ଏକାମ୍ରକାନନ ଫାର୍ମର ଜମି ସାଧାରଣ ପ୍ରଶାସନ ବିଭାଗକୁ ହସ୍ତାନ୍ତର ପ୍ରସଙ୍ଗ । ସରକାରଙ୍କ ନିଷ୍ପତିକୁ କଂଗ୍ରେସର ବିରୋଧ । ନିଷ୍ପତି ପ୍ରତ୍ୟାହାର ନହେଲେ, ଲୋକସେବ ଭବନ ଘେରିବା ପାଇଁ ଧମକ ଦେଲେ ବିଧାୟକ ସୁର ରାଉରତରାୟ-ସ୍ୱର ମିଳାଇଲା ବିଜେପି । ଜବାବ ରଖିଲା ବିଜେଡି
କନକ ବ୍ୟୁରୋ : ରାଜଧାନୀର ଏକାମ୍ରକାନନ ଫାର୍ମର ଜାଗାକୁ ସାଧାରଣ ପ୍ରଶାସନ ବିଭାଗକୁ ହସ୍ତାନ୍ତର ପ୍ରସଙ୍ଗରେ ଜୋର ଧରିଛି ରାଜନୀତି । ଫାର୍ମର ସବୁଜିମାକୁ ନଷ୍ଟ କରି ବ୍ୟବସାୟିକ କୋଠା ନିର୍ମାଣ କରିବା ପାଇଁ ସାଧାରଣ ପ୍ରଶାସନକୁ ଜମି ହସ୍ତାନ୍ତର ନିଷ୍ପତିକୁ ବିରୋଧ କରିଛି କଂଗ୍ରେସ । ସରକାର ନେଇଥିବା ନିଷ୍ପତି ପ୍ରତ୍ୟାହାର ନକଲେ ଆଗକୁ କଂଗ୍ରେସ ପକ୍ଷରୁ ଲୋକସେବ ଭବନ ଘେରାଉ କରାଯିବ ବୋଲି ଜଟଣୀ ବିଧାୟକ ତଥା ବରିଷ୍ଠ କଂଗ୍ରେସ ନେତା ସୁର ରାଉରତରାୟ ଧମକ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ସହ ସ୍ୱର ମିଳାଇଛି ବିଜେପି । ବିଜେପି ସାଧାରଣ ସଂପାଦକ ପୃଥ୍ୱୀରାଜ ହରିଚନ୍ଦନ କହିଛନ୍ତି, ଏହା ଏକ ଅଭାବନୀୟ ଘଟଣା । ବିଚିତ୍ର ଢଙ୍ଗରେ ଶାସନ ବ୍ୟବସ୍ଥା ଚାଲିଛି । ସରକାର ଏଭଳି ନିଷ୍ପତି ନେବା ଆଗରୁ ଆଲୋଚନା କରିବାର ଆବଶ୍ୟକତା ରହିଛି । ସରକାର ଏକାମ୍ର କାନନ ଜମି ବାବଦରେ ଜନସାଧାରଣଙ୍କ ସାମ୍ନାରେ ସ୍ପଷ୍ଟ ଚିତ୍ର ଦେବାର ଆବଶ୍ୟକତା ଥିବା ବିଜେପି ନେତା କହିଛନ୍ତି ।
ସେପଟେ ବିରୋଧୀଙ୍କ ବିରୋଧ ପରେ ଜବାବ ରଖିଛି ବିଜେଡି । ବରିଷ୍ଠ ବିଜେଡି ବିଧାୟକ ଅମର ଶତପଥୀ କହିଛନ୍ତି, ରାଜ୍ୟ ସରକାର ଯେଉଁ ନିଷ୍ପତି ନିଆନ୍ତି ତାର ବିକଳ୍ପ ଚିନ୍ତା କରିଥାନ୍ତି । ଏକାମ୍ର୍ ଫାର୍ମର ୨୦ ଏକର ୧୯୨ ଡିସିମିଲ ଜମିକୁ ସାଧାରଣ ପ୍ରଶାସନ ବିଭାଗର ଇଷ୍ଟେଟକୁ ହସ୍ତାନ୍ତର କରାଯାଇଥିବା ଉଦ୍ୟାନ କୃଷି ବିଭାଗ ପକ୍ଷରୁ କୁହାଯାଇଥିଲା । ବାକି ୫ଏକର ୭୭୫ ଡିସିମିଲ ଜମିରେ ବିଲ୍ଡିଂ ଥିବାରୁ ଏହାକୁ ରଖିଛି ଉଦ୍ୟାନ କୃଷି ବିଭାଗ । ହସ୍ତାନ୍ତର ହୋଇଥିବା ଜାଗାରେ ସରକାର ବାଣିଜ୍ୟକ ପ୍ରତିଷ୍ଠାନ ଓ ବାସଗୃହ କରିବା ପାଇଁ ଯୋଜନା କରୁଛନ୍ତି ବୋଲି କୁହାଯାଇଥିଲା । ଏନେଇ କନକ ନ୍ୟୁଜରେ ଖବର ପ୍ରସାରଣ ହୋଇଥିଲା ।