କନକ ବ୍ୟୁରୋ: ସଂସଦର ମିଳିତ ଅଧିବେଶନକୁ ଆଜି ସମ୍ବୋଧିତ କରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ନିଜର ଅଭିଭାଷଣରେ ସରକାରଙ୍କ ବିକାଶର ଗୋଲାପୀ ଚିତ୍ର ରଖିଛନ୍ତି ରାଷ୍ଟ୍ରପତି । ସେ କହିଛନ୍ତି, ଦେଶ ବଦଳୁଛି । ଅଧିକ ସଂଖ୍ୟକ ମହିଳା ଲୋକସଭାକୁ ନିର୍ବାଚିତ ହେବା ଏହା ଦର୍ଶାଉଛି । ସମସ୍ତଙ୍କ ବିକାଶର ଲକ୍ଷ୍ୟ ନେଇ କାମ କରୁଛନ୍ତି ସରକାର । ଏହାସହ ନମାମି ଗଙ୍ଗା ଭଳି ମହାନଦୀକୁ ପ୍ରଦୂଷଣ ମୁକ୍ତ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ମହାମହିମ ରାଷ୍ଟ୍ରପତି କହିଛନ୍ତି ଯେ, ଦେଶର ବିଭିନ୍ନ ନଦୀକୁ ପ୍ରଦୂଷଣ ମୁକ୍ତ କରିବା ପାଇଁ କେନ୍ଦ୍ର ସରକାର ସର୍ବଦା ପ୍ରୟାସରତ । ନମାମି ଗଙ୍ଗେ ଯୋଜନାରେ ଗଙ୍ଗା ନଦୀକୁ ଛଡା ଯାଉଥିବା ଆବର୍ଜନାକୁ ବନ୍ଦ କରାଯିବ । ଗଙ୍ଗା ନଦୀ ଭଳି ସରକାର କାବେରୀ, ପେରିୟାର, ନର୍ମଦା, ଯମୁନା, ମହାନଦୀ ଏବଂ ଗୋଦାବରୀ ଭଳି ଅନ୍ୟ ନଦୀକୁ ପ୍ରଦୂଷଣରୁ ମୁକ୍ତ କରାଯିବ । ନୂଆ ଭାରତରେ ବିକାଶର ଲାଭ ସମାଜର ସମସ୍ତ ବର୍ଗଙ୍କ ପାଖରେ ପହଂଚିବ । ୨୦୨୨ ସୁଦ୍ଧା ସରକାର ନୂଆ ଭାରତ ନିର୍ମାଣ ଲକ୍ଷ୍ୟ ହାସଲ କରିବେ । ସମାଜର ଶେଷ ବ୍ୟକ୍ତି ଯାଏଁ ବିକାଶ ପହଁଚାଇବା ହେଉଛି ସରକାରଙ୍କ ଲକ୍ଷ୍ୟ । କୃଷକ, ମହିଳା ଓ ଯୁବବର୍ଗଙ୍କ ପାଖରେ ବିକାଶ ପଂହଚିବ । ଛୋଟ ବ୍ୟବସାୟୀଙ୍କ ପାଇଁ ପେନସନ ବ୍ୟବସ୍ଥା ଲାଗୁ ହେବ । ଏହାଦ୍ୱାରା ୩ କୋଟି ଛୋଟ ବ୍ୟବସାୟୀ ଲାଭବାନ ହେବେ । ୨୦୨୪ ଯାଏଁ ଭାରତ ଏକ ଦୃଢ ଅର୍ଥବ୍ୟବସ୍ଥା ହେବ । ରାଜ୍ୟ ସହିତ ମିଶି ବ୍ୟବସାୟକୁ ଅଧିକ ସରଳ କରାଯିବ । ସେହିଭଳି ଜିଏସଟିକୁ ସରଳ କରିବା ପାଇଁ ପ୍ରକ୍ରିୟା ଜାରି ରହିଛି ବୋଲି କହିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ ।
ସମ୍ବିଧାନର ଧାରା ୮୭ଅନୁସାରେ ଲୋକସଭା ଅଧିବେସନ ଆରମ୍ଭରୁ ରାଷ୍ଟ୍ରପତି ସଂସଦର ମିଳିତ ଅଧିବେସନକୁ ସମ୍ବୋଧନ କରନ୍ତି । ରାଷ୍ଟ୍ରପତି ଭବନରୁ ସଂସଦକୁ ଏହି ଯାତ୍ରା ସ୍ୱତନ୍ତ୍ର ବ୍ୟବସ୍ଥା ଅନୁସାରେ ହୋଇଥାଏ । ଅଶ୍ୱାରୋହି ଓ ରାଷ୍ଟ୍ରପତି ଭବନର ସ୍ୱତନ୍ତ୍ର ସୁରକ୍ଷାକର୍ମୀଙ୍କ ଗହଣରେ ସଂସଦକୁ ଆସନ୍ତି ରାଷ୍ଟ୍ରପତି । ରାଷ୍ଟ୍ରପତିଙ୍କ ଏହି ଅଭିଭାଷଣରେ ସାଧାରଣତଃ ସରକାରଙ୍କ କାର୍ଯ୍ୟକ୍ରମ ଓ ନୀତି ସମ୍ପର୍କରେ ଆଭିମୁଖ୍ୟ ରହିଥାଏ । ପୂର୍ବ ବର୍ଷ ମାନଙ୍କରେ ସରକାରଙ୍କ ସଫଳତା ଓ ଆଗାମୀ ବର୍ଷରେ ସରକାରଙ୍କ ଯୋଜନା ସମ୍ପର୍କରେ ରାଷ୍ଟ୍ରପତି ଅଭିଭାଷଣ ରଖିଥାନ୍ତି ।
#WATCH Delhi: President Ram Nath Kovind enroute to Parliament, to address the joint session of both the Houses today. pic.twitter.com/yXHI6QefmK
— ANI (@ANI) June 20, 2019
ରାଷ୍ଟ୍ରପତି ଅଭିଭାଷଣ ପରେ ସରକାରୀ ଦଳ ସଂସଦ ଦୁଇ ସଦନରେ ଧନ୍ୟବାଦ ପ୍ରସ୍ତାବ ଆଗତ କରନ୍ତି । ଏହି ଧନ୍ୟବାଦ ପ୍ରସ୍ତାବ ଉପରେ ଦୁଇ ସଦନ ଲୋକସଭା ଓ ରାଜ୍ୟସଭାରେ ବିତର୍କ ହୋଇଥାଏ । ବିତର୍କ ଶେଷରେ ବିରୋଧୀ ଉଠାଇଥିବା ପ୍ରସଙ୍ଗ ଉପରେ ଉତର ରଖନ୍ତି ପ୍ରଧାନମନ୍ତ୍ରୀ । ଧନ୍ୟବାଦ ପ୍ରସ୍ତାବ ଉପରେ ଭୋଟିଂ ମଧ୍ୟ ହୋଇଥାଏ । ଏବଂ ଏହି ଭୋଟିଂ ସରକାରଙ୍କ ସପକ୍ଷରେ ରହିଥିବା ସାଂସଦଙ୍କ ସମର୍ଥନକୁ ପ୍ରତିଫଳିତ କରିଥାଏ । ଯଦି ଧନ୍ୟବାଦ ପ୍ରସ୍ତାବ ସମର୍ଥନ କମିଯିବ ତେବେ ସରକାର ଭାଙ୍ଗି ଯିବାର ବ୍ୟବସ୍ଥା ରହିଛି ।