କେମିତି ମଉଳିଲା ମଧ୍ୟବିତ୍ତର ସ୍ୱପ୍ନ ? ସମ୍ବଲପୁରରୁ ଆସିଲା ଆତ୍ମହତ୍ୟା ପୂର୍ବର କାହାଣୀ, ବାଇକ ବନ୍ଧା ରଖି ପରିଚିତଙ୍କ ଠାରୁ ଚାହିଁଥିଲେ ସାହାଯ୍ୟ
କନକ ବ୍ୟୁରୋ : ସେମିତି ଥୁଆ ହୋଇଛି ହାରମୋନିୟମ୍, ସେମିତି ଥୁଆ ହୋଇଛି ତବଲା । ସୁର-ତାଳର ବ୍ୟାକରଣ ବୁଝାଇବା ପାଇଁ ବ୍ୟବହାର କରୁଥିବା ହାତଲେଖା ନୋଟ୍ ବୁକ୍ ବି ସେମିତି ପଡ଼ି ରହିଛି । ଖାଁ ଖାଁ ଲାଗୁଥିବା ସଂଗୀତ ଶିକ୍ଷାଗୃହ ବୋଧେ ଖୋଜୁଛି, ନିଜର ପ୍ରିୟ ସଂଗୀତ ଶିକ୍ଷକ ଧରଣୀଧର ପଣ୍ଡାଙ୍କୁ । ସହ-ଶିକ୍ଷକ ବି ଝୁରି ହେଉଛନ୍ତି । ହେଲେ ଧରଣୀଧର ସାର୍, ଚାଲି ଯାଇଛନ୍ତି କେଉଁ ଅଜଣା ଦୁନିଆକୁ । ଯେଉଁଠି ବଂଚିବା ପାଇଁ ଲୋଡ଼ା ନଥିବ ଅର୍ଥ, ନା’ ଗୁରୁରାଣ ମେଂଟାଇବା ପାଇଁ ଆବଶ୍ୟକ ହେଉଥିବ ମୋଟା ଦରମା।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦୁଇ ମାସର ଘର ଭଡ଼ା ବାକି ପଡ଼ିଥିଲା । ତା ସାଙ୍ଗକୁ ହାତ ଉଧାରୀ । ଟଙ୍କା ଫେରାଉ ନଥିବାରୁ ମିଳୁଥିଲା ଅପମାନ ଓ ଧମକ୍ । ବହୁ କଷ୍ଟରେ କରିଥିବା ବାଇକକୁ ବନ୍ଧକ ରଖିବାକୁ ବି ନିଷ୍ପତ୍ତି ନେଇଥିଲେ । ହେଲେ ୨୦ ହଜାର ଟଙ୍କା ଯୋଗାଡ଼ କରିବାରେ ସକ୍ଷମ ହୋଇ ନଥିଲେ ଧରଣୀଧର । ଆଉ ସବୁ ବାଟ ଯେତେବେଳେ ବନ୍ଦ ହୋଇଗଲା, ବାଛି ନେଇଥିଲେ ଆତ୍ମହତ୍ୟାର ବାଟ ।
ଏକ ଘରୋଇ ଶିକ୍ଷାନୁଷ୍ଠାନରେ ଶିକ୍ଷକତା କରି ପରିବାର ଚଳାଉଥିବା, ଧରଣୀଧରଙ୍କର ମାସିକ ଦରମା ଥିଲା ୧୨ ହଜାର । ଟ୍ୟୁସନ୍ କରି ୪ରୁ ୫ ହଜାର ରୋଜଗାର ବି କରୁଥିଲେ । ଉପରକୁ ପୁଣି ଝିଅଙ୍କ ପାଠପଢ଼ା । ୩-୩ଟି ଝିଅ ସହ ୫ ଜଣିଆ ପରିବାର ପ୍ରତିପୋଷଣ କରିବା ତାଙ୍କ ପକ୍ଷେ ସଂଭବ ହେଉନଥିଲା । ବଡ ଝିଅ ଅନନ୍ୟା ପଣ୍ଡା, ଯିଏ ଖୁବ୍ ମେଧାବୀ । ମାଟ୍ରିକରେ ପ୍ରାୟ ୧୦ ସିଜିପିଏ ହାରରେ ମାଟ୍ରିକ ହେବା ପରେ ଯୁକ୍ତ ଦୁଇ ପଢ଼ୁଥିଲେ । ମଝିଆଁ ଝିଅ ଅପରାଜିତା ପଣ୍ଡା ଯିଏ ବାବା ପଢ଼ାଉଥିବା ସ୍କୁଲରେ ମାଟ୍ରିକ୍ ପରୀକ୍ଷା ଦେଇଥାନ୍ତେ । ସ୍କୁଲ ଶିକ୍ଷକଙ୍କ କହିବା କଥା ହେଲା, ଅପରାଜିତା ବି ଥିଲେ ମେଧାବୀ ଛାତ୍ରୀ ।
ଏପଟେ ପୁରା ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ରେଲୱେ ପୁଲିସ୍ ଏସପି । ଧରଣୀଧରଙ୍କ ଆୟ ବ୍ୟୟ ହିସାବ ଏବଂ ଋଣ ସଂପର୍କିତ ତଥ୍ୟକୁ ଏହାର ପରିସର ଭୁକ୍ତ କରିବାକୁ ନିଦ୍ଦେଶ ଦିଆଯାଇଛି । ଧରଣୀଧରଙ୍କ କାହାଣୀ, ନିମ୍ନମଧ୍ୟବିତ୍ତର କାହାଣୀ । ଯିଏ, ପୁଅ-ଝିଅଙ୍କୁ ନେଇ ବଡ ବଡ ସ୍ୱପ୍ନ ଦେଖେ । ଆଉ ଏଥିପାଇଁ ଜୀବନବ୍ୟାପି ସଂଘର୍ଷ କରେ । ଆଉ ଯେତେବେଳେ ହାରି ଯାଏ ବୋଧହୁଏ, ଏହି ଭଳି ଚରମ ନିଷ୍ପତ୍ତି ନେବାକୁ ବାଧ୍ୟ ହୁଏ ।