ବିଭିନ୍ନ ହସ୍ପିଟାଲରେ ଚାଲିଛି ବାହାନଗା ଟ୍ରେନ୍ ଦୁର୍ଘଟଣାରେ ଗୁରୁତରଙ୍କ ଚିକିତ୍ସା । ଉନ୍ନତ ଚିକିତ୍ସା ପାଇଁ ଦିଲ୍ଲୀରୁ ଆସିଛନ୍ତି ୧୭ ଜଣିଆ ବିଶେଷଜ୍ଞ ଦଳ
କନକ ବ୍ୟୁରୋ : ବାହାନଗା ଟ୍ରେନ ଦୁର୍ଘଟଣାରେ ହଜାରେରୁ ଅଧିକ ଲୋକ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ କଟକ ଏସସିବିରେ ବର୍ତମାନ ୧୪୨ ଜଣ ଆହତ ଚିକିତ୍ସିତ ହେଉଛନ୍ତି । ସେମାନଙ୍କ ମଧ୍ୟରୁ ଟ୍ରମା ଆଇସିୟୁରେ ୫ ଜଣ ଏବଂ ସର୍ଜରୀ ଆଇସିୟୁରେ ୫ ଜଣ ଆହତ ଚିକିତ୍ସିତ ହେଉଛନ୍ତି । ଦୁର୍ଘଟଣା ପରଠୁ ୧୯୩ ଆହତ ଏସସିବି ମେଡିକାଲ ଆସିଥିବା ବେଳେ ସେମାନଙ୍କ ମଧ୍ୟରୁ ୫୧ଜଣ ସୁସ୍ଥ ହୋଇ ଫେରିଗଲେଣି ।
Kanak News is now on WhatsApp
Join and get latest news updates delivered to you via WhatsApp
ତେବେ ଆହତଙ୍କ ଚିକିତ୍ସା ପାଇଁ ଏସସିବି ମେଡିକାଲରେ କାର୍ଯ୍ୟରତ ଡାକ୍ତରଙ୍କ ଉପରେ ଅଧିକ ଚାପ ପଡୁଥିବାରୁ ରାୟପୁରରୁ ଆସିବାକୁ ଥିବା ବିଶେଷଜ୍ଞ ଦଳ ସେମାନଙ୍କୁ ସହଯୋଗ କରିବେ । ଆହତମାନଙ୍କର ଠିକଣା ସଂଗ୍ରହ କରାଯାଇସାରିଛି । ସେମାନଙ୍କ ସମ୍ପର୍କୀୟ ରହିବା ପାଇଁ ପ୍ରଶାସନ ଏବଂ ସ୍ୱେଚ୍ଛାସେବୀ ଅନୁଷ୍ଠାନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି । ଆହତଙ୍କ ଚିକିତ୍ସାରେ ସହାୟତା ପାଇଁ ଦିଲ୍ଲୀରୁ ଆସିଛନ୍ତି ୧୭ ଜଣିଆ ବିଶେଷଜ୍ଞ ଟିମ । ଆହତଙ୍କୁ ଉନ୍ନତମାନର ଚିକତ୍ସା ଯୋଗାଇବାରେ ବିଶେଷଜ୍ଞ ଟିମ ସହାୟତା କରିବ । ଟିମ୍ ବିଭିନ୍ନ ହସ୍ପିଟାଲ ଯାଇ ରୋଗୀଙ୍କୁ ସଠିକ ଚିକିତ୍ସା କରାଯାଉଛି କି ନାହିଁ ତାହାର ମଧ୍ୟ ତଦାରଖ କରିବେ । ମୃତକଙ୍କୁ ଚିହ୍ନଟ ପାଇଁ ଏମସକୁ ସମ୍ପର୍କୀୟମାନେ ଆସୁଥିବା ବେଳେ କଟକ, ସୋର ଓ ବାଲେଶ୍ୱର ମେଡ଼ିକାଲରେ ଆହତମାନେ ଚିକିତ୍ସିତ ହେଉଛନ୍ତି ।