କନକ ବ୍ୟୁରୋ: ରାଜ୍ୟରେ ସଂକ୍ରମଣ ବୃଦ୍ଧି ପାଉଥିବାବେଳେ ରାଜ୍ୟ ସରକାର ଟିକାକରଣ ଉପରେ ଅଧିକ ଗୁରୁତ୍ୱ ଦେଇଛନ୍ତି । କେନ୍ଦ୍ରର ନିର୍ଦ୍ଦେଶ ଅନୁଯାୟୀ ଆସନ୍ତାକାଲି ଅର୍ଥାତ ଜୁଲାଇ ୧୫ ଠାରୁ ରାଜ୍ୟର ସମସ୍ତ ସରକାରୀ ସ୍ୱାସ୍ଥ୍ୟ କେନ୍ଦ୍ରରେ ୧୮ରୁ ୫୯ ବର୍ଷର ଲୋକମାନଙ୍କୁ ମାଗଣା ଟିକା ଦିଆଯିବ ବୋଲି ସୂଚନା ଦେଇଛନ୍ତି ପରିବାର କଲ୍ୟାଣ ନିର୍ଦ୍ଦେଶକ ଡାକ୍ତର ବିଜୟ ପାଣିଗ୍ରାହୀ । ୭୫ ଦିନ ପର୍ଯ୍ୟନ୍ତ ଏହି ପ୍ରକ୍ରିୟା ଜାରି ରହିବ । ସମସ୍ତେ ଟିକାକରଣରେ ଭାଗ ନେବା ପାଇଁ ଅନୁରୋଧ କରିଛନ୍ତି ନିର୍ଦ୍ଦେଶକ ।
Kanak News is now on WhatsApp
Join and get latest news updates delivered to you via WhatsApp
ଟିକାକରଣ ପାଇଁ ପୂର୍ବରୁ ଜନସାଧାରଣଙ୍କର ଆଗ୍ରହ କମିଥିବା ବେଳେ, ସଂକ୍ରମଣର ଚେନ୍, ବୁଷ୍ଟର ଡୋଜ ଦ୍ୱାରା ହି ଭାଙ୍ଗିପାରିବ ବୋଲି କହିଛନ୍ତି ବରିଷ୍ଠ ଚିକିତ୍ସକ । ଦ୍ୱିତୀୟ ଡୋଜ ନେବାର ୬ମାସ ପରେ ବୁଷ୍ଟର ଡୋଜ ନେଇପାରିବେ । କୋୱିନ ଆପରେ ରେଜିଷ୍ଟ୍ରେସନ କରି ଟିକା ନେଇ ପାରିବେ । କିମ୍ବା ସିଧାସଳଖ ଟିକାକରଣ କେନ୍ଦ୍ରରେ ମଧ୍ୟ ଟିକା ନେଇପାରିବେ ।
ଗତ କିଛି ଦିନ ଧରି କରୋନା ସଂକ୍ରମଣ ୫ଶହ ଉପରେ ରହିଥିବା ବେଳେ ଗତକାଲି ସଂକ୍ରମଣ ୭ ଶହ ଉପରକୁ ଉଠିଥିଲା ଏବଂ ଗତ ୨୪ ଘଣ୍ଟା ମଧ୍ୟରେ ଏହି ସଂଖ୍ୟା ୮ ଶହ ପାର କରିଛି । ନଜର ପକାଇବା ଗତ ୫ ଦିନ ମଧ୍ୟରେ କରୋନା ସଂକ୍ରମିତ ସଂଖ୍ୟା ଉପରେ ।
ଓଡ଼ିଶା କରୋନା ମିଟର
ତାରିଖ ଆକ୍ରାନ୍ତ
ଜୁଲାଇ ୧୪ ୮୦୪
ଜୁଲାଇ ୧୩ ୭୪୩
ଜୁଲାଇ ୧୨ ୫୦୯
ଜୁଲାଇ ୧୧ ୫୭୨
ଜୁଲାଇ ୧୦ ୫୭୬
ରାଜ୍ୟରେ ଚିନ୍ତା ବଢ଼ାଉଛି ଖୋର୍ଦ୍ଧା, କଟକର ସଂକ୍ରମଣ । ଖୋର୍ଦ୍ଧାରୁ ୩୦୭ ଆକ୍ରାନ୍ତ ଚିହ୍ନଟ ହେଇଥିବା ବେଳେ କଟକରୁ ୧୧୯, ସୁନ୍ଦରଗଡ଼ରୁ ୮୦ ଜଣ ଚିହ୍ନଟ ହୋଇଛନ୍ତି । ଭୁବନେଶ୍ୱର ଓ କଟକରେ କରୋନା ସଂକ୍ରମଣକୁ ରୋକିବା ପାଇଁ ବିଏମସି ଓ ସିଏମସି ତରଫରୁ ମାସ୍କକୁ ବାଧ୍ୟତାମୂଳକ କରାଯାଇଛି । କଟକଣା ନମାନିଲେ ଫାଇନ ଆଦାୟ କରାଯିବ ବୋଲି କୁହାଯାଇଛି ।