ଋଣ ଟଙ୍କା କାମରେ ଲଗାଉନାହାନ୍ତି ଏସଏଚଜି । ଠିକ ସମୟରେ କରିପାରୁନାହାନ୍ତି ଋଣ ପରିଶୋଧ ।
କନକ ବ୍ୟୁରୋ: ରାଜ୍ୟର ସ୍ୱୟଂ ସହାୟକ ଗୋଷ୍ଠୀ ବା ଏସଏଚଜିଙ୍କୁ ନେଇ ଆସିଛି ଚକିତ କଲାଭଳି ରିପୋର୍ଟ । ଏସଏଚଜି ଗୁଡିକ ବିନା ସୁଧରେ ଯେଉଁ ରୁଣ ଉଠାଉଛନ୍ତି, ତାକୁ ସଠିକ୍ କାମରେ ଲଗାଉ ନାହାଁନ୍ତି । ଏହାସହ ଠିକ୍ ସମୟରେ ରୁଣ ପିରଶୋଧ କରି ପାରୁ ନାହାଁନ୍ତି । ବିଜେଡି ବିଧାୟକ ସୁଶାନ୍ତ ସିଂହଙ୍କ ଅଧ୍ୟକ୍ଷତାରେ ଗଠିତ କମିଟି ଦ୍ୱାରା ଏଭଳି ତଥ୍ୟ ସାମ୍ନାକୁ ଆସିଛି । ଯାହାକୁ ନେଇ ରାଜନୈତିକ ବୟାନବାଜି ମଧ୍ୟ ଆରମ୍ଭ ହୋଇ ଯାଇଛି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟର ସ୍ୱୟଂ ସହାୟକ ଗୋଷ୍ଠୀ ବା ଏସଏଚଜିଙ୍କକୁ ନେଇ ଏମିତି କିଛି ଚମକାଇ ଦେବା ଭଳି ତଥ୍ୟ ଦେଇଛି ବିଧାନସଭା ସ୍ଥାୟୀ କମିଟି । ଏସଏଚଜି ମହିଳାଙ୍କ ସଶକ୍ତିକରଣ ଲାଗି ବିନା ସୁଧରେ ସରକାର ଯୋଗାଇ ଦେଉଥିବା ରୁଣ, ଟଙ୍କାକୁ ସ୍ୱୟଂ ସହାୟକ ଗୋଷ୍ଠୀମାନେ ଠିକ୍ ବାଟରେ ବିନିଯୋଗ କରୁନଥିବାରୁ ଅସନ୍ତୋଷ ପ୍ରକାଶ କରିଛନ୍ତି । ବିଜେଡି ବିଧାୟକ ସୁଶାନ୍ତ ସିଂହଙ୍କ ଅଧ୍ୟକ୍ଷତାରେ ଗଠିତ କମିଟିର ରିପୋର୍ଟ ଅନୁସାରେ.
-‘ଏସଏଚଜି’ଗୁଡିକ ଯେଉଁସବୁ ସାମଗ୍ରୀ ପ୍ରସ୍ତୁତ କରିବା ପାଇଁ ଋଣ ନେଉଛନ୍ତି, ବାସ୍ତବକ୍ଷେତ୍ରରେ ତାହା କରୁନାହାନ୍ତି
– ବ୍ୟାଙ୍କରୁ ଆଣୁଥିବା ଋଣ ଠିକ ସମୟରେ ପରିଶୋଧ କରିପାରୁନାହାନ୍ତି
ତେବେ ଏସଏଚଜି ଗୁଡିକ କେମିତି ସେମାନଙ୍କ ଲକ୍ଷ୍ୟ ହାସଲ କରିବେ, ଆହୁରି ସଶକ୍ତ ହୋଇପାରିବେ, ସେ ଦିଗରେ ପଦକ୍ଷେପ ନେବାକୁ ପରାମର୍ଶ ଦେଇଛି କମିଟି । ଯାହାକୁ ଦୃଷ୍ଟିରେ ରଖି କେତେକ ପଦକ୍ଷେପ ନେବାକୁ ସୁପାରିସ କରିଛି କମିଟି..
– ଏସଏଚଜି ସଦସ୍ୟାକୁ ବିଭିନ୍ନ ସାମଗ୍ରୀ ଉତ୍ପାଦନ ପାଇଁ ତାଲିମ ଦିଆଯାଉ
– ଉତ୍ପାଦିତ ସାମଗ୍ରୀର ବିକ୍ରି ପାଇଁ ପ୍ରତି ପଂଚାୟତରେ ସ୍ୱତନ୍ତ୍ର ବଜାର ସୃଷ୍ଟି କରାଯାଉ
– ଏମବିକେମାନେ ସେମାନଙ୍କ ଭୂମିକା ଠିକ୍ ଭାବରେ ନିର୍ବାହ କରନ୍ତୁ
ବିଧାନସଭା ସ୍ଥାୟୀ କମିଟିର ରିପୋର୍ଟ ପରେ ଆରମ୍ଭ ହୋଇଛି ରାଜନୈତିକ ବୟାନବାଜି । ବିରୋଧୀ ଦଳ ନେତା ଜୟନାରାୟଣ ମିଶ୍ର କହିଛନ୍ତି, କମିଟି ଦେଇଥିବା ରିପୋର୍ଟରେ ସତ୍ୟାସତ୍ୟ ରହିଛି । ସରକାରୀ କର୍ମଚାରୀଙ୍କ ସ୍ତରରେ ଯେଉଁ ଦୁର୍ନୀତି ଥିଲା, ତାକୁ ତଳ ସ୍ତରକୁ ନେଇ ଏସଏଚଜି ଗ୍ରୁପ୍ ଦ୍ୱାରା ଦୁର୍ନୀତି ହେଉଛି । ତେବେ ଜୟନାରାୟଣଙ୍କ ପ୍ରତିକ୍ରିୟା ପରେ ଜବାବ ରଖିଛି ବିଜେଡି । ସାଂସଦ ସୁଲତା ଦେଓ କହିଛନ୍ତି, ଜୟନାରାୟଣ ଏସଏଚଜି ମା’ମାନଙ୍କୁ ଅପମାନଙ୍କୁ ଅପମାନିତ କରିଛନ୍ତି । ଏହା ସାରା ଓଡି଼ଶାର ମା’ମାନଙ୍କ ପ୍ରତି ଅପମାନ ।
ରାଜ୍ୟ ସରକାରଙ୍କ ଫୋକସରେ ଥିବା ଏସଏଚଜିକୁ ନେଇ ବିଧାନସଭା କମିଟିର ରିପୋର୍ଟ, ଚମକାଇ ଦେଇଥିବାବେଳେ, ଏହାକୁ ନେଇ ରାଜନୈତିକ ବୟାନବାଜି ଆଗାମି ଦିନରେ ବଡ ବିତର୍କର ବିଷୟ ହୋଇପାରେ ।