କଅଁଳ ବୟସରେ କ୍ୟାନସର ବୋଝ: ଖେଳିବା ବୁଲିବା ସମୟରେ ମାରାତ୍ମକ ରୋଗ ଯନ୍ତ୍ରଣା ଭୋଗୁଛନ୍ତି କୁନି ପୁଅ ସୌରଭ
କନକ ବ୍ୟରୋ: କଅଁଳ ବୟସରେ ରୋଗ ଯନ୍ତ୍ରାଣାର ବୋଝ । ଯେଉଁ ବୟସରେ ସାଙ୍ଗସାଥୀଙ୍କ ସହ ସମୟ ବିତାଇବା କଥା ସେହି ବୟସରେ କ୍ୟାନସର ଭଳି ମାରତ୍ମକ ରୋଗରେ ଆକ୍ରାନ୍ତ ହୋଇ ଜୀବନ ମରଣ ସହ ସଂଘର୍ଷ କରୁଛି କେନ୍ଦ୍ରାପଡ଼ାର ୧୦ ବର୍ଷର ପୁଅ ସୌରଭ । ଏପଟେ ପୁଅକୁ ଚିକିତ୍ସା କରାଇବା ପାଇଁ ବାପା ମା’ଙ୍କ ପାଖରେ ଅର୍ଥ ସାଜିଛି ବାଧକ । ଘର ଘର ବୁଲି ଭିକ ମାଗୁଛି ମା’ । କରଣ କିଛି ଅର୍ଥ ଯୋଗାଡ଼ କଲେ ପୁଅର ଚିକିତ୍ସା କରାଇବେ । କେନ୍ଦ୍ରାପଡ଼ା ଆଳି ବ୍ଲକ ଅନ୍ତର୍ଗତ ମହୁ ଗାଁର ଗଜେନ୍ଦ୍ର ମଲ୍ଲିକ ଓ ଦେବକୀ ମଲ୍ଲିକଙ୍କ ପୁଅ ସୌରଭ । ଗତ ୬ ମାସ ତଳେ ସୌରଭକୁ ଜର ହୋଇଥିଲା । ସାଧାରଣ ଜର ଭାବି ନିକଟସ୍ଥ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସା କରାଇଥିଲେ ବାପା-ମା’ ।
Kanak News is now on WhatsApp
Join and get latest news updates delivered to you via WhatsApp
ହେଲେ ଜର ନକମିବାରୁ କଟକ ନେଇ ରକ୍ତ ପରୀକ୍ଷା କରିବା ପରେ ତାଙ୍କୁ ବ୍ଲଡ଼ କ୍ୟାସନର ହୋଇଥିବା ଜଣାପଡ଼ିଥିଲା । ଆଉ ଏହି ଖବର ଶୁଣି ବାପା-ମା’ଙ୍କ ପାଦତଳୁ ଯେମିତି ମାଟି ଖସିଯାଇଥିଲ । କାରଣ ପୁଅର ଚିକିତ୍ସା କରାଇବା ପାଇଁ ଏତେ ଟଙ୍କା ଆସିବ କେଉଁଠୁ । ବାପା ଗଜେନ୍ଦ୍ର ଏକ ଘରୋଇ କମ୍ପାନୀରେ ଠିକା କର୍ମଚାରୀ ଭାବେ କାମ କରନ୍ତି । ଚିକିତ୍ସା ପାଇଁ ଏତେ ଟଙ୍କା ଯୋଗାଡ଼ କରିବା ସମ୍ଭବ ନୁହେଁ । ପାଖରେ ଯାହା କିଛି ଅର୍ଥ ଥିଲା ଏବଂ ଧାର କରଜ କରି ପୁଅକୁ ଚିକିତ୍ସା କରାଇସାରିଲେଣି ବାପା-ମା’ । ଆଉ ଚିକିତ୍ସା ପାଇଁ ପାଖରେ ସମ୍ବଳ ନାହିଁ । ଗଜେନ୍ଦ୍ର କମ୍ପାନୀ କାମ ଛାଡ଼ି ଘରକୁ ଆସିବା ପରେ ଏବେ ପରିବାର ଚଳିବା ବି କଷ୍ଟକର । ତେଣୁ କିଛି ସହୃଦୟ ବ୍ୟକ୍ତି ଚିକିତ୍ସା ପାଇଁ କିଛି ସହାୟତା ଯୋଗାଇଦେବାକୁ ନିବେଦନ କରିଛନ୍ତି ସୌରଭଙ୍କ ବାପା ମା’ । ଚତୁର୍ଥ ଶ୍ରେଣୀରେ ପାଠପଢ଼ୁଥିବା ସୌରଭ ବଡ଼ ହେଲେ ଜଣେ ଡାକ୍ତର ହେବାର ସ୍ୱପ୍ନ ରଖିଛନ୍ତି କିନ୍ତୁ କ୍ୟାନସର ରୋଗ ଏବେ ତାଙ୍କ ସ୍ୱପ୍ନରେ ବାଧକ ସାଜିଛି । ତେଣୁ କିଭଳି ପୁଅକୁ ଏହି ରୋଗରୁ ଭଲ କରିବେ ତାକୁ ନେଇ ବାପା-ମା’ଙ୍କ ଆଖିରୁ ଲୁହ ଶୁଖୁନାହିଁ । ଚିନ୍ତାରେ ଘରେ ଚୁଲି ଜଳୁନାହିଁ । ପୁଅକୁ ଭଲ କରିବା ପାଇଁ କାନି ପତାଇ ଘର ଘର ବୁଲି ଭିକ ମାଗୁଛି ମା’ ।