ଆଇଓବିର ବୈପାରୀଗୁଡା ଶାଖାରୁ ଆକାଉଣ୍ଟଟାଣ୍ଟ ଲୁଟି ନେଇଛନ୍ତି ୮୦ ଲକ୍ଷ। ଲୁଟ ଖବର ପରେ ଜମା ଟଙ୍କା ଉଠାଇ ନେବା ପାଇଁ ଗ୍ରାହକଙ୍କ ଭିଡ
କନକ ବ୍ୟୁରୋ: ଟଙ୍କା ପାଇଁ ବ୍ୟାଙ୍କ ଆଗରେ ଲମ୍ବା ଲାଇନ । କୋରାପୁଟ ବୈପାରୀଗୁଡା ଇଣ୍ଡିଆନ ଓଭରସିଜ୍ ବ୍ୟାଙ୍କରୁ ୮୦ ଲକ୍ଷ ଟଙ୍କା ଲୁଟ୍ ଘଟଣାରେ ବ୍ୟାଙ୍କ କର୍ମଚାରୀ ଗିରଫ ହେବା ପରେ ବ୍ୟାଙ୍କରୁ ଟଙ୍କା ଉଠାଇ ନେବାକୁ ଚାହୁଁଛନ୍ତି ଜମାକାରୀ । ବୈପାରିଗୁଡ଼ା ସ୍ଥିତ ବ୍ୟାଙ୍କ ଶାଖାରେ ଜାମାକାରୀଙ୍କ ଲମ୍ବା ଲାଇନ ଲାଗିଛି । ସମସ୍ତେ ନିଜ ଡିପୋଜିଟ ଟଙ୍କାର ହିସାବ ଜାଣିବା ଓ ଉଠାଇବା ପାଇଁ ଗହଳି ଲଗାଇଛନ୍ତି । ଅନେକ ଜମାକାରୀଙ୍କ ଟଙ୍କାର ହିସାବ ମିଳୁନାହିଁ । କିଏ ଝିଅ ବାହାଘର ପାଇଁ ଟଙ୍କା ଜମା ରଖିଥିଲା ତ ଆଉ କିଏ ଜୀବନଯାକର ପାରିଶ୍ରମିକକୁ ବ୍ୟାଙ୍କର ସଞ୍ଚୟ କରିରଖିଥିଲା । ହେଲେ ବ୍ୟାଙ୍କ ଆକାଉଟାଣ୍ଟଙ୍କ ଅନଲାଇନ୍ ଗେମ୍ ଖେଳିବା ନିଶା ସବୁ ସାରିଦେଇଛି । ଜମାକାରୀଙ୍କ ଟଙ୍କା ବ୍ୟାଙ୍କରୁ ହଡପ ହୋଇଯାଇଛି । ଯାହାକୁ ନେଇ ବୈପାରୀଗୁଡା ଥାନାରେ ଏତଲା ଦେଇଛନ୍ତି ଜମାକାରୀ ।
Kanak News is now on WhatsApp
Join and get latest news updates delivered to you via WhatsApp
ତେବେ କେତେ ଜଣଙ୍କ ଟଙ୍କା ହେରଫେର ହୋଇଛି ସମସ୍ତଙ୍କ ଅଭିଯୋଗ ଆସିବା ପରେ ଜଣାପଡିବ ବୋଲି ଥାନା ଅଧିକାରୀ କହିଛନ୍ତି । ତେବେ ଇଣ୍ଡିଆନ ଓଭରସିଜ୍ ବ୍ୟାଙ୍କର ବୈପାରୀଗୁଡା ଶାଖାରେ ଜଣେ କି ୨ ଜଣ ନୁହେଁ ୮ ହଜାରରୁ ଅଧିକ ଗ୍ରାହକଙ୍କ ଜମାଖାତା ରହିଛି । ଏବେ ଅନେକଙ୍କ ହିସାବ ମିଳୁନାହିଁ ବୋଲି କହିଛନ୍ତି ଜମାକାରୀ । ବ୍ୟାଙ୍କରୁ ଟଙ୍କା ଲୁଟ ଘଟଣାରେ ବ୍ୟାଙ୍କର ଉଚ୍ଚପଦସ୍ଥ ଅଧିକାରୀ ଶାଖାରେ ତନାଘନା ଚଳାଇଛନ୍ତି । ବ୍ରାଞ୍ଚ ମ୍ୟାନେଜର କହିଛନ୍ତି, ସମସ୍ତଙ୍କ ଟଙ୍କା ମିଳିଯିବ, ଏଥିପାଇଁ ଟିକିଏ ଅପେକ୍ଷା କରିବାକୁ ପଡିବ ।