ଫୁଲବାଣୀ ଟାଉନ ଥାନା ବିଡାଙ୍ଗୀ ସାହିରେ ଅଭାବନୀୟ ଘଟଣା ! ଗୁଣିଆ ସନ୍ଦେହରେ ପୋଲିସ କନେଷ୍ଟବଳଙ୍କୁ ବିଷ୍ଠା ଖୁଆଇ ଲଣ୍ଡା କଲେ ଅନ୍ୟଜଣେ କନେଷ୍ଟବଳ
କନକ ବ୍ୟୁରୋ: ଖାକି ସାଜିଲା ଖାକିର ଶତ୍ରୁ । ଅନ୍ଧବିଶ୍ୱାସର ବଶବର୍ତ୍ତି ହୋଇ ପୋଲିସକୁ ନିର୍ଯାତନା ଦେଲେ ଆଉ ଜଣେ ପୋଲିସ । ଗୁଣିଆ ସନ୍ଦେହରେ ପୋଲିସ କନେଷ୍ଟବଳଙ୍କୁ ବିଷ୍ଠା ଖୁଆଇ ଲଣ୍ଡା କଲେ ଅନ୍ୟଜଣେ କନେଷ୍ଟବଳ । ଏପରି ଅଭାବନୀୟ ଘଟଣା ଘଟିଛି ଫୁଲବାଣୀ ଟାଉନ ଥାନା ଅନ୍ତର୍ଗତ ବିଡାଙ୍ଗୀ ସାହିରେ ।
Kanak News is now on WhatsApp
Join and get latest news updates delivered to you via WhatsApp
ସାହିବାସୀଙ୍କୁ ଗୁଣି କରୁଥିବା ଅଭିଯୋଗ ଆଣି ଚକାପାଦ ବ୍ଲକର ପ୍ରସରା ପାଣ୍ଠିରେ କାର୍ଯ୍ୟରତ କନେଷ୍ଟବଳ ଗୌର ଚନ୍ଦ୍ର କହଁରଙ୍କୁ ଲଣ୍ଡା କରାଯାଇଛି । ଚାଂଚଲ୍ୟକର ଖବର ହେଉଛି ଏହି କାଣ୍ଡ ଭିଆଇଛନ୍ତି ଆଉ ଜଣେ କନେଷ୍ଟବଳ । ଗାଁ ମଣ୍ଡପରେ ସଭା ବସି କନେଷ୍ଟବଳଙ୍କୁ ଦୋଷୀ ସାବ୍ୟସ୍ତ କରିବା ପରେ ରାତିସାରା ବାନ୍ଧି ନିର୍ଯାତନା ଦିଆଯାଇଥିବା ଅଭିଯୋଗ ହୋଇଛି । ଖବର ପାଇ ପୋଲିସ ଘଟଣାସ୍ଥଳରେ ପହଂଚି ଗୌରଙ୍କୁ ଉଦ୍ଧାର କରି ଗାଁର ୪ ଜଣ ଲୋକଙ୍କୁ ଥାନାକୁ ଆଣି ପଚରା ଉଚରା କରୁଛି ।
ସୂଚନା ମୁତାବକ, ଗତ ଶୁକ୍ରବାର ୮ ତାରିଖ ଦିନ ଅମରେନ୍ଦ୍ର ଭଉଣୀକୁ କୁଆଡ଼େ ରାତିରେ ସ୍ୱପ୍ନ ହେଲା ଗୌରଚନ୍ଦ୍ର ତାକୁ ଗୁଣି ଗାରେଡ଼ି କରିଛି । ସେଥିପାଇଁ ତାର ବାରମ୍ବାର ଦେହ ଖରାପ ହେଉଛି । ଏକଥା ଭାଇ ଅମରେନ୍ଦ୍ରକୁ ଜଣାଇଥିଲା ତାଙ୍କ ଭଉଣୀ । ଅମରେନ୍ଦ୍ର ଭଉଣୀ ଠାରୁ ଏକଥା ଶୁଣିବା ପରେ ସିଧା ଗୌରଚନ୍ଦ୍ରକୁ ଏବିଷୟରେ ପଚାରିଥିଲା । ହେଲେ ଏହାକୁ ଗୌରଚନ୍ଦ୍ର ଅସ୍ୱୀକାର କରିଥିଲେ। ଦୁହିଁଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ପରେ ଏ ବିଷୟରେ ସାହି ଲୋକଙ୍କୁ ଜଣାଇଥିଲେ ଅମରେନ୍ଦ୍ର। ସାହି ଲୋକେ ଏକଜୁଟ ହେଲେ। ସୋମବାର ଦିନ ଗୌରଚନ୍ଦ୍ରଙ୍କୁ ସାହି ମଣ୍ଡପକୁ ଆସିବା ପାଇଁ ଖବର ଦେଇଥିଲେ । ଗତକାଲି ସନ୍ଧ୍ୟା ବେଳେ ଗୌର ପୁଲବାଣୀ ଆସି ରାତିରେ ସାହି ଲୋକଙ୍କ ନିର୍ଦ୍ଦେଶ ପ୍ରକାରେ ମଣ୍ଡପକୁ ଯାଇଥିଲେ। ତାପରେ ଏସଓଜି ଯବାନ ଅମରେନ୍ଦ୍ର ଓ ତାଙ୍କ ସାଥୀ ତାକୁ ଘେରିଯାଇଥିଲେ । ସେଠାରେ କିଛି ସମୟ ମଧ୍ୟରେ କଙ୍ଗାରୁ କୋର୍ଟ ଆରମ୍ଭ ହୋଇଗଲା । ରାତି ସାରା ଚାଲିଲା । ସେଠାରେ ତାଙ୍କୁ ଲଣ୍ଡା କରି ବିଷ୍ଠା ଖୁଆଇ ଗୋବର ପାଣିରେ ଗାଧୁଆ ଯାଇଥିବା ଗୌରଚନ୍ଦ୍ର ଥାନାରେ ଲିଖିତ ଅଭିଯୋଗ କରିଛନ୍ତି ।
ଉଲ୍ଲେଖଯୋଗ୍ୟ ଯେ, କିଛିମାସ ତଳେ ସଦର ମହକୁମା ଜିଲ୍ଲା ଚିକିତ୍ସାୟରେ ଜଣେ ସାପ କାମୁଡ଼ା ରୋଗୀଙ୍କୁ ବଞ୍ଚାଇବାକୁ ଯାଇ ବେଡ୍ ପାଖରେ କୁକୁଡ଼ା ବଳି ଦିଆ ଯାଇଥିଲା । ସୋମବାର ପୁଣି ମେଡ଼ିକାଲ ପରିସର ୧୦ ନଂ ଓ୍ଵାର୍ଡ଼ରେ ଏକ କୁକୁଡ଼ା ବଳି ଦିଆ ଯାଇଥିବା ଜଣାପଡ଼ିଛି । ତେଣୁ ଏଭଳି ଘଟଣା ଜିଲ୍ଲାରେ ନିତି ଦିନିଆ ହୋଇଥିବା ବେଳେ ପ୍ରଶାସନ ଏହାକୁ ରୋକିବା ଦିଗରେ ତତ୍ପରତା ଦେଖାଉ ନଥିବା ସାଧାରଣରେ ଆଲୋଚନା ହେଉଛି ।