ଉତ୍ତରପ୍ରଦେଶ ରାଜନୀତି ସରଗରମ ! କଂଗ୍ରେସର ହାତ ଛାଡ଼ିପାରନ୍ତି ଏସପି ଓ ବିଏସପି, ସେପଟେ ବିରୋଧୀଙ୍କୁ ବିଜେପିର କଟାକ୍ଷ ।
କନକ ବ୍ୟୁରୋ : ଉତ୍ତର ପ୍ରଦେଶ ରାଜନୀତି ଏବେ ବେଶ୍ ଚଳଚଂଚଳ । ମୋଦି ବିରୋଧୀ ମହାମେଂଟ ଉପରେ ସୃଷ୍ଟି ହୋଇଛି ବିରାଟ ପ୍ରଶ୍ନ । ସମାଜବାଦୀ ପାର୍ଟି ଓ ବହୁଜନ ସମାଜ ପାର୍ଟି କଂଗ୍ରେସ ନେତୃତ୍ୱରେ ଗଢା ହେଉଥିବା ମହାମେଂଟରୁ ଓହରିଯିବା ନେଇ ଚର୍ଚ୍ଚା ଜୋର ଧରିଛି । ଫଳରେ ଜାତୀୟ ରାଜନୀତିର ସୃଷ୍ଟି ହୋଇଚି ହଟଚମଟ । ଏପଟେ ବିରୋଧୀଙ୍କ ମହାମେଂଟକୁ ନେଇ କଟାକ୍ଷ କରିଛନ୍ତି ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ।
Kanak News is now on WhatsApp
Join and get latest news updates delivered to you via WhatsApp
ବଦଳିଯିବ କି ୟୁପି ରାଜନୀତି ପାଣିପାଗ ? ଭାଙ୍ଗିଯିବ କି ବିରୋଧୀଙ୍କ ମହାମେଂଟ ? ହାତ ଛାଡ଼ିବେ ଏସପି-ବିଏସପି ! ସଂସଦରେ ଶୀତଅଧିବେଶନ ପୂର୍ବରୁ ମୋଦି ବିରୋଧୀ ମହାମେଂଟ ନେଇ ଏକାଠି ହୋଇଥିବା ବେଳେ ଏବେ ଏଥିରେ ଫାଟ ସୃଷ୍ଟି ହେବାର ସମ୍ଭାବନା ସୃଷ୍ଟି ହୋଇଛି । ମାୟାବତୀଙ୍କ ବିଏସପି ଓ ଅଖିଳେଶଙ୍କ ଏସପି କଂଗ୍ରେସର ହାତଛାଡି ପାରନ୍ତି ବୋଲି ଚର୍ଚ୍ଚା ଜୋର ଧରିଛି । ଏନେଇ ସପା ଓ ବିଏସପି ପକ୍ଷରୁ ଖୁବଶୀଘ୍ର ଘୋଷଣା ମଧ୍ୟ ହୋଇପାରେ । ମାୟାବତୀଙ୍କ ଜନ୍ମଦିନରେ ଏନେଇ ଘୋଷଣା ହେବାର ଖୁବ ସମ୍ଭାବନା ରହିଛି । ସୂଚନା ମୁତାବକ ସାଧାରଣ ନିର୍ବାଚନରେ ୟୁପିରେ ଲଢ଼ିବା ନେଇ ବିଏସପି ଓ ଏସପି ମଧ୍ୟରେ ସିଟ୍ ବୁଝାମଣା ସରିଛି । ଏହି ଦୁଇ ଦଳ ସହ ଯୋଡ଼ି ହୋଇଛି ଆରଏଲଡି । ତେଣୁ କଂଗ୍ରେସର ହାତଛାଡ଼ିବାକୁ ଏସପି ଓ ବିଏସପି ସ୍ଥିର କରିଥିବା ଚର୍ଚ୍ଚା ହେଉଛି ।
ସେପଟେ ମହାମେଂଟ ପ୍ରସଙ୍ଗରେ ବିରୋଧୀଙ୍କୁ କଟାକ୍ଷ କରିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା । ମହାମେଂଟ କରି କ୍ଷମତାକୁ ଆସିବାକୁ ବିରୋଧୀ ଦେଖୁଥିବା ସ୍ୱପ୍ନ କେବଳ ଭ୍ରାନ୍ତ ଧାରଣା । ମହାମେଂଟ କେବଳ ନିଜ ଅଂଚଳରେ ସୀମିତ , ସର୍ବଭାରତୀୟ ସ୍ତରରେ ଏହାର ଅସ୍ତିତ୍ୱ ନାହିଁ ବୋଲି କହିଛନ୍ତି ବିଜେପି ଅଧ୍ୟକ୍ଷ । ୟୁପି ଉପନିର୍ବାଚନରେ ମେଂଟ ସମୀକରଣର ନୂଆ ମୋଡ଼ ଦେଇଥିଲେ ଏସପି ଓ ବିଏସପି । ଦୁଇ ପାରମ୍ପରିକ ପ୍ରତିଦ୍ୱନ୍ଦୀ ଏକାଠି ହୋଇ କଂଗ୍ରେସ ସହ ମେଂଟ ବାନ୍ଧିଥିଲେ, ଆଉ ଜିତିନେଇଥିଲେ ଉପନିର୍ବାଚନ । କିନ୍ତୁ ଏବେ ବଦଳି ଯିବ କି ସମୀକରଣ? ନିକଟରେ ଶେଷ ହୋଇଥିବା ବିଧାନସଭା ନିର୍ବାଚନରେ ମଧ୍ୟରେ ଏସପି ଓ ବିଏସପି କଂଗ୍ରେସ ସହ ମେଂଟ ନକରି ଅଲଗା ନିର୍ବାଚନ ଲଢ଼ିଥିଲେ । ତେବେ ମଧ୍ୟପ୍ରଦେଶରେ ନିର୍ବାଚନ ଫଳ ପ୍ରକାଶ ପରେ କଂଗ୍ରେସକୁ ସମର୍ଥନ ଯୋଗାଇଦିଆଯିବ ବୋଲି ଘୋଷଣା କରିଥିଲେ ବିଏସପି ସୁପ୍ରିମୋ ମାୟାବତୀ ।