତୃତୀୟାରେ ଧରିଛନ୍ତି ହଳ । ଚାଷ ଆରମ୍ଭ ଦିନରେ ନିଜେ ହଳ, ଲଙ୍ଗଳ ଧରି ଚାଷକାର୍ଯ୍ୟ ଆରମ୍ଭ କରିବା ପାଇଁ ରାଜ୍ୟର ଚାଷୀ ଭାଇଙ୍କୁ ପ୍ରେରଣା ଦେଇଛନ୍ତି ପ୍ରଦୀପ ମହାରଥୀ । ତେବେ କିଛିବାଟ ହଳ କରିବା ପରେ ହାଲିଆ ହୋଇପଡିଥିଲେ କୃଷିମନ୍ତ୍ରୀ । ବାଟରେ ଅଟକି ଯାଉଥିଲେ ଓ ପୁଣି ଚାଲୁଥିଲେ । ଭିଷଣ ଖରାରେ ବିଜେଡି ପକ୍ଷରୁ ଆୟୋଜିତ ରାଜ୍ୟସ୍ତରୀୟ କୃଷି ଉତ୍ସବରେ ହଳ କରିଥିଲେ ମନ୍ତ୍ରୀ । ପାଖେପାଖେ ରହୁଥିଲେ ବି ସମର୍ଥକ ।
ସେହିପରି ବିଜେଡି ବିଧାୟକ ଶଶିଭୂଷଣ ବେହେରାଙ୍କୁ ବି ଦେଖିବାକୁ ମିଲିଥିଲା ଦିନିକିଆ ଚଷା ପୁଅ ବେଶରେ । ଜୟଦେବ ବିଧାୟକ ଶଶିଭୂଷଣ ବେହେରା ପିପିଲିରେ ଆୟୋଜିତ କୃଷି ଉତ୍ସବରେ ସାମିଲ ହେବା ସହ ଚାଷୀଙ୍କ ଉତ୍ସାହ ବୃଦ୍ଧି କରିବାକୁ ହଳ ଧରିଥିଲେ । ବିଧାୟକଙ୍କ ଏଭଳି ବେଶ ବେଶ ଆକର୍ଷିତ କରିଥିଲା ଉପସ୍ଥିତ ଦଳୀୟ ସମର୍ଥକ ଓ ଚାଷୀମାନଙ୍କୁ । ମରୁଡି ପ୍ରଭାବିତ ବର୍ଷରେ ଚାଷୀଙ୍କ ପାଇଁ ବିଜେଡି ସରକାରଙ୍କ ଦରଦ କେତେ ତାହା ଏହି ସମାବେଶ ଓ ମନ୍ତ୍ରୀ ବିଧାୟକଙ୍କ ହଳ ଲଙ୍ଗଳ ଧରିବାରୁ ସ୍ପଷ୍ଟ ବାରିହୋଇ ପଡୁଥିଲା ।