କନକ ବ୍ୟୁରୋ: ବାଂଲାଦେଶ ଦେଇ ଚୀନରେ ଅବତରଣ କଲା ୩୪୦ ଯାତ୍ରୀ ଥିବା ଇରାନର ବିମାନ । ଇରାନର ମହାନ ଏୟାରଲାଇନ୍ସ ଏହା ସ୍ପଷ୍ଟ କରିଛି । ଇରାନର ଏହି ଯାତ୍ରୀବାହୀ ବିମାନରେ ବୋମା ଥିବା ସୂଚନା ମିଳିଥିଲା । ମହାନ ଏୟାରଲାଇନ୍ସ କହିଛି, ବୋମା ଖବର ଗୁଜବ, ବିମାନଟି ସଂପୂର୍ଣ୍ଣ ସୁରକ୍ଷିତ ରହିଛି । ଘଟଣାକ୍ରମକୁ ଦେଖିଲେ ଲାଗୁଛି ଅନ୍ତର୍ଜାତୀୟ ବିମାନ ସେବାକୁ ପ୍ରଭାବିତ କରିବାକୁ ଏପରି ଏକ ଫେକ୍ ନ୍ୟୁଜ ତିଆରି କରାଯାଇଥିଲା । ଏପରି କରି ଶାନ୍ତି ଭାଙ୍ଗିବାକୁ ପ୍ରୟାସ କରାଯାଇଥିଲା ବୋଲି ଇରାନର ବିମାନ ବନ୍ଦର କର୍ତୃପକ୍ଷ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଇରାନର ଏହି ବିମାନ ଭାରତୀୟ ଆକାଶମାର୍ଗରେ ପ୍ରବେଶ କରିବା ପରେ ବୋମା ଥିବା ନେଇ ଦିଲ୍ଲୀ ବିମାନ ବନ୍ଦରକୁ ସୂଚନା ମିଳିଥିଲା । ପରେ ଏୟାର ଟ୍ରାଫିକ କଂଟ୍ରୋଲର ଦିଲ୍ଲୀ ବିମାନ ବନ୍ଦରରେ ବିମାନ ଅବତରଣ ନକରି ଜୟପୁରରେ ଅବତରଣ କରିବାକୁ ପରାମର୍ଶ ଦେଇଥିଲା । ହେଲେ ଏହା ସଫଳ ହୋଇପାରିନଥିଲା । ପରେ ବାଂଲାଦେଶ ଆକାଶମାର୍ଗ ଦେଇ ଚୀନରେ ଅବତରଣ କରିଛି ଏହି ଯାତ୍ରୀବାହୀ ବିମାନ । ଭାରତୀୟ ଆକାଶ ମାର୍ଗରୁ ଏହି ଯାତ୍ରୀବାହୀ ବିମାନକୁ ହଟାଇବା ପାଇଁ ଭାରତୀୟ ବାୟୁସେନାର ଲଢୁଆ ସୁଖୋଇ ବିମାନ ପାଖାପାଖି ୪୫ ମିନିଟ ପିଛା କରିଥିଲା । ମଝି ଆକାଶରେ ବିମାନଟି ଥିବା ବେଳେ ପାଇଲଟ ବୋମା ଥିବା ନେଇ ସୂଚନା ପାଇଥିଲେ । ପରେ ଅପରସେନ କଂଟ୍ରୋଲ ସେଂଟରକୁ ଯୋଗାଯୋଗ କରିଥିଲେ । ଏହାପରେ ମହାନ ଏୟାରଲାଇନ୍ସ ବୋମା ଥିବା ନେଇ ସୂଚନା ଦେଇଥିଲେ । ଦିଲ୍ଲୀ ବିମାନ ବନ୍ଦର ସହିତ ଗୁଇନ୍ଦା ବିଭାଗ ସତର୍କ ହୋଇଥିଲା । ଏବେ ପ୍ରଶ୍ନ ଉଠୁଛି ଯଦି ଏହା ଫେକ୍ ନ୍ୟୁଜ ତାହେଲେ କିଏ ଦିଲ୍ଲୀ ବିମାନ ବନ୍ଦରକୁ ବିମାନରେ ବୋମା ଥିବା ନେଇ ସତର୍କ କରାଇଥିଲା ।