ସରକାର ବିକାଶର ବାଜା ବଜାଉଛନ୍ତି, ଗର୍ଭବତୀ ଖଟିଆରେ ବୁହାହେଉଛନ୍ତି । ରାସ୍ତା ନଥିବାରୁ ପହଞ୍ଚି ପାରିଲାନି ଆମ୍ବୁଲାନ୍ସ । ବୋହି ବୋହି ମେଡିକାଲ ନେଲେ ଲୋକେ
କନକ ବ୍ୟୁରୋ: କଣ ପାଇଁ କମୁନି ଜନନୀ ଯନ୍ତ୍ରଣା ? ସରକାର ଅପହଞ୍ଚ ଇଲାକାରେ ବିକାଶ ପହଞ୍ଚାଇବାକୁ ଯୋଜନା ପରେ ଯୋଜନା କରୁଛନ୍ତି । ସରକାରୀ ବାବୁ ଓ ସରକାରୀ ବ୍ୟବସ୍ଥାକୁ ଲୋକଙ୍କ ସମସ୍ୟା ବୁଝିବାକୁ ନିର୍ଦ୍ଦେଶ ଦେଉଛନ୍ତି ହେଲେ କୌଣସି ସୁଫଳ ମିଳୁନି । ଯଥା ପୂର୍ବଂ ତଥା ପରଂ । ଅର୍ଥାତ ଗର୍ଭବତୀ ମହିଳାଟି ସେହି ଯନ୍ତ୍ରଣା ପାଇବାଟା ଥୟ । ଗାଁକି ରାସ୍ତାଟିଏ ନଥିବାରୁ ପୁଣି ଜଣେ ଜନନୀ ଖଟିଆରେ ବୁହା ହୋଇଛନ୍ତି । ଗାଁ ଲୋକଙ୍କ ସହୟତାରେ ତାଙ୍କୁ ମେଡିକାଲ ନିଆଯାଇଛି । ତେବେ ଏଭଳି ଏକ ଖବର ଆସିଛି ନୂଆପଡା ଅଞ୍ଚଳରୁ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଆଜି ନୂଆପଡା କପରଗଡ଼ ଗାଁର ଉମାଶଙ୍କର ମାଝୀଙ୍କ ସ୍ତ୍ରୀ ଘରମଣୀ ମାଝୀଙ୍କୁ ଗର୍ଭ ଯନ୍ତ୍ରଣା ଆରମ୍ଭ ହୋଇଥିଲା। ସ୍ତ୍ରୀଙ୍କୁ ମେଡିକାଲ ନେବା ପାଇଁ ଉମାଶଙ୍କର ସ୍ଥାନୀୟ ଆଶାକର୍ମୀଙ୍କୁ ଫୋନରେ ଜଣାଇଥିଲେ। ଏହା ପରେ ଆଶାକର୍ମୀ ଓ ଏଏନଏମ୍ ଏବାବଦରେ ଆମ୍ବୁଲାନସକୁ ଜଣାଇଥିଲେ। ମାତ୍ର ରାସ୍ତା ଖରାପ ଥିବାରୁ ଗାଁକୁ ଆମ୍ବୁଲାନସ ଆସିପାରି ନଥିଲା । ତେଣୁ ବାଧ୍ୟ ହୋଇ ଗ୍ରାମବାସୀମାନେ ଡାକ୍ତରଖାନା ତରଫରୁ ପୂର୍ବରୁ ଦିଆଯାଇଥିବା ଷ୍ଟ୍ରେଚରରେ ଗର୍ଭବତୀ ଙ୍କୁ ଏକ ବୋହି ନେଇଥିଲେ।
ଗ୍ରାମବାସୀମାନେ ଦୀର୍ଘ ୩ କିଲୋମିଟର ପର୍ୟ୍ୟନ୍ତ ଏହି ଷ୍ଟ୍ରେଚରରେ ବୋହି ଗର୍ଭବତୀଙ୍କୁ ଶେଷରେ ନେଇ ଖଡ଼ିଆଲ ସରକାରୀ ଡାକ୍ତରଖାନାରେ ନେଇ ଭର୍ତ୍ତି କରିଥିଲେ। ଡାକ୍ତରୀ ଚିକିତ୍ସା ପରେ ମହିଳା ଜଣକ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ।