କନକ ବ୍ୟୁରୋ: ବସ୍ତାଏ ଚାଉଳ, କିଛି ପକେଟ ଛତୁଆ ଓ ପଲିଥିନ୍ ଖଣ୍ଡେ ଯଦି ଦାରିଦ୍ୟ ଦୂର ହୋଇଯାଉଥାନ୍ତା, ସେଦିନ ମା’ଟିଏ ଜନ୍ମକଲା ଛୁଆଟିକୁ ବିକ୍ରି କରିଦେବା ପାଇଁ ହୁଏତ ବାହାରିନଥାନ୍ତା । ପ୍ରଶାସନ ସହାୟତାର ପୁଡ଼ିଆଟିଏ ଧରେଇ ଦେବା ବଦଳରେ ଯଦି ପିଲାଟିର ଯତ୍ନ ନେଇଥାନ୍ତା, ହୁଏତ ପିଲାଟି ବଂଚିଯାଇଥାନ୍ତା । ଶେଷରେ ଆଖି ବୁଜି ଦେଇଛି ୩ମାସର ଶିଶୁ, ଯାହାକୁ ବିକ୍ରି କରିଦେବା ପାଇଁ କିଛି ଦିନ ତଳେ ବାହାରି ଆସିଥିଲେ ମା’ ମମତା ଦାସ । ପିଲାଟି ମରିଯିବା ପରେ ଅନାହାର ଯୋଗୁଁ ମୃତ୍ୟୁ ହୋଇଥିବା ଅଭିଯୋଗ ହେବା ସହ ବିକ୍ରି ହୋଇଥିଲେ ବୋଧେ ପିଲାଟି ବଂଚିଯାଇଥାନ୍ତା ବୋଲି ଯୁକ୍ତି କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦୁଝର ଜିଲ୍ଲା ମନୋହରପୁର ଗାଁର ମମତା ଦାସଙ୍କ ଦୁଃଖ କାହାଣୀ, ସେତେବେଳେ ଆରମ୍ଭ ହୋଇଥିଲା ଯେତେବେଳେ ଘର ଚଳାଉଥିବା ସ୍ୱାମୀ ଓ ଶୂଶୁରଙ୍କ ମୃତ୍ୟୁ ହୋଇଥିଲା । ଘରର ମୁରବୀ ଚାଲିଯିବା ପରେ ୪ଟି ପିଲାଙ୍କୁ ନେଇ ଅତି ଦୟନୀୟ ଭାବେ ଦିନ କାଟୁଥିଲେ । ବଡ଼ ପୁଅକୁ ଘୁଷୁରି ଚରାଇ ଛାଡ଼ି ଦେଇଥିବା ବେଳେ ତିନି ଝିଅକୁ ପାଖରେ ରଖିଥିଲେ ମମତା । ଖାଦ୍ୟ ଅଭାବରୁ ଶିଶୁମାନେ ଅପପୃଷ୍ଠିର ଶିକାର ମଧ୍ୟ ହୋଇଥିଲେ । ଏଭଳି ସ୍ଥିତିରେ କିଛି ଦିନ ତଳେ ୩ ମାସର ଝିଅକୁ ବିକ୍ରି କରିବା ପାଇଁ ଘର ଘର ବୁଲୁଥିଲେ । ଏବେ ସେଇ କୁନି ଝିଅ ଆଖି ବୁଜି ଦେଇଛି ।
ଶିଶୁ ବିକ୍ରି ଉଦ୍ୟମର ଖବର ଗଣମାଧ୍ୟମରେ ପ୍ରକାଶ ପାଇବାରୁ କିଛି ସମାଜସେବୀ ଓ ସ୍ଥାନୀୟ ପ୍ରଶାସନ ଶିଶୁଟିକୁ ଉଦ୍ଧାର କରିଥିଲା । ସ୍ଥାନୀୟ ହସ୍ପିଟାଲରେ ଚିକିତ୍ସା କରିବା ସହ କିଛି ଭିଟାଭିନ୍ ଔଷଧ ଦେଇଛାଡ଼ି ଦେଇଥିଲା । ଆଉ ପରିବାର ଲୋକଙ୍କୁ ସହାୟତା ନାଁରେ ବସ୍ତାଏ ଚାଉଳ, ଛତୁଆ ପକେଟ ଓ ପଲିଥିନ୍ ଦେଇ ଭଣ୍ଡାଇ ଦେଇଥିଲା । ଏବେ ୩ମାସର ଶିଶୁ ମରିଯିବା ପରେ ଧର୍ମକୁ ଆଖିଠାର କଲା ଭଳି ପ୍ରଶାସନ କହୁଛି- ଅନ୍ୟ ଶିଶୁଙ୍କ ଯତ୍ନ ନିଆଯିବ ।
– ପ୍ରଶାସନର ଏହି ସଫେଇ ଭିତରେ ପ୍ରଶ୍ନ ଆସୁଛି
– କୁନି ଝିଅଟିର ମୃତ୍ୟୁ ପାଇଁ ଦାୟୀ କିଏ?
– ବିକ୍ରି ବେଳେ ଉଦ୍ଧାର କରିଥିବା ଶିଶୁର ଯତ୍ନ କାହିଁକି ନେଲାନି ପ୍ରଶାସନ?
– ଶିଶୁଟି ବିକ୍ରି ହୋଇଯାଇଥିଲେ ବଂଚିଯାଇଥାନ୍ତା କି?