#ଡାହା ମିଛ । ସ୍ମାର୍ଟ ସିଟିର ସ୍ମାର୍ଟ ମେୟର, କିଏ ହେବ ତୁମ ପରି । ଗଳି ଗଳି ଏବେ ଆରମ୍ଭ କର ହେ, ଡଙ୍ଗାଧରି ରାହାଗିରି ।
(ସମସ୍ତ ବାକ୍ୟ କାଳ୍ପନିକ । ଏଥିରେ କୈାଣସି ସତ୍ୟତା ନାହିଁ । ବିଲକୁଲ ଦେହକୁ ନେବେନି କିମ୍ବା ଆମକୁ ଗାଳି କରିବେନି । ଏହା କେବଳ ମଜା ପାଇଁ ଉଦ୍ଦିଷ୍ଟ ।)
Kanak News is now on WhatsApp
Join and get latest news updates delivered to you via WhatsApp
ବର୍ଷାକୁ ନେଇ ଅନେକ ଗୀତ ଆପଣ ଶୁଣିଥିବେ । ରୋମାଂଟିକ ଟ୍ରାକ, ସ୍ଲୋ ଟ୍ରାକ୍ । ରିମ୍ ଝିମ ଗିରେ ସାୱନ ଠାରୁ ଆରମ୍ଭ କରି ନେଇଯା’ରେ ମେଘ ମତେ ପର୍ଯ୍ୟନ୍ତ । ବର୍ଷା ଆସିଲେ ଏମିତି କିଛି ଗୀତକୁ ଲଗାଇ ସାଥୀରେ ପକୁଡି ଆଉ ଚା’ ଧରି ପାଗକୁ ଭରପୁର ଉପଭୋଗ କରାଯାଏ । ହେଲେ ଗତ କିଛି ବର୍ଷ ଧରି ବର୍ଷା ଆସିଲେ, ଘରକୁ ପାଣି ମୁକ୍ତ କରିବାକୁ ଯେଉଁ ସୁଯୋଗ ଆପଣଙ୍କୁ ମେୟର ଅନନ୍ତ ଜେନା ଦେଇଛନ୍ତି, ସେଥିପାଇଁ ମହାଶୟଙ୍କୁ ଆଗ ଧନ୍ୟବାଦ ଦେବାର ଆବଶ୍ୟକତା ରହିଛି । ଓହୋ, କି କଥା! ଏତେ ବଡ ସୁଯୋଗ ଆପଣଙ୍କୁ ୧ ନମ୍ବର ସ୍ମାର୍ଟ ସିଟିର ମେୟର ଦେଇଛନ୍ତି, ତାଙ୍କୁ ଟିକେ କୃତଜ୍ଞତା ଜଣାଇବାକୁ ପଛଘୁଂଚା କାହିଁକି ଦେବା ।
ଛାଡନ୍ତୁ, ଭିତରକୁ ଯାଇ ଘାଂଟିବା ଆଗରୁ ବାବୁ ଅନନ୍ତ ଜେନାଙ୍କ ପାଇଁ ଆମ ତରଫରୁ ଗୋଟିଏ କବିତା ଡେଡିକେଟ କରିବାକୁ ଚାହିଁବୁ ।
ତୁମେ ହିଁ ଅନନ୍ତ, ତୁମେ ନାରାୟଣ
ତୁମେ ଆମ ବୁନୁ ଭାଇ
ଘଡିଏ ବର୍ଷାରେ ରାଜଧାନୀ ନାଳେ
ମେଲିଯାଏ କେତେ ଘାଇ ।କାର ଭାସୁଅଛି ବସ୍ ବି ଭାସୁଛି
ଭାସୁଛି ରୋଷେଇ ହାଣ୍ଡି
ଶୋଇଅଛ ତୁମେ ନିଘୋଡ ନିଦରେ
ମୁଣ୍ଡେ ଦେଇ ତୁଳା ମାଣ୍ଡି ।ଆପାତତଃ ଆସି ଦେଖିଯାଅ ଥରେ
ରାଜଧାନୀ ଗଳିକନ୍ଦି
ବେସିକାଲି ତୁମ ଯୋଗୁ ହେ କେମିତି
ଆମେ ହେଉ ଜଳବନ୍ଦୀ ।ସ୍ମାର୍ଟ ସିଟିର ସ୍ମାର୍ଟ ମେୟର
କିଏ ହେବ ତୁମ ପରି
ଗଳି ଗଳି ଏବେ ଆରମ୍ଭ କର ହେ
ଡଙ୍ଗାଧରି ରାହାଗିରି ।
କେଡେ ବଡ କାମ ଆମ ମେୟର ଆଜ୍ଞା କରିଛନ୍ତି ତାଙ୍କ କାର୍ଯ୍ୟକାଳରେ । ପାଣି ଜମାଇ ରଖି ରାଜଧାନୀକୁ ବଡାଇ, ଅଂଟାଏ ଲେଖାଏଁ ପାଣି କରିବା କଣ କମ କଥା । ଖୁବ କଠିନ ପରିଶ୍ରମ କରିଛନ୍ତି ଯାହା କୁହ । ପୁରା ବନ୍ୟା କରିଦେଲେ । ସ୍ଥିତି ଏମିତି ହେଲା ଯେ, ଠାକୁର ବି ବୁଡିଗଲେ । ଏମିତି କେବେ ଆପଣ ଦେଖିନଥିବେ । ଲାଗୁଛି, ଆଗକୁ ମେୟର ମହାଶୟ ନୂଆ ଯୋଜନାଟିଏ ଆରମ୍ଭ କରିବେ । ଏବେ ସିନା ଅଗ୍ନିଶମ ବିଭାଗକୁ ଲଗାଇ ପାଣିରୁ ଉଦ୍ଧାର କଲେ, ଆଗକୁ ଏୟାରଲିଫଟିଂ କରିବାକୁ ନୂଆ ଯୋଜନାଟିଏ ଆରମ୍ଭ କରିବାକୁ ଯାଉଛନ୍ତି । ଖାଲି ତୃତୀୟ ମହଲାକୁ ଫାଇଲ ପଠାଇଥିବାର ଆମେ ଖବର ପାଇଲୁ । ଅନୁମୋଦନ ମିଳିଲେ ଅଂଟାଏ ବଦଳରେ ବେକେ ଯାଏଁ ପାଣି ଜମାଇବାର ବ୍ୟବସ୍ଥା କରିବେ ଅନନ୍ତ ବାବୁ ଆଉ ଲୋକଙ୍କୁ ଏୟାରଲିଫଟ କରିବାକୁ ମହାଶୟ ଆମର ଉଦ୍ୟମ କରିବେ । ସ୍ମାର୍ଟ ମେୟରଟି, ଖେଳ ପୁରା ଅଲଗା ପ୍ରକାରରେ ହେବ ନା ।
ଆଉ କଣ ଲେଖିବା ମହାଶୟଙ୍କର କୃତୀତ୍ୱ ବାବଦରେ । ଯେତେ ଲେଖିଲେ କମ ପଡିବ । ପୁରୁଣା କିଛି କଥା ଲେଖିବାକୁ ହାତ ଯାଉଥିଲା, ହେଲେ ପୁଣି ସେପଟରୁ ଜବାବ ଆସିବ, ସେହି ବ୍ୟକ୍ତି ମୁଁ ନୁହେଁ, ତାର ଆକାର ଅଲଗା, ମୋର ଆକାର ଅଲଗା । ଏତେ କାଦୁଅକୁ କାହିଁକି ଯିବା, ପିଚୁ ରାସ୍ତା ଉପରେ ଗାଡି ଦଉଡାଇ ପଳାଇବା । ନହେଲେ ସ୍ମାର୍ଟ ସିଟିରେ ମେୟରଙ୍କ ଲୋକ ଆଉ ରଖାଇଦେବେନି । ଭାବୁଛି କବିତାଟି ଆଦୃତ ହେବ । ଆଉ ଅନନ୍ତ ବାବୁଙ୍କ କାର୍ଯ୍ୟ ମଧ୍ୟ ଲୋକଙ୍କ ଦ୍ୱାରା ଗ୍ରହଣୀୟ ହେବ ।
ବିଏମସି ଅଫିସ ଭଲ ଲାଗୁ ନାହିଁ
ବିଧାନସଭାରେ ଲାଖିଛି ଆଖି
ସପନ ଦେଖୁଛି ଉଡିଯିବ ଦିଲ୍ଲୀ
ହେଇଯିବ ଯଦି ସାଂସଦ ପକ୍ଷୀ
ଉଣେଇଶି ପରା ଆସୁଛି,
ଭୁବନେଶ୍ବରଟା ଭାସିଯାଉ ପଛେ
ବୁନୁ ଭାଇ ଆମ ହସୁଛି ।
ଯାଉ ଯାଉ ଟିକେ ପୁରୀ ଆଡେ ମଧ୍ୟ ଯିବା । ଆଉ କିଛି ଲାଇନ ବାହୁଡା ଆଗରୁ ଲେଖିବା । ନବକଳେବର ବେଳେ ଯୋଉ କାମ ହେଇଥିଲା, ତାହା ପୁରୀକୁ ପୁରା ସତେଜ କରି ରଖିଛି । ଟିକିଏ ବି ପାଣି ଜମୁନି । ଏଇ ହାଲକା ଅଂଟା ଯାଏଁ ସିନା ହେଉଛି, ତାଠାରୁ ଅଧିକ ଯାଉନି । ବାହୁଡା ଆଗରୁ ପୁରୀ ବାବଦରେ କିଛି ଲାଇନ ଲେଖିବାକୁ ହାତ ପଳେଇଲା । ଦେହକୁ ବିଲକୁଲ ନେବେି । ହେ ପଦେଭୁ ଜଗନ୍ନାଥ ଭୁଲ ଥିଲେ କ୍ଷମା କରିବ ।
ପହଣ୍ଡି ହେବ ନା ପହଁରି ଆସିବ
ପୁରୀରେ ଭାବୁଛି ଜଗା
ନହେଲେ ମହିଆ ନନାକୁ କହିକି
ମଗେଇବ ଗୋଟେ ଡଙ୍ଗା ।ଲାଇଫ ଜ୍ୟାକେଟ ନାହିଁ ବୋଲି କାଳେ
ଡଙ୍ଗା ବୁଡିଯିବ ଡରୁଛି
କୋଣାର୍କ ଚକରୁ ଟ୍ୟୁବକୁ ଖୋଲି
ସମୁଦ୍ର ହାଉଆ ଭରୁଛି ।
ଦେହକୁ ବିଲକୁଲ ନେବେନି । ହେ ପ୍ରଭୁ ଜଗନ୍ନାଥ ଭୁଲ ଥିଲେ କ୍ଷମା କରିବ ।
ବି. ଦ୍ର : ଉପରୋକ୍ତ ସମସ୍ତ ବାକ୍ୟ କାଳ୍ପନିକ । ଏଥିରେ କୈାଣସି ସତ୍ୟତା ନାହିଁ । ୨୦୧୯ ନିର୍ବାଚନ ପୂର୍ବରୁ ରାଜନୀତି ଜୋର ହେଉଥିବାରୁ ଆପଣଙ୍କୁ ଭିନ୍ନ ଢଙ୍ଗରେ କିଛି ସମୟ ଖୁସି କରିବାକୁ ଏହି ଲେଖା ଉଦ୍ଦିଷ୍ଟ । ବିଲକୁଲ ଦେହକୁ ନେବେନି କିମ୍ବା ଆମକୁ ଗାଳି କରିବେନି । ଏହା କେବଳ ମଜା ପାଇଁ ଉଦ୍ଦିଷ୍ଟ । ପଢନ୍ତୁ ଆଉ ମଜା ନିଅନ୍ତୁ ।
ବି. ଦ୍ର : ଆପଣ ମଧ୍ୟ ଏଭଳି ଚିନ୍ତାଧାରାରେ ଲେଖା ଆମ ପାଖକୁ ପଠାଇବାକୁ ଚାହାନ୍ତି ତେବେ ହ୍ୱାଟସଆପ ନମ୍ବରକୁ ପଠାଇପାରିବେ । ଆମ ନମ୍ବର – ୯୧୭୮୪୬୭୦୦୫