ମୁଖ୍ୟମନ୍ତ୍ରୀ ଚେହେରାକୁ ନେଇ ମୁହଁ ଖୋଲିଲେ ସିଦ୍ଧୁ । କହିଲେ, ହାଇକମାଣ୍ଡଙ୍କ ନିଷ୍ପତ୍ତି ଶେଷ ନିଷ୍ପତ୍ତି । ପରିବର୍ତ୍ତନ ପାଇଁ ଜରୁରୀ ନୁହେଁ ସିଟ୍ ।
କନକ ବ୍ୟୁରୋ: ପଞ୍ଜାବରେ ବିଧାନସଭା ନିର୍ବାଚନ ହେବାକୁ ଅଛି । କଂଗ୍ରେସ ପ୍ରଦେଶ ଅଧ୍ୟକ୍ଷ ନବଜୋତ ସିଂହ ସିଦ୍ଧୁ ଅମୃତସର ପୂର୍ବ ଆସନରୁ ନିର୍ବାଚନ ମୈଦାନକୁ ଓହ୍ଲାଇଛନ୍ତି । ତେବେ ଏଭଳି ସମୟରେ ପଞ୍ଜାବରେ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କୁ ନେଇ ବିବାଦ ସୃଷ୍ଟି ହୋଇଛି । ଆଉ ଏହାକୁ ନେଇ ଏବେ ପ୍ରତିକ୍ରିୟା ରଖିଛନ୍ତି ସିଦ୍ଧୁ ।
Kanak News is now on WhatsApp
Join and get latest news updates delivered to you via WhatsApp
ସିଦ୍ଧୁଙ୍କୁ କହିବା ଅନୁସାରେ, ସିଏମ୍ ପଦକୁ ନେଇ ଦଳର ହାଇକମାଣ୍ଡ ଯାହା ନିଷ୍ପତ୍ତି ନେବେ ତାହା ହିଁ ଶେଷ ନିଷ୍ପତ୍ତି । ସେ ଏହାକୁ ସ୍ୱୀକାର କରିବେ ଏବଂ ଶେଷ ନିଶ୍ୱାସ ପର୍ଯ୍ୟନ୍ତ କଂଗ୍ରେସରେ ରହିବେ । ତେବେ ଚରଣଜିତ ସିଂହଙ୍କ ଭଳି ଦଳିତ ଚେହେରାଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରାଯାଇପାରେ ବୋଲି ପ୍ରଶ୍ନରେ ସେ କହିଛନ୍ତି, ପଞ୍ଜାବ ଜାତିରୁ ନୁହେଁ ବରଂ ମୁଦ୍ଧାରେ ପରିବର୍ତ୍ତନ ହେବ । ପାର୍ଟି ଯାହା ନିଷ୍ପତ୍ତି ନେବେ, ତାକୁ ସମସ୍ତେ ଗ୍ରହଣ କରିବେ ବୋଲି ସିଦ୍ଧୁ କହିଛନ୍ତି ।
ଅନ୍ୟପଟେ ପ୍ରକାଶ ସିଂହ ବାଦଲଙ୍କୁ ଧ୍ରୁତରାଷ୍ଟ୍ର ବୋଲି କହି ସେ କହିଛନ୍ତି, ତାଙ୍କୁ କେବଳ ସୁଖବୀରଙ୍କ ଛଡା ଆଉ କେହି ଦେଖାଯାଉନାହାଁନ୍ତି । ଗତ ବହୁବର୍ଷ ଧରି କ୍ୟାପଟେନ୍ ଅମରିନ୍ଦର ସିଂହ ଓ ବାଦଲ ପରସ୍ପରକୁ ସୁରକ୍ଷା ଦେଇ ଆସୁଛନ୍ତି । ଏ ସବୁକୁ ଭାଙ୍ଗି ଏବେ ନୂଆ ସିଷ୍ଟମ ଆଣିବା ସହିତ ରାଜ୍ୟକୁ ଏକ ଜନମଙ୍ଗଳ ରାଜ୍ୟରେ ବଦଳାଇବା ଆମର ଲକ୍ଷ୍ୟ ବୋଲି ସିଦ୍ଧୁ କହିଛନ୍ତି ।
ସୂଚନାଯୋଗ୍ୟ ଯେ, ପଞ୍ଜାବରେ ବିଧାନସଭା ନିର୍ବାଚନ ତାରିଖ ପାଖେଇବା ସହିତ ରାଜନୀତି ମଧ୍ୟ ସରଗରମ ହେବାରେ ଲାଗିଛି । ବିଶେଷକରି କଂଗ୍ରେସରେ ମୁଖ୍ୟମନ୍ତ୍ରୀ ପଦକୁ ନେଇ ବିବାଦ ଛିଡା ହେଇଛି । ଗୋଟିଏ ପଟେ ନବଜୋତ୍ ସିଂହ ସିଦ୍ଧୁଙ୍କ ଗୋଷ୍ଠୀ ସିଦ୍ଧୁଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରିବାକୁ ଦାବି କରୁଥିବାବେଳେ, ଅନ୍ୟପଟେ ଚରଣଜିତ ସିଂହ ଚନ୍ନୀ ମଧ୍ୟ ରେସରେ ଅଛନ୍ତି । ଏହାରି ଭିତରେ ଦଳ କାହାକୁ ଚେହେରା କରୁଛି ତାହା ଦେଖିବାକୁ ବାକି ରହିଲା ।