ଯଦି ଗାନ୍ଧୀ ପରିବାର ପାଇଁ କଂଗ୍ରେସ ଦୁର୍ବଳ ହେଉଛି, ତେବେ ସବୁପ୍ରକାର ତ୍ୟାଗ ପାଇଁ ପ୍ରସ୍ତୁତ । ବୈଠକରେ କାହିଁକି ଏମିତି କହିଲେ ସୋନିଆ ଗାନ୍ଧୀ?
କନକ ବ୍ୟୁରୋ :୫ ରାଜ୍ୟର ବିଧାନସଭା ନିର୍ବାଚନରେ କଂଗ୍ରେସ ଫ୍ଲପ ସୋ’ ପରେ ସୋନିଆ ଗାନ୍ଧୀ ଇସ୍ତଫା ଦେବେ ବୋଲି ଯେଉଁ ଚର୍ଚ୍ଚା ହେଉଥିଲା, ସେଥିରେ ରୋକ୍ ଲାଗିଛି । କଂଗ୍ରେସ ୱାର୍କିଂ କମିଟି ବୈଠକ ପରେ ବରିଷ୍ଠ ନେତା ମଲ୍ଲିକାର୍ଜୁନ ଖଡଗେ କହିଛନ୍ତି, ସୋନିଆଙ୍କ ନେତୃତ୍ୱରେ ଦଳ ଆଗକୁ ବଢ଼ିବ । ଦଳର ଭବିଷ୍ୟତ କାର୍ଯ୍ୟପନ୍ଥା ନେଇ ସୋନିଆ ନିଷ୍ପତି ନେବେ, ତାଙ୍କ ଉପରେ ଦଳର ବିଶ୍ୱାସ ରହିଛି ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଧାନସଭା ନିର୍ବାଚନରେ ଦଳର ଶୋଚନୀୟ ପରାଜୟ ପରେ ଆଜି ଦିଲ୍ଲୀ ସ୍ଥିତ ଏଆଇସିସି ମୁଖ୍ୟାଳୟରେ କଂଗ୍ରେସ ୱାର୍କିଂ କମିଟି ବୈଠକ ବସିଥିଲା । ଦଳର ବରିଷ୍ଠ ନେତାଙ୍କ ସମେତ ଜି-୨୩ ନେତା ଭାବେ ପରିଚିତ ଗୁଲାମ ନବୀ ଆଜାଦ, ଆନନ୍ଦ ଶର୍ମା ଓ ମୁକୁଲ ୱାସନିକ୍ ପ୍ରମୁଖ ଯୋଗ ଦେଇଥିଲେ । କାହିଁକି ଦଳର ପରାଜୟ ହେଲା, ଏ ନେଇ ଆଲୋଚନା କରାଯାଇଥିଲା । ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ବୈଠକରେ ସୋନିଆ ଗାନ୍ଧୀ କହିଥିଲେ, କିଛି ଲୋକଙ୍କୁ ଲାଗୁଛି ଗାନ୍ଧୀ ପରିବାର ଯୋଗୁଁ ଦଳ ଦୁର୍ବଳ ହେଉଛି । ଯଦି ସେପରି ଲାଗୁଛି, ତେବେ ସେ ସବୁପ୍ରକାର ତ୍ୟାଗ କରିବାକୁ ପ୍ରସ୍ତୁତ ଅଛନ୍ତି । କିନ୍ତୁ ଦଳର ବରିଷ୍ଠ ନେତା ଗାନ୍ଧୀ ପରିବାର ଉପରେ ଆସ୍ଥା ପ୍ରକାଶ କରିଛନ୍ତି ।
ବୈଠକ ସରିବା ପରେ ଦଳର ମୁଖପାତ୍ର ରଣଦୀପ ସୂର୍ଯେୱାଲା କହିଛନ୍ତି, ସୋନିଆ ଗାନ୍ଧୀ ଦଳର ନେତୃତ୍ୱ ନେବେ । ସର୍ବସମ୍ମତି କ୍ରମେ ସୋନିଆ ଗାନ୍ଧୀଙ୍କ ନେତୃତ୍ୱ ଉପରେ ବିଶ୍ୱାସ ପ୍ରକଟ କରାଯାଇଛି । ୫ଟି ରାଜ୍ୟରେ ଯେଉଁ ଜନମତ ଆସିଛି, ତାକୁ ବିନମ୍ରତାର ସହ ଦଳ ଗ୍ରହଣ କରୁଛି । ସତର୍କ ଓ ସଜାଗ ବିରୋଧୀ ଦଳ ଭାବେ କଂଗ୍ରେସ ଦାୟିତ୍ୱ ନିର୍ବାହ କରିବ ବୋଲି କହିଛନ୍ତି ସୂର୍ଯେୱାଲା ।
ସେହିଭଳି କଂଗ୍ରେସ ନେତା ଡିକେ ଶିବକୁମାର କହିଛନ୍ତି, ରାହୁଲ ଗାନ୍ଧୀଙ୍କୁ ତୁରନ୍ତ କଂଗ୍ରେସର ପୂର୍ଣ୍ଣକାଳୀନ ଅଧ୍ୟକ୍ଷ ପଦ ଗ୍ରହଣ କରିବାର ଆବଶ୍ୟକତା ରହିଛି । ମୋ ଭଳି ଅନେକ କଂଗ୍ରେସ କର୍ମୀଙ୍କର ଏହା ହିଁ ଇଚ୍ଛା । ସେହିଭଳି ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ କହିଛନ୍ତି, ନିର୍ବାଚନରେ ହାର ଜିତ ଲାଗିକି ରହିଥାଏ । କିନ୍ତୁ ରାହୁଲ ଗାନ୍ଧୀ ଏକମାତ୍ର ବ୍ୟକ୍ତି ଯିଏ ପ୍ରଧାନମନ୍ତ୍ରୀ ମୋଦୀଙ୍କ ମୁକାବିଲା କରୁଛନ୍ତି । ରାହୁଲ ଗାନ୍ଧୀଙ୍କୁ ଦଳର ଅଧ୍ୟକ୍ଷ କରାଯିବା ଦରକାର, ଯାହାଦ୍ୱାରା ଦଳ ଏକଜୁଟ୍ ହୋଇ ରହିବ ।