ରୋଜଗାରିଆ ପୁଅକୁ ମାଡି ବସିଛି ମେରୁଦଣ୍ଡ ଜନିତ ରୋଗ: ଗୋଟିଏ ଝୁପୁଡି ଘରେ ୧୪ ବର୍ଷ ହେଲା ଭୋଗୁଛନ୍ତି ଯନ୍ତ୍ରଣା
କନକ ବ୍ୟୁରୋ: ଏକମାତ୍ର ରୋଜଗାରିଆ ପୁଅ ବିଛଣାରେ। ୧୪ବର୍ଷ ଧରି ଗୋଟିଏ ଝୁପୁଡି ଘର ଭିତରେ ଜୀବନ କାଟୁଛି ଅସହାୟ ରୋଗାଗ୍ରସ୍ତ ଯୁବକ। ଅନ୍ୟପଟେ ବୃଦ୍ଧ ବୃଦ୍ଧା ବାପା ଓ ମା ପୁଅର ଚିକିତ୍ସା ପାଇଁ ଅନେକ ଉଦ୍ୟମ କରବା ପରେ ଏବେ କେବଳ ଭଗବାନ ଓ ସରକାର ଙ୍କ ନିକଟରେ ନିଜକୁ ସମର୍ପଣ କରି ଦେଇଛନ୍ତି ଏହି ଵୃଦ୍ଧ ଦମ୍ପତି । ଏଭଳି ଦୁଃଖଦ ଘଟଣା ଦେଖିବାକୁ ମିଳିଛି ଜଗତସିଂହପୁର ଜିଲ୍ଲା ନାଉଗାଁ ବ୍ଲକ ଡେରିକି ପଞ୍ଚାୟତରେ।
Kanak News is now on WhatsApp
Join and get latest news updates delivered to you via WhatsApp
ପୁଅକୁ ବଙ୍କା କରି ଦେଇଛି ମେରୁଦଣ୍ଡ ଜନିତ ରୋଗ । ୧୪ ବର୍ଷ ହେଲା ଝୁପୁଡି ଘରେ ଜୀବନ ଯନ୍ତ୍ରଣା ସହ ଜୁଝି ହେଉଛନ୍ତି ଘରର ରୋଜଗାରିଆ ପୁଅ । ପରିଣତ ବୟସରେ ପୁଅକୁ ଆଶାବାଡି କରି ବଂଚିବାକୁ ଚାହୁଁଥିବା ବୁଢା ବାପାମାଆ ଏବେ ଭେଣ୍ଡିଆ ପୁଅର ଆଶାବାଡି ସାଜିଛନ୍ତି । ଏହି ରୋଗାଗ୍ରସ୍ତ ଯୁବକ ହେଉଛନ୍ତି ଜଗତସିଂହପୁର ଜିଲ୍ଲା ନାଉଗାଁ ବ୍ଲକ ବାଲିକଣ ଗାଁର ତପନ ଜେନା ।
ତପନ ରାଜ୍ୟ ବାହାରେ କାମ କରି ବାପା-ମାଆଙ୍କୁ ପୋଷୁଥିଲେ । ୨୦୦୮ରେ ହଠାତ୍ ମେରୁଦଣ୍ଡ ଜନିତ ରୋଗର ଶିକାର ହେଲେ । ଆଉ ସେବେଠୁ ତାଙ୍କ ଜୀବନକୁ ଢାଙ୍କି ଦେଇଛି ଦଃଖର କଳାହାଣ୍ଡିଆ ବାଦଲ । ଚିକିତ୍ସା ବାବଦରେ ଅଭାବୀ ପରିବାର ନିଜର ସବୁ ସାମର୍ଥ୍ୟ ସାରିବା ପରେ ଏବେ ପୁଅକୁ ଘରେ ରଖିଛନ୍ତି । ୮୨ ବର୍ଷିୟ ବାପା ଓ ୭୫ ବର୍ଷିୟ ମାଆ ପୁଅର ସେବା କରୁଥିବା ବେଳେ ଆର୍ଥିକ ସହଯୋଗ ପାଇଁ ଆକୁଳ ନିବେଦନ କରିଛନ୍ତି ।
ତପନଙ୍କ ସ୍ୱାସ୍ଥ୍ୟବସ୍ଥା ସଂପର୍କରେ ନାଉଗାଁ ବିଡିଓ ମୁହଁ ଖୋଲୁ ନଥିବା ବେଳେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ କହିଛନ୍ତି, ତାଙ୍କ ଚିକିତ୍ସା ପାଇଁ ସମସ୍ତ ପ୍ରକାର ବନ୍ଦୋବସ୍ତ କରିବ ସ୍ୱାସ୍ଥ୍ୟ ବିଭାଗ ।