କନକ ବ୍ୟୁରୋ: ଏସିଆ କପର ସୁପର-୪ରେ ଟିମ୍ ଇଣ୍ଡିଆ ନିଜ ସ୍ଥାନ ପକ୍କା କରିସାରିଛି । ହେଲେ ରୋହିତ ବାହିନୀର ମୁଖ୍ୟ ଲକ୍ଷ୍ୟ କିନ୍ତୁ ରହିଛି ଟି-୨୦ ବିଶ୍ୱକପ୍ । ଅଷ୍ଟ୍ରେଲିଆରେ ହେବାକୁ ଥିବା ଏଥର ଟି-୨୦ ବିଶ୍ୱକପ୍ ପାଇଁ ଟିମ୍ ଘୋଷଣା ହେଇନାହିଁ । ସେପ୍ଟେମ୍ବର ୧୫ ସୁଦ୍ଧା ଟିମ୍ ଘୋଷଣା ହେବାକୁ ଥିବାବେଳେ, ଏଥିପାଇଁ ଆଉ ମାତ୍ର ଦୁଇ ସପ୍ତାହ ବାକି ରହିଛି । ତେଣୁ ବିଶ୍ୱକପ୍ ଦଳରେ କେଉଁ କେଉଁ ଖେଳାଳି ସ୍ଥାନ ପାଇବେ ତାକୁ ନେଇ ଆରମ୍ଭ ହେଇଛି ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ସେପ୍ଟେମ୍ବର ୧୫ ତାରିଖ ପୂର୍ବରୁ ବିଶ୍ୱକପରେ ଭାଗ ନେବାକୁ ଥିବା ସମସ୍ତ ଟିମ ନିଜର ଖେଳାଳି ଘୋଷଣା କରିବେ ବୋଲି ପୂର୍ବରୁ ଆଇସିସି ଘୋଷଣା କରିସାରିଛି । ଏପରିକି ଅଷ୍ଟ୍ରେଲିଆ ଦଳ ବିଶ୍ୱକପ୍ ପାଇଁ ଦଳ ଘୋଷଣା କରିସାରିଲାଣି । ତେଣୁ ଏପରି ସ୍ଥିତିରେ ରୋହିତ ବାହିନୀରେ କେଉଁ କେଉଁ ଖେଳାଳି ବିଶ୍ୱକପ୍ ପାଇଁ ଟିକେଟ୍ ହାସଲ କରୁଛନ୍ତି ତାହା ଉପରେ ରହିଛି ସମସ୍ତଙ୍କର ନଜର ।
ଘୋଷଣା ହେବାକୁ ଥିବା ୧୫ ଜଣିଆ ଦଳରେ ରୋହିତ ଶର୍ମା ଅଧିନାୟକ ଓ କେ ଏଲ ରାହୁଲ ଉପ ଅଧିନାୟକ ରହିବା ଏକପ୍ରକାରର ପକ୍କା । ତାଙ୍କ ସହିତ ବିରାଟ କୋହଲି, ସୂର୍ଯ୍ୟକୁମାର ଯାଦବ ଟପ୍ ଅର୍ଡର ବ୍ୟାଟ୍ସମ୍ୟାନ୍ ଭାବେ ଦଳରେ ରହିବେ । ୱିକେଟକିପର ବ୍ୟାଟ୍ସମ୍ୟାନ୍ ଭାବେ ରିଷଭ ପନ୍ତ, ଦିନେଶ କାର୍ତ୍ତିକ ଦଳରେ ରହିବା ମଧ୍ୟ ପକ୍କା । ସେପଟେ ଅଲରାଉଣ୍ଡର ଭାବେ ମଧ୍ୟ ହାର୍ଦ୍ଦିକ ପାଣ୍ଡ୍ୟା ଓ ରବୀନ୍ଦ୍ର ଜାଡେଜା ବିଶ୍ୱକପ୍ ଦଳରେ ରହିବା ନିଶ୍ଚିତ ଜଣାପଡୁଛି । ତେଣୁ ଏହିସବୁ ଖେଳାଳି ବିଶ୍ୱକପ୍ ଦଳରେ ସ୍ଥାନ ପାଇବା ନିଶ୍ଚିତ ବୋଲି ଜଣାପଡୁଛି ।
ଖାଲି ସେତିକି ନୁହେଁ, ଭୁବନେଶ୍ୱର କୁମାର, ଜଶପ୍ରୀତ ବୁମରା, ଅର୍ଶଦୀପ ସିଂହ, ଯୁଜବେନ୍ଦ୍ର ଚହଲ, ଦୀପକ ହୁଡା ଏବଂ ହର୍ଷଲ ପଟେଲ ବିଶ୍ୱକପ୍ ଦଳରେ ସ୍ଥାନ ପାଇପାରନ୍ତି ବୋଲି ଚର୍ଚ୍ଚା ହେଉଛି । ତେଣୁ କେଉଁ ଚୂଡାନ୍ତ ୧୫ ଜଣିଆ ଦଳ ବିଶ୍ୱକପ୍ ପାଇଁ ଦଳରେ ସ୍ଥାନ ପାଇବେ ତାକୁ ନେଇ ଚର୍ଚ୍ଚା ଆଲୋଚନା ଆରମ୍ଭ ହେଇଛି । ଏହିସବୁ ଖେଳାଳିଙ୍କ ସହିତ ଚୟନକର୍ତ୍ତାମାନେ ଶ୍ରେୟାସ ଆୟାର, ଆଭେସ ଖାନ୍, ଉମରାନ୍ ମଲ୍ଲିକ, ଦୀପକ ଚହର, ରବି ବିଷ୍ନୋଇ, ଇଶାନ କିଷାନଙ୍କ ଭଳି ଖେଳାଳିଙ୍କୁ ମଧ୍ୟ ଏହି ଲିଷ୍ଟରେ ସାମିଲ କରିପାରନ୍ତି ।
ସୂଚନାଯୋଗ୍ୟ ଯେ, ଆସନ୍ତା ଅକ୍ଟୋବର ମାସରୁ ଟି-୨୦ ବିଶ୍ୱକପ୍ ଆରମ୍ଭ ହେବାକୁ ଯାଉଛି । ଯାହାକି ନଭେମ୍ବର ୧୩ ତାରିଖ ଯାଏଁ ଖେଳାଯିବ । ଏଥର ବିଶ୍ୱକପ ଟ୍ରଫି ପାଇଁ ୧୬ ଟିମ ଲଢେଇ କରିବେ । ଅଷ୍ଟ୍ରେଲିଆର ୭ଟି ଅଲଗା ଅଲଗା ସହରରେ ଏହି ଟୁର୍ଣ୍ଣାମେଣ୍ଟ ଖେଳାଯିବ । ତେବେ ଟିମ୍ ଇଣ୍ଡିଆ ଏଥର ଗ୍ରୁପ-୨ରେ ସ୍ଥାନ ପାଇଛି । ଯେଉଁଥିରେ ପାକିସ୍ତାନ, ବାଂଲାଦେଶ ଆଉ ଦକ୍ଷିଣ ଆଫ୍ରିକା ମଧ୍ୟ ଅଛନ୍ତି ।