ଲଘୁଚାପ ଆଣିବ କି ବାତ୍ୟା? ଜାଣନ୍ତୁ କାହାର ଆକଳନ କଣ, ଓଡ଼ିଶା ଉପରେ କଣ ପଡିବ ପ୍ରଭାବ?
କନକ ବ୍ୟୁରୋ : ଦକ୍ଷିଣ ଆଣ୍ଡାମାନ ସାଗରରେ ସମ୍ଭାବ୍ୟ ଲଘୁଚାପକୁ ନେଇ ଆଶଙ୍କା ବଢିଛି । ଏହି ଲଘୁଚାପ ଅଧିକ ଘନୀଭୂତ ହୋଇ ବାତ୍ୟାର ରୂପ ନେବ କି ? ବାତ୍ୟାର ରୂପ ନେଲେ କେଉଁଠି ସ୍ଥଳଭାଗକୁ ଛୁଇଁବ ? ଏନେଇ ପାଣିପାଗ ବିଜ୍ଞାନୀ, ପାଣିପାଗ ସଂସ୍ଥା ନଜର ରଖିଛନ୍ତି ଏବଂ ଭିନ୍ନ ଭିନ୍ନ ମତ ଦେଉଛନ୍ତି । ଭାରତୀୟ ପାଣିପାଗ ବିଭାଗ ପକ୍ଷରୁ ଏଯାଏଁ ସ୍ପଷ୍ଟ ଚିତ୍ର ଦେଇନାହିଁ । ସେପଟେ ସ୍କାଏମେଟ ପୂର୍ବାନୁମାନ କରି କହିଛି ଲଘୁଚାପ ବାତ୍ୟାର ରୂପ ନେଲେ ଓଡିଶା ଉପରେ ଅଧିକ ପ୍ରଭାବ ପଡିବ ନାହିଁ । ସେପଟେ ବିଦେଶୀ ପାଣିପାଗ ସଂସ୍ଥା ୱିଣ୍ଡି ଡଟ କମ ଆକଳନ କରି କହିଛି, ମେ ୧୦ ତାରିଖରେ ବାଲେଶ୍ୱର ନିକଟରେ ବାତ୍ୟା ମାଡ ହେବ ।
Kanak News is now on WhatsApp
Join and get latest news updates delivered to you via WhatsApp
ଦକ୍ଷିଣ ଆଣ୍ଡାମାନ ସାଗର ଉପରେ ଏବେ ପାଣିପାଗ ବିଜ୍ଞାନୀଙ୍କ ନଜର ରହିଛି କାରଣ ଏଠାରେ ବଡ ଧରଣର ହଲଚଲ ହେବାକୁ ଯାଉଛି । ଭାରତୀୟ ପାଣିପାଗ ବିଭାଗର ଆକଳନ କହୁଛି ଏହି ଆକାଶରେ ମେଘ ଆସିବ ଏବଂ ପରେ ପରେ ୪ ତାରିଖରେ ଘୁର୍ଣ୍ଣିବଳୟ ଓ ୨୪ ଘଣ୍ଟା ଭିତରେ ଲଘୁଚାପ କ୍ଷେତ୍ର ସୃଷ୍ଟି ହୋଇପାରେ । ପୁଣି ପରବର୍ତ୍ତୀ ୨୪ ଘଣ୍ଟା ଭିତରେ ଏହା ଅଧିକ ଘନୀଭୂତ ହେବ ।ଆମେ ଆଇଏମଡି ଅଧିକାରୀଙ୍କ ସହ ଏହାର ପରବର୍ତ୍ତୀ ସ୍ଥ୍ିତିକୁ ନେଇ କଥା ହୋଇଥିଲୁ । ସେମାନଙ୍କ କହିବା କଥା ଯେ ଲଘୁଚାପ କ୍ଷେତ୍ର ସୃଷ୍ଟି ହେବାପରେ ହିଁ ଝଡର ଗତିପଥ ଆକଳନ କରିହେବ । ଏବେ ଠାରୁ କୌଣସି ବି ଆକଳନ ଭୁଲ ହେବାର ଯଥେଷ୍ଟ ସମ୍ଭାବନା ରହିଛି ।
ସେପଟେ ଭାରତର ଘରୋଇ ପାଣିପାଗ ଆକଳନ ସଂସ୍ଥା ସ୍କାଏମେଟ୍ କହିଛି ବର୍ତ୍ତମାନ ସମୟରେ କୌଣସି ଲଘୁଚାପ କ୍ଷେତ୍ର ସୃଷ୍ଟି ହେଲେ ତାହା ଅଧିକ ଘନିଭୂତ ହେବାର ସମ୍ଭାବନା ରହିଛି । କାରଣ ବର୍ତମାନର ପାଗ ଝଡ ସୃଷ୍ଟି କରିବା ପାଇଁ ଅନୁକୂଳ ପରିବେଶ ସୃଷ୍ଟି କରିବ । କିନ୍ତୁ ସ୍କାଏମେଟ ପକ୍ଷରୁ କୁହାଯାଇଛି ଆଣ୍ଡାମାନ ସାଗରରେ ସୃଷ୍ଟି ହେବାକୁ ଯାଉଥିବା ଏହି ଝଡ ଓଡିଶା ବିଶେଷ ପ୍ରଭାବ ପକାଇବ ନାହିଁ ।
ଅନ୍ୟପଟେ ବିଦେଶୀ ପାଣିପାଗ ସଂସ୍ଥା ଓିଣ୍ଡି ଡଟ୍ କମର ଆକଳନ ଅନୁସାରେ ବାଲେଶ୍ୱର ନିକଟରେ ରାତି ପ୍ରାୟ ୬ଟାରୁ ୮ଟା ଭିତରେ ସ୍ଥଳଭାଗ ଛୁଇଁବ ବାତ୍ୟା । ମେ ୧୦ ତାରିଖ ଦ୍ୱିପ୍ରହରରୁ ବାଲେଶ୍ୱର ,ସୋର ,ଜଳେଶ୍ୱର ଓ ଆଖପାଖ ଅଂଚଳରେ ଏହାର ପ୍ରଭାବ ଆରମ୍ଭ ହେବ ଏବଂ ସନ୍ଧ୍ୟାବେଳେ ଲ୍ୟାଣ୍ଡଫଲ୍ ପ୍ରକ୍ରିୟା ଆରମ୍ଭ ହେବ । ୫ ତାରିଖରେ ଲଘୁଚାପ କ୍ଷେତ୍ର ସୃଷ୍ଟି ହେବାକୁ ଥିବାରୁ ଏବେଠୁ କରାଯାଇଥିବା ଆକଳନ କେତେ ଠିକ ହେବ ତାକୁ ନେଇ ସନ୍ଦେହ ରହିଛି । ୫ ତାରିଖ ପରେ ଏହି ଚିତ୍ର ଆହୁରି ସ୍ପଷ୍ଟ ହୋଇପାରେ ।