ଲମ୍ବିଛି ନକଲି ସାର୍ଟିଫିକେଟ ଚେର : ଯୋଡି ହେଲା ଏକ ନୂଆ ଅଭିଯୋଗ; ଡାକ ବିଭାଗ ପକ୍ଷରୁ ରାୟଗଡା ଟାଉନ ଥାନାରେ ଏତଲା
କନକ ବ୍ୟୁରୋ : ଲମ୍ବି ଲମ୍ବି ଚାଲିଛି ଫେକ୍ ସାର୍ଟିଫିକେଟର ଚେର । ଏହି ମାମଲାରେ ଯୋଡି ହୋଇଯାଇଛି ଏକ ନୂଆ ଅଭିଯୋଗ । ରାୟଗଡାରେ ଗ୍ରାମୀଣ ଡାକ ସେବା ପାଇଁ ଆବେଦନ ବେଳେ ଧରାପଡିଛି ୟୁପି ବୋର୍ଡର ନକଲି ମାଟ୍ରିକ ସାର୍ଟିଫିକେଟ । ଡାକ ବିଭାଗ ପକ୍ଷରୁ ରାୟଗଡା ଟାଉନ ଥାନାରେ ଏନେଇ ଏତଲା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଗ୍ରାମୀଣ ଡାକ ସେବାର ଆବେଦନର ଦ୍ୱିତୀୟ ପର୍ଯ୍ୟାୟ ସାର୍ଟିଫିକେଟ ଯାଞ୍ଚର ଶେଷ ଦିନରେ ୩୪ ଜଣ ଆବେଦନକାରୀଙ୍କ ସାର୍ଟିଫିକେଟ ଯାଞ୍ଚ କରାଯାଇଥିଲା । ଏହାରି ଭିତରେ ଆବେଦନକାରୀ ରବି ହିଆଲଙ୍କ ସାର୍ଟିଫିକେଟ ଯାଞ୍ଚ ବେଳେ ସନ୍ଦେହ ଉପୁଜିଥିଲା । ୨୦୧୧ରେ ରବି, ୟୁପି ବୋର୍ଡରୁ ମାଟ୍ରିକ ପାସ୍ କରିଥିବା ସାର୍ଟିଫିକେଟ ଦେଇଥିଲେ । ସନ୍ଦେହ ହେବାରୁ ଡିଜି ଲକର ଓ ୟୁପି ବୋର୍ଡରେ ଖୋଲତାଡ କରିବା ପରେ ତାହା ନକଲି ବୋଲି ଜଣାପଡିଥିଲା । ଏହି ମାଟ୍ରିକ ସାର୍ଟିଫିକେଟରେ ୟୁପି ବୋର୍ଡର ରାଞ୍ଚି ସେଣ୍ଟରରେ ୨୦୧୧ ବର୍ଷରେ ପରୀକ୍ଷା ଦେଇଥିବା ଦର୍ଶାଯାଇଛି ।
ଏବଂ ଓଡିଆ ବିଷୟ ଥାଇ ମାଟ୍ରିକ ପରୀକ୍ଷା ଦେଇ ସମସ୍ତ ବିଷୟରେ ୯୯ ପ୍ରତିଶତ ମାର୍କ ରଖି ପାସ୍ କରଥିବା ସାର୍ଟିଫିକେଟରେ ଉଲ୍ଲେଖ ରହିଛି । ରାୟଗଡା ଜିଲ୍ଲା ବିଷମକଟକ ବ୍ଳକ ଘଟିଂଖାଲ ଗାଁର ରବି ହିଆଲ । ସେ ବିଷମକଟକ ବ୍ଳକରେ ଦଶମ ପରୀକ୍ଷା ନଦେଇ କେରଳ ଚାଲିଯାଇଥିଲେ ଦାଦନ ଖଟିବାକୁ । ତାଙ୍କୁ ଭିକାରୀ ମାଝି ନାମକ ଜଣେ ବ୍ୟକ୍ତି ଏହି ନକଲି ସାର୍ଟିଫିକେଟ ଦେଇଥିବା ସେ କହିଛନ୍ତି । ବର୍ତ୍ତମାନ ରବି ରାୟଗଡା ସ୍ଥିତ ଏକ ଘରୋଇ କଲେଜରେ ବିଟେକ୍ ବିଭାଗର ତୃତୀୟ ବର୍ଷର ଛାତ୍ର ।