ୟୁରୋପ, ଆମେରିକା ଓ ଆଫ୍ରିକାରେ ବଢିଚାଲିଛି କରୋନା ସଂକ୍ରମଣ: କେନ୍ଦ୍ର କରାଇଲା ସତର୍କ, ଟିକା ନେଉଥିବା ବ୍ୟକ୍ତି ବି ହେଉଛନ୍ତି ସଂକ୍ରମିତ
କନକ ବ୍ୟୁରୋ: ନୂଆ ଭ୍ୟାରିଆଂଟ ଓମିକ୍ରନକୁ ନେଇ ଆଇଆଇଟି କାନପୁର ଏକ ବଡ ତଥ୍ୟ ଦେଇଛି । ଆଇଆଇଟି କାନପୁର ରିପୋର୍ଟ କହୁଛି ଆସନ୍ତା ଫେବୃଆରୀ ସୁଦ୍ଧା ଦେଶରେ ତୃତୀୟ ଲହର ଆସିପାରେ । ବର୍ତମାନ ଦେଶରେ ବଢୁଥିବା ଓମିକ୍ରନ ସଂକ୍ରମଣ ଭିତରେ ଆଇଆଇଟି କାନପୁରର ଏହି ରିପୋର୍ଟ ନିଶ୍ଚିତ ଚିନ୍ତାଜନକ । ଏବେ ଠାରୁ ସାବଧାନ ନହେଲେ ଆଗକୁ ଭୟଙ୍କର ହୋଇପାରେ ସ୍ଥିତି ।
Kanak News is now on WhatsApp
Join and get latest news updates delivered to you via WhatsApp
ବିଦେଶରେ ପଜିଟିଭିଟି ହାର ୬.୧ ପ୍ରତିଶତ ରହିଥିବା ବେଳେ ଭାରତରେ ସଂକ୍ରମଣର ପଜିଟିଭିଟି ହାର ବିଦେଶ ତୁଳନାରେ କିନ୍ତୁ କମ୍ ରହିଛି । ହେଲେ ଏହାକୁ ନେଇ ଆଶ୍ୱସ୍ତ ହେବାର ନାହିଁ । ବିପଦ ସଙ୍କେତ ଶୀର୍ଷକୁ ଛୁଇଁବା ଆଗରୁ କେନ୍ଦ୍ର ସରକାର ସଜାଗ ହୋଇଗଲେଣି । ଦେଶରେ ଦିଲ୍ଲୀ, ମହାରାଷ୍ଟ୍ର, ତାମିଲନାଡୁରେ ଓମିକ୍ରନ ସଂକ୍ରମଣ ସଂଖ୍ୟା ହୁ ହୁ ହୋଇ ବଢିଚାଲିଛି । ଦେଶରେ ୧୭ ରାଜ୍ୟରେ ଚିହ୍ନଟ ହୋଇସାରିଲାଣି ଓମିକ୍ରନ ଭାରିଆଂଟ । ପୁରା ବିଶ୍ୱରେ ୧୦୮ ଟି ଦେଶକୁ ଛୁଇଁ ସାରିଲାଣି ଏହି ମାରାତ୍ମକ ଭୂତାଣୁ । ବିଦେଶରେ କିଛି ରାଷ୍ଟ୍ରରେ କରୋନାର ଚତୁର୍ଥ ଲହର ଆରମ୍ଭ ହୋଇସାରିଲାଣି ।
ଏପରି ସମୟରେ ଆମକୁ ଏବେ ଅଧିକ ସୁରକ୍ଷିତ ରହିବାକୁ ହେବ ବୋଲି କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ସତର୍କ କରାଇ ଦେଇଛନ୍ତି । ଦେଶରେ ମୋଟ୍ ଓମିକ୍ରନ ଆକ୍ରାନ୍ତ ସଂଖ୍ୟା ୩୦୦ ଟପି ସାରିଲାଣି । ଏହା ମଧ୍ୟରୁ ଚିନ୍ତାଜନକ ଦିଗଟି ହେଉଛି ଏହି ଓମିକ୍ରନ ଆକ୍ରାନ୍ତଙ୍କ ମଧ୍ୟରୁ ୮୩ ଜଣ ଡବଲ ଡୋଜ ଟିକା ନେଇଥିଲେ’ା ତଥାପି ସଂକ୍ରମିତ ହୋଇଛନ୍ତି । ତେଣୁ ଓମିକ୍ରନକୁ ନେଇ ସାବଧାନତା ଜରୁରୀ ବୋଲି କେନ୍ଦ୍ର ସ୍ୱାସ୍ଥ୍ୟ ସଚିବ କହିଛନ୍ତି ।
ଦେଶରେ ଓମିକ୍ରନ ସଂକ୍ରମଣ ବଢୁଥିବା ଭିତରେ ଏକ ବଡ ଆକଳନ କରିଛି ଆଇଆଇଟି କାନପୁର । ଗଉସିଆନ ମିକ୍ସଚର ମଡେଲକୁ ଅନୁଧ୍ୟାନ କରି ଭାରତରେ ଆସନ୍ତା ଫେବ୍ରୁଆରୀ ସୁଦ୍ଧା ତୃତୀୟ ଲହର ଆସିବା ନେଇ ଆକଳନ କରିଛି ଆଇଆଇଟି କାନପୁର । ଦେଶର ପ୍ରଥମ ଲହର, ଦ୍ୱିତୀୟ ଲହରର ରିପୋର୍ଟକୁ ଅନୁଧ୍ୟାନ କରି ତୃତୀୟ ଲହର ବାବଦରେ ଆକଳନ କରିଛନ୍ତି ଆଇଆଇଟି କାନପୁରର ବିଶେଷଜ୍ଞ । ତୃତୀୟ ଲହର ଫେବୃଆରୀ ୩ ବେଳକୁ ଶୀର୍ଷ ଛୁଇଁଥିବ ବୋଲି ବିଶେଷଜ୍ଞ ଆକଳନ କରିଛନ୍ତି ।
ଗତ ୨୪ ଘଂଟାରେ ଦେଶରେ ୬୬୫୦ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ୩୭୪ ରହିଛି କରୋନା ମୃତ୍ୟୁ ସଂଖ୍ୟା । ସେପଟେ ୧୭ ରାଜ୍ୟରେ ଓମିକ୍ରନ ଆକ୍ରାନ୍ତ ସଂଖ୍ୟା ୩୫୮ରେ ପହଁଚିବା ପରେ କେନ୍ଦ୍ର ସରକାରଙ୍କ ଚିନ୍ତା ବଢିଗଲାଣି । ଡେଲଟା ଠାରୁ ୩ରୁ ୫ ଗୁଣ ଅଧିକ ସଂକ୍ରମଣ କ୍ଷମତା ଥିବା ଏହି ମାରାତ୍ମକ ଭୂତାଣୁ ଆଗକୁ ବିପଦ ବନିବ ଆଶଙ୍କା ସୃଷ୍ଟି ହେଲାଣ ିା